കോഴിക്കോട്: ആറ്റിങ്ങല് മൂന്നു മുക്കിലെ ഗ്രീന്ലൈന് ലോഡ്ജില് വടകര സ്വദേശി അസ്മിനയെ (35) കൊല്ലപ്പെട്ട നിലയില് കണ്ടെത്തിയ സംഭവത്തില് ഒരാള് അറസ്റ്റില്. അസ്മിനക്കൊപ്പമുണ്ടായിരുന്ന കായംകുളം സ്വദേശി ജോബി ജോര്ജ് എന്ന 'റോയി' ആണ് കോഴിക്കോട് റെയില്വേ സ്റ്റേഷന് പരിസരത്തുവച്ച് പോലീസ് പിടിയിലായത്. മംഗളൂരു ഭാഗത്തേക്കുള്ള ട്രെയിനില് യാത്ര ചെയ്യാനുള്ള ശ്രമത്തിനിടെ ടൗണ് എസ്ഐ സജി ഷിനോബിന്റെ നേതൃത്വത്തിലുള്ള പോലീസ് സംഘമാണ് ഇയാളെ പിടികൂടിയത്.
മൊബൈല് ഫോണ് ട്രാക്ക് ചെയ്താണ് ഇയാള് സഞ്ചരിക്കുന്ന ദിശ പോലീസ് തിരിച്ചറിഞ്ഞത്. തുടര്ന്ന് എസ്ഐയും സംഘവും കോഴിക്കോട് റെയില്വേ സ്റ്റേഷന് പരിസരത്ത് അതീവ രഹസ്യമായി നിരീക്ഷണം നടത്തിവരികയായിരുന്നു.
പിടിയിലാകുമ്പോള് ജോബി ജോര്ജിന്റെ ഇടതു കയ്യില് ആഴത്തിലുള്ള മുറിവുണ്ടായിരുന്നു. ഇയാളെ ഉടന് ബീച്ച് ആശുപത്രിയില് എത്തിച്ച് ആറ് തുന്നലുകള് ഇടേണ്ടിവന്നു. തന്നെ അസ്മിനയാണ് വെട്ടിയതെന്നാണ് ജോബി ജോര്ജ് പോലീസിനോട് പറഞ്ഞത്. എന്നാല് അസ്മിനയുടെ മരണം താന് അറിഞ്ഞിട്ടില്ലെന്നും ഇയാള് പോലീസിനോട് പറഞ്ഞു.
കഴിഞ്ഞ ചൊവ്വാഴ്ചയാണ് ജോബി ജോലി ചെയ്യുന്ന ആറ്റിങ്ങലിലെ ലോഡ്ജിലേക്ക് അസ്മിനയെ കൊണ്ടുവന്നത്. ലോഡ്ജില് ഭാര്യയാണെന്നാണ് ഇയാള് പരിചയപ്പെടുത്തിയത്. ചൊവ്വാഴ്ച രാത്രി ഇരുവരും മദ്യപിച്ച ശേഷം രൂക്ഷമായ വഴക്കുണ്ടായതായാണ് വിവരം. ബുധനാഴ്ച രാവിലെ ഏറെ നേരമായിട്ടും ഇരുവരെയും മുറിക്ക് പുറത്ത് കാണാത്തതിനെ തുടര്ന്ന് ജീവനക്കാര് സംശയം തോന്നി പോലീസിനെ അറിയിക്കുകയായിരുന്നു. പോലീസ് എത്തി വാതില് തള്ളിത്തുറന്നപ്പോഴാണ് അസ്മിനയുടെ മൃതദേഹം കണ്ടെത്തിയത്.
Related News
