തിരുവനന്തപുരം: വിദ്യാഭ്യാസമന്ത്രി വി. ശിവന്‍കുട്ടിയെ പരിഹസിച്ച് കേന്ദ്രമന്ത്രി സുരേഷ് ഗോപി രംഗത്തെത്തി. നല്ല വിദ്യാഭ്യാസമുള്ള ഒരാള്‍ കേരളത്തിന്റെ വിദ്യാഭ്യാസ മന്ത്രിയായി വരട്ടെയെന്ന് സുരേഷ് ഗോപി പറഞ്ഞു. ഇതിന് മറുപടിയായി, ഒരു മൊട്ടുസൂചിയുടെ ഉപകാരം പോലും കലുങ്ക് തമ്പുരാനില്‍ നിന്ന് കേരളത്തിനില്ലെന്ന് വി. ശിവന്‍കുട്ടി ഫേസ്ബുക്കില്‍ കുറിച്ചു.

ഇടുക്കി വട്ടവട കോവിലൂരില്‍ സംഘടിപ്പിച്ച 'കലുങ്ക് സൗഹൃദ സദസ്സി'ല്‍ സംസാരിക്കുകയായിരുന്നു സുരേഷ് ഗോപി. 'നല്ല വിദ്യാഭ്യാസമുള്ള വിദ്യാഭ്യാസ മന്ത്രി വരട്ടെ, എന്നെ എപ്പോഴും കളിയാക്കുന്ന മന്ത്രിയാണ് ഇപ്പോള്‍ ഉള്ളത്. അവരൊക്കെ തെറിച്ച് മാറട്ടെ' എന്ന് അദ്ദേഹം പറഞ്ഞു. കേന്ദ്ര സര്‍ക്കാരിന്റെ പിഎംഎവൈ പദ്ധതി വേണ്ടെന്ന് വെച്ച് ലൈഫ് മിഷനില്‍ വീട് കൊടുക്കുമെന്ന് പറഞ്ഞ സംസ്ഥാന സര്‍ക്കാര്‍ വാക്ക് പാലിച്ചില്ലെന്നും അദ്ദേഹം വിമര്‍ശിച്ചു.

വോട്ട് വാങ്ങി ജയിച്ച് ജനങ്ങളെ വഞ്ചിക്കുന്നവരെ റോഡില്‍ പിടിച്ചുനിര്‍ത്തി ചോദ്യം ചെയ്യണമെന്നും ഇത് വഞ്ചിക്കുന്നവര്‍ക്ക് മാതൃകയായിരിക്കുമെന്നും സുരേഷ് ഗോപി കൂട്ടിച്ചേര്‍ത്തു. വട്ടവട പഞ്ചായത്തിലെ 18 കുടുംബങ്ങള്‍ക്ക് വീടു നിര്‍മിച്ചു നല്‍കുമെന്നും അദ്ദേഹം പ്രഖ്യാപിച്ചു. കലുങ്ക് സദസ്സിന് മുന്‍പ് സുരേഷ് ഗോപിയും സംഘവും മഹാരാജാസ് കോളേജില്‍ കൊല്ലപ്പെട്ട അഭിമന്യുവിന്റെ കൊട്ടാക്കമ്പൂരിലെ വീട്ടിലെത്തി മാതാപിതാക്കളെ സന്ദര്‍ശിച്ചിരുന്നു.


കേന്ദ്രമന്ത്രിയുടെ പരിഹാസങ്ങള്‍ക്ക് ഫേസ്ബുക്ക് പോസ്റ്റിലൂടെയാണ് വിദ്യാഭ്യാസമന്ത്രി വി. ശിവന്‍കുട്ടി മറുപടി നല്‍കിയത്. കലുങ്കിസമാണ് സുരേഷ് ഗോപിയുടെ പ്രത്യയശാസ്ത്രമെന്ന് അദ്ദേഹം പരിഹസിച്ചു. ഒരു മൊട്ടുസൂചിയുടെ ഉപകാരം പോലും കലുങ്ക് തമ്പുരാനില്‍ നിന്ന് കേരളത്തിനില്ല -വി. ശിവന്‍കുട്ടി കൂട്ടിച്ചേര്‍ത്തു.

വട്ടവടയില്‍ ഇംഗ്ലീഷ് മീഡിയം സ്‌കൂള്‍ വേണമെന്ന നാട്ടുകാരുടെ ആവശ്യത്തോട് പ്രതികരിക്കവെയായിരുന്നു സുരേഷ് ഗോപി വിദ്യാഭ്യാസ മന്ത്രിയെ ലക്ഷ്യമിട്ട് വിമര്‍ശനം ഉന്നയിച്ചത്. നിരന്തരമായി തന്നെ വിമര്‍ശിക്കുന്നവരില്‍ നിന്ന് ഇത്തരം ആവശ്യങ്ങള്‍ക്ക് മറുപടി പ്രതീക്ഷിക്കേണ്ടെന്നും സുരേഷ് ഗോപി പറഞ്ഞിരുന്നു.