കണ്ണൂര്‍: കുറുമാത്തൂര്‍ പൊക്കുണ്ട് മേഖലയില്‍ രണ്ടു മാസം പ്രായമുള്ള പിഞ്ചുകുഞ്ഞ് കിണറ്റില്‍ വീണ് മരിച്ച സംഭവം കൊലപാതകമാണെന്ന് പോലീസ് സ്ഥിരീകരിച്ചു. സംഭവവുമായി ബന്ധപ്പെട്ട്, കുഞ്ഞിന്റെ മാതാവായ എം.പി. മുബഷിറയെ (26) തളിപ്പറമ്പ് പോലീസ് അറസ്റ്റ് ചെയ്തു. തിങ്കളാഴ്ച രാവിലെ 10 മണിയോടെയാണ് കുറുമാത്തൂര്‍ ഡെയറി ജുമാ മസ്ജിദിന് സമീപത്തെ ടി.കെ. ജാബിറിന്റെയും മുബഷിറയുടെയും മകനായ ആമിഷ് അലന്‍ എന്ന കുഞ്ഞ് വീടിനോട് ചേര്‍ന്നുള്ള കിണറ്റില്‍ വീണത്.

കുളിപ്പിക്കുന്നതിനിടെ കുഞ്ഞ് അബദ്ധത്തില്‍ കിണറ്റില്‍ വീണുവെന്നായിരുന്നു മുബഷിറയുടെ ആദ്യ മൊഴി. മാതാവിന്റെ നിലവിളി കേട്ട് ഓടിയെത്തിയ നാട്ടുകാരനാണ് 24 കോല്‍ താഴ്ചയുള്ള കിണറ്റിലിറങ്ങി കുഞ്ഞിനെ പുറത്തെടുത്തത്. തുടര്‍ന്ന് തളിപ്പറമ്പ് സഹകരണാശുപത്രിയിലും പരിയാരം മെഡിക്കല്‍ കോളേജിലും എത്തിച്ചെങ്കിലും കുഞ്ഞ് മരിച്ചു.

ഇരുമ്പ് ഗ്രില്ലും ആള്‍മറയും വലയും ഉണ്ടായിരുന്ന കിണറ്റില്‍ കുട്ടി വീണെന്ന മാതാവിന്റെ മൊഴിയില്‍ പോലീസിന് സംശയം തോന്നി. വീടിന്റെ കുളിമുറിയോട് ചേര്‍ന്ന് തുറന്നു വെച്ച ഭാഗത്തുകൂടിയാണ് കുട്ടി വീണതെന്നായിരുന്നു ബന്ധുക്കളുടെ മൊഴി. സംഭവത്തെ തുടര്‍ന്ന് ഡിവൈ.എസ്.പി. കെ.ഇ. പ്രേമചന്ദ്രന്റെ നേതൃത്വത്തില്‍ പോലീസ് വിശദമായ അന്വേഷണം നടത്തുകയും മുബഷിറയെ ചോദ്യം ചെയ്യുകയുമുണ്ടായി. തുടര്‍ച്ചയായ ചോദ്യം ചെയ്യലിലാണ് മുബഷിറ കുറ്റം സമ്മതിച്ചത്. ഇതോടെ അറസ്റ്റ് രേഖപ്പെടുത്തി. വൈദ്യപരിശോധനകള്‍ പൂര്‍ത്തിയാക്കിയ ശേഷം പ്രതിയെ കോടതിയില്‍ ഹാജരാക്കും.