തിരുവനന്തപുരം: സംസ്ഥാനത്തെ എല്ലാം മുസ്ലിം വീടുകളും സന്ദര്‍ശിക്കുമെന്ന് ബി.ജെ.പി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. മുസ്ലിം സമുദായത്തിന് തങ്ങളെ കുറിച്ചുള്ള തെറ്റിധാരണകള്‍ മാറ്റാന്‍ വേണ്ടിയാണ് മുസ്ലിം ഔട്ട്‌റീച്ച് പരിപാടി നടത്തുന്നതെന്ന് അദ്ദേഹം വ്യക്തമാക്കി.

സംസ്ഥാന ഉപാധ്യക്ഷന്‍ ഡോ.എം.അബ്ദുസലാമാണ് വീടുകള്‍ സന്ദര്‍ശിച്ചുള്ള മുസ്ലിം ഔട്ട്‌റീച്ച് പരിപാടിക്ക് നേതൃത്വം നല്‍കുക. എല്ലാവര്‍ക്കും വേണ്ടിയുള്ള പാര്‍ട്ടിയാണ് ബി.ജെ.പി, തങ്ങള്‍ എല്ലായ്‌പോഴും എല്ലാവരുടേയും കൂടെയുണ്ടാകും എന്ന് പറയാനാണ് മുസ്ലിം ഔട്ട്‌റീച്ച് പരിപാടി സംഘടിപ്പിക്കുന്നതെന്ന് രാജീവ് ചന്ദ്രശേഖര്‍ വാര്‍ത്താ സമ്മേളനത്തില്‍ പറഞ്ഞു.

ഇതില്‍ രാഷ്ട്രീയമില്ല, വോട്ടുപിടിക്കാനുള്ളതല്ല, ഇത് തങ്ങളുടെ വിശ്വാസ്യതയെ ഉറപ്പിക്കാനുള്ളതാണ്. വിഷം നിറച്ചുവെച്ച രാഷ്ട്രീയത്തെ പൊളിക്കാനുള്ള ആത്മാര്‍ത്ഥമായ ഇടപെടലാണ് ഇതെന്നും ആദ്ദേഹം പറഞ്ഞു. ഞങ്ങള്‍ എല്ലാ മുസ്ലിം വീട്ടിലും ഞങ്ങള്‍ പോകും. ബി.ജെ.പി സൃഷ്ടിക്കാന്‍ ആഗ്രഹിക്കുന്ന വികസിത കേരള സന്ദേശം എല്ലായിടത്തും എത്തിക്കുമെന്നും അദ്ദേഹം പറഞ്ഞു.

പ്രധാനമന്ത്രി നരേന്ദ്രമോദി മുന്നോട്ടുവെച്ച കാഴ്ചപ്പാടും രാഷ്ട്രീയവുമാണ് എല്ലാവരുടെയുടെ ഒപ്പം എല്ലാവര്‍ക്കും വേണ്ടി പ്രവര്‍ത്തിക്കുക എന്നത്. അതിന്റെ തുടര്‍ച്ച തന്നെയാണ് മുസ്ലിം ഔട്ട്‌റീച്ച് പ്രോഗ്രാമെന്നും രാജീവ് ചന്ദ്രശേഖര്‍ വിശദീകരിച്ചു.