തിരുവനന്തപുരം- ആരോഗ്യരംഗത്തെ നിരന്തര വീഴ്ചകള്‍ക്കെതിരെ യൂത്ത് കോണ്‍ഗ്രസ് രംഗത്ത്. ആരോഗ്യമന്ത്രി വീണാ ജോര്‍ജിന്റെ രാജി ആവശ്യപ്പെട്ട് യൂത്ത് കോണ്‍ഗ്രസ് മന്ത്രിയുടെ വസതിയിലേക്ക് നടത്തിയ മാര്‍ച്ച് സംഘര്‍ഷത്തില്‍ കലാശിച്ചു. തിരുവനന്തപുരം മെഡിക്കല്‍ കോളേജില്‍ ചികിത്സയ്‌ക്കെത്തിയ രോഗി മരിച്ചതുമായി ബന്ധപ്പെട്ടാണ് യൂത്ത് കോണ്‍ഗ്രസിന്റെ പ്രതിഷേധം.
ബാരിക്കേഡ് മറിച്ചിടാന്‍ ശ്രമിച്ച പ്രവര്‍ത്തകരുടെ നേരെ പോലീസ് ജലപീരങ്കി പ്രയോഗിച്ചു. പ്രവര്‍ത്തകര്‍ ആരോഗ്യമന്ത്രിയുടെ കോലം കത്തിച്ചു. വി.എസ്. ശിവകുമാര്‍ പ്രതിഷേധ മാര്‍ച്ച് ഉദ്ഘാടനം ചെയ്തു. മെഡിക്കല്‍ കോളേജ് ആശുപത്രിയിലെ മരണം കൊലപാതകമാണെന്നും കൊലക്കുറ്റത്തിന് നടപടി എടുക്കണമെന്നും വി.എസ്. ശിവകുമാര്‍ പറഞ്ഞു.
'ഹൃദയം തകര്‍ന്ന് വന്ന ചെറുപ്പക്കാരനെ തറയില്‍ കിടത്തി. ആറ് ദിവസം തിരിഞ്ഞ് നോക്കിയില്ല. എന്ത് സംഭവിച്ചാലും റിപ്പോര്‍ട്ട് ചോദിക്കുകയാണ് മന്ത്രി വീണ ജോര്‍ജ്. എത്ര ജീവനുകള്‍ പോയി. ഇതൊരു കൊലപാതകമാണ്, കൊലക്കുറ്റത്തിന് നടപടി എടുക്കണം. മന്ത്രി രാജിവെച്ച് പുറത്തുപോകണം. 50 പേര്‍ കിടക്കേണ്ട ഇടത്ത് 150 പേര്‍ കിടക്കുന്നു. രോഗികളെ തിരിഞ്ഞുനോക്കുന്നില്ല. പാവപ്പെട്ടവന്റെ ബുദ്ധിമുട്ടുകള്‍ മനസ്സിലാക്കണം. വേണുവിന്റെ കുടുംബത്തെ സംരക്ഷിക്കാന്‍ സര്‍ക്കാര്‍ തയാറാകണം. മസ്തിഷ്‌കജ്വരം ബാധിച്ച് 45 പേര്‍ മരിച്ചു. ഉറവിടം കണ്ടെത്താന്‍ സാധിച്ചില്ല. ആ സമയത്താണ് പ്രവര്‍ത്തകര്‍ക്കുനേരെ ജലാപീരങ്കിയിലൂടെ ചെളിവെള്ളം അടിക്കുന്നത്- വി.എസ്. ശിവകുമാര്‍ പറഞ്ഞു.