കൊച്ചി: പുരാവസ്തു തട്ടിപ്പ് കേസ് പ്രതി മോന്സണ് മാവുങ്കലിന്റെ കലൂരിലെ വാടക വീട്ടില് മോഷണം നടന്നതായുള്ള പരാതി വ്യാജമെന്ന് സംശയം. വാടകവീട് ഒഴിയാതിരിക്കാനുള്ള തന്ത്രമാണ് ഇതിന് പിന്നിലെന്നാണ് കരുതുന്നത്. വാടകയ്ക്കെടുത്ത വീട് ഒഴിയാതിരിക്കാന് മോന്സണ് നടത്തിയ നീക്കമാണിതെന്ന് പോലീസ് പ്രാഥമികമായി വിലയിരുത്തുന്നു. വീട്ടില് സൂക്ഷിച്ച സാധനങ്ങള് തിട്ടപ്പെടുത്തുന്നതിനായി കോടതിയുടെ അനുമതിയോടെ പരോളില് വീട്ടിലെത്തിയപ്പോഴാണ് മോഷണം നടന്നതായി മോന്സണ് ആരോപിച്ചത്.
കഴിഞ്ഞദിവസം വീട്ടിലെത്തിയപ്പോഴാണ് വീടിന്റെ ഒരുഭാഗം പൊളിഞ്ഞതായി ശ്രദ്ധയില്പ്പെട്ടത്. പിറകുവശത്തെ വാതിലും സിസിടിവിയും ഉള്പ്പെടെ തകര്ക്കപ്പെട്ട നിലയില് കണ്ടെത്തുകയും ചെയ്തു. ഇതോടെ വീട്ടിലെ പുരാവസ്തുക്കളില് പലതും മോഷണംപോയെന്ന മോന്സന്റെ പരാതിയില് പോലീസെത്തി പരിശോധന നടത്തി. ഏകദേശം 20 കോടിയോളം രൂപ വിലയുള്ള സാധനങ്ങള് മോഷണം പോയതായി മോന്സണ് ആരോപിച്ചു.
എന്നാല്, രണ്ടാഴ്ച മുന്പ് മോന്സന്റെ അഭിഭാഷകന് വീട്ടില് നേരിട്ടെത്തി സാധനങ്ങളെല്ലാം പരിശോധിച്ചപ്പോള് ഇത്തരത്തില് സാധനങ്ങള് നഷ്ടപ്പെട്ടതായി പരാതിയുണ്ടായിരുന്നില്ല. പിന്നീട് കഴിഞ്ഞദിവസം മോന്സണ് വീട്ടിലെത്തിയപ്പോഴാണ് മോഷണം നടന്നതായി പറഞ്ഞത്.
കഴിഞ്ഞവര്ഷം മാര്ച്ചിലും ഏതാനും സാധനങ്ങള് ഈവീട്ടില്നിന്ന് നഷ്ടപ്പെട്ടിരുന്നു. ഇതേത്തുടര്ന്ന് മോന്സണ് പരാതി നല്കുകയും ക്രൈംബ്രാഞ്ച് ഇത്തരത്തില് സാധനങ്ങള് നഷ്ടമായി എന്ന് സ്ഥിരീകരിക്കുകയും ചെയ്തിരുന്നു. മോന്സന്റെയും വീട്ടുടമസ്ഥന്റെയും പരാതിയില് പോലീസ് അന്വേഷണം നടത്തുന്നു. മോന്സണ് അറസ്റ്റിലായതോടെ വീട് ക്രൈംബ്രാഞ്ചിന്റെ കസ്റ്റഡിയിലായിരുന്നു.
Related News
