തിരുവനന്തപുരം: അത്യാസന്ന നിലയിലുളള രോഗിയെ അവഗണിച്ച സംഭവവത്തില്‍ മെഡിക്കല്‍ കോളജ് ആശുപത്രി വിവാദത്തിലായിരിക്കെ, തിരുവനന്തപുരത്തെ തന്നെ എസ്.എ.ടി ആശുപത്രിക്കെതിരെയും ഗുരുതര ചികിത്സാപിഴവ് ആരോപണം. ആശുപത്രിയില്‍നിന്നുള്ള അണുബാധ മൂലമാണ് പ്രസവത്തിന് എത്തിയ യുവതി മരിച്ചതെന്ന ആരോപണവുമായി ബന്ധുക്കള്‍ രംഗത്തെത്തി. പ്രസവത്തിന് ശേഷം നാല് ദിവസത്തിനുള്ളില്‍ ആരോഗ്യനില മോശമായ ശിവപ്രിയയെ മെഡിക്കല്‍ കോളജില്‍ ആശുപത്രിയില്‍ പ്രവേശിപ്പിച്ചിരുന്നു. ശിവപ്രിയ മരിച്ചതോടെ കുടുംബവും നാട്ടുകാരും ആശുപത്രിക്ക് മുമ്പില്‍ പ്രതിഷേധിക്കുകയാണ്.

തിരുവനന്തപുരം കരിക്കകം സ്വദേശിനിയാണ് ശിവപ്രിയ. ആശുപത്രിയിലെത്തിച്ച യുവതി പ്രസവം കഴിഞ്ഞ് നാല് ദിവസത്തിന് ശേഷം പനി ബാധിച്ച് വീണ്ടും ആശുപത്രിയിലെത്തുകയായിരുന്നു. തുടര്‍ന്ന് തിരുവനന്തപുരം മെഡിക്കല്‍ കോളജ് ആശുപത്രിയിലെ വെന്റിലേറ്ററിലേക്ക് മാറ്റി. രോഗം മൂര്‍ഛിച്ചതിനെ തുടര്‍ന്ന് അല്‍പസമയം മുമ്പ് മരിക്കുകയായിരുന്നു.

കഴിഞ്ഞ മാസം 22നാണ് ശിവപ്രിയയെ എസ്.എ.ടി ആശുപത്രിയില്‍ പ്രവേശിപ്പിച്ചത്. പ്രസവം നടന്ന ശേഷം മൂന്ന് ദിവസം ആശുപത്രിയില്‍ തുടര്‍ന്നു. 25 ന് ആശുപത്രിയില്‍നിന്ന് വീട്ടിലേക്ക് മടങ്ങി. തൊട്ടുപിന്നാലെ പനിയും ശാരീരികാസ്വാസ്ഥ്യങ്ങളും മൂലം തിരികെ എസ്.എ.ടി ആശുപത്രിയില്‍ പ്രവേശിപ്പിച്ചു. ശരീരത്തില്‍ അണുബാധ കണ്ടെത്തിയതോടെ ഐസിയുവില്‍ പ്രവേശിപ്പിക്കുകയായിരുന്നു.

ആശുപത്രിയില്‍ നിന്നാണ് അണുബാധയേറ്റതെങ്കില്‍ എന്തുകൊണ്ട് നേരത്തെ പറഞ്ഞില്ല എന്നാണ് കുടുംബം ചോദിക്കുന്നത്. കുടുംബവും നാട്ടുകാരും ആശുപത്രിക്ക് മുമ്പില്‍ പ്രതിഷേധിക്കുകയാണ്.