തിരുവനന്തപുരം - സംസ്ഥാനത്ത് തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പ് പ്രഖ്യാപിച്ചു. ഡിസംബര്‍ 9, 11 തീയതികളില്‍ രണ്ട് ഘട്ടങ്ങളിലായാണ് തെരഞ്ഞെടുപ്പ്. വോട്ടെണ്ണല്‍ 13 ന് നടക്കും.

തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി, കോട്ടയം, എറണാകുളം എന്നീ ജില്ലകളില്‍ ഡിസംബര്‍ 9നും മറ്റു ജില്ലകളില്‍ 11 നുമാണ് പോളിംഗ്.

വിജ്ഞാപനം നവംബര്‍ 14 വെള്ളിയാഴ്ച പുറത്തിറക്കും. നാമനിര്‍ദേശപത്രിക 21 വെള്ളി വരെ സമര്‍പ്പിക്കാം. സൂക്ഷ്മ പരിശോധന 25നാണ്. പിന്‍വലിക്കല്‍ തീയതി നവംബര്‍ 24.


1199 തദ്ദേശസ്ഥാപനങ്ങളിലായി 23576 വാര്‍ഡുകളിലാണ് തെരഞ്ഞെടുപ്പ് നടക്കുക. മട്ടന്നൂര്‍ നഗരസഭയില്‍ തെരഞ്ഞെടുപ്പ് പിന്നീട് നടക്കും. തെരഞ്ഞെടുപ്പ് പ്രഖ്യാപിച്ചതോടെ പെരുമാറ്റച്ചട്ടം നിലവില്‍ വന്നു.

പെരുമാറ്റച്ചട്ടം കര്‍ശനമായി നടപ്പാക്കുമെന്ന് സംസ്ഥാന തെരഞ്ഞെടുപ്പ് കമ്മീഷണര്‍ എ. ഷാജഹാന്‍ അറിയിച്ചു. ഇതുസംബന്ധമായി ജില്ലാകലക്ടര്‍മാര്‍ക്ക് നിര്‍ദേശം നല്‍കിയിട്ടുണ്ട്. വ്യാജവാര്‍ത്തകള്‍ തടയുന്നതിന് നടപടി സ്വീകരിക്കുമെന്നും അദ്ദേഹം അറിയിച്ചു.
33746 പോളിംഗ് സ്‌റ്റേഷനുകളാണുള്ളത്. 12035 സംവരണ വാര്‍ഡുകളുണ്ട്. 2.84 കോടി വോട്ടര്‍മാരാണുള്ളത്. 2841 പ്രവാസി വോട്ടുകള്‍ മാത്രമാണുള്ളത്. സ്വതന്ത്രവും നീതിപൂര്‍വകവുമായ തെരഞ്ഞെടുപ്പിന് എല്ലാ സംവിധാനവും ഏര്‍പ്പെടുത്തുമെന്നും മതിയായ സുരക്ഷ ഉറപ്പാക്കുമെന്നും അദ്ദേഹം അറിയിച്ചു. വെബ്കാസ്റ്റിംഗ് ഏര്‍പ്പെടുത്തും.

സ്ഥാനാര്‍ഥികള്‍ക്ക് പരമാവധി ചെലവഴിക്കാവുന്ന തെരഞ്ഞെടുപ്പ് ചെലവ് ഗ്രാമപഞ്ചായത്തുകളില്‍ 25000 രൂപയും ബ്ലോക്ക് പഞ്ചായത്തുകളിലും മുനിസിപ്പാലിറ്റികളിലും 75000 രൂപയും ജില്ലാ പഞ്ചായത്തുകളില്‍ 1.5 ലക്ഷം രൂപയുമായിരിക്കും. വോട്ടെടുപ്പ് രാവിലെ 7 മുതല്‍ വൈകിട്ട് ആറ് വരെയാണ്. വോട്ടെണ്ണല്‍ രാവിലെ 8 മുതലാണ്. ഒരു വാര്‍ഡിലെ എല്ലാ പോളിംഗ് സ്‌റ്റേഷനുകളിലേയും വോട്ടുകള്‍ ഒരു ടേബിളില്‍ തന്നെ നടക്കുമെന്ന് തെരഞ്ഞെടുപ്പ് കമീഷണര്‍ അറിയിച്ചു. തെരഞ്ഞെടുപ്പിലുടനീളം ഹരിതചട്ടം പാലിക്കുമെന്നും അദ്ദേഹം അറിയിച്ചു.