തിരുവനന്തപുരം: കേരളത്തിന് വീണ്ടും അഭിമാന നേട്ടം. 2026-ല്‍ ലോകമെമ്പാടുമുള്ള സഞ്ചാരികള്‍ നിര്‍ബന്ധമായും സന്ദര്‍ശിച്ചിരിക്കേണ്ട വിനോദസഞ്ചാര കേന്ദ്രങ്ങളുടെ ആഗോള പട്ടികയില്‍ കൊച്ചി ഇടം നേടി. പ്രമുഖ ഓണ്‍ലൈന്‍ യാത്രാ പ്ലാറ്റ്ഫോമായ Booking.com പുറത്തിറക്കിയ ലോകത്തിലെ ഏറ്റവും 'ട്രെന്‍ഡിംഗ്' ആയ 10 ഡെസ്റ്റിനേഷനുകളുടെ പട്ടികയിലാണ് കൊച്ചി ഇടം പിടിച്ചത്.

വിയറ്റ്നാം, സ്പെയിന്‍, കൊളംബിയ, ചൈന, ബ്രസീല്‍, ഓസ്ട്രേലിയ, ജര്‍മ്മനി, യുഎസ്എ തുടങ്ങിയ ലോകോത്തര കേന്ദ്രങ്ങളോടൊപ്പം ഇന്ത്യയില്‍ നിന്ന് ഈ പട്ടികയില്‍ ഇടംനേടിയ ഒരേയൊരു ലക്ഷ്യസ്ഥാനമാണ് കൊച്ചി.

ഇത് കേരള ടൂറിസത്തിന് ലഭിച്ച സുപ്രധാനമായ ആഗോള അംഗീകാരമാണെന്ന് ടൂറിസം വകുപ്പ് മന്ത്രി പി.എ. മുഹമ്മദ് റിയാസ് അഭിപ്രായപ്പെട്ടു. 'ലോക ടൂറിസം ഭൂപടത്തില്‍ കേരള ടൂറിസത്തെ ശക്തമായി അടയാളപ്പെടുത്തുന്ന നേട്ടമാണിത്,' മന്ത്രി വ്യക്തമാക്കി.

ചരിത്രവും സംസ്‌കാരവും ഇഴചേര്‍ന്ന തെരുവുകള്‍, വൈവിധ്യമാര്‍ന്ന ഭക്ഷണ പാരമ്പര്യം, മനോഹര തീരങ്ങള്‍: കായലും കടലും സംഗമിക്കുന്ന ദൃശ്യഭംഗി ഈ സവിശേഷതകളാണ് കൊച്ചിയുടെ 'മാജിക്' എന്നും, 2026-ല്‍ ലോകത്തെ വരവേല്‍ക്കാന്‍ കൊച്ചി ഒരുങ്ങിക്കഴിഞ്ഞെന്നും റിയാസ് കൂട്ടിച്ചേര്‍ത്തു.