തിരുവനന്തപുരം: ബലാത്സംഗക്കേസില് പ്രതിയായ രാഹുല് മാങ്കൂട്ടത്തില് എം.എല്.എ.യെ കോണ്ഗ്രസില് നിന്ന് ഉടന് പുറത്താക്കിയേക്കും. കെ.പി.സി.സി. അധ്യക്ഷന് തീരുമാനം ഉടന് പ്രഖ്യാപിക്കും. പുതിയ പരാതികൂടി ഉയര്ന്നതോടെ രാഹുലിനെതിരെ 'ബ്രഹ്മാസ്ത്രം' പ്രയോഗിക്കാന് ഹൈക്കമാന്ഡ് കെ.പി.സി.സിക്ക് നിര്ദ്ദേശം നല്കുകയായിരുന്നു.
'വ്യക്തിയെന്ന നിലയില് രാഹുല് ചെയ്യുന്ന കാര്യങ്ങള്ക്ക് പാര്ട്ടി ബാധ്യതയേറ്റെടുക്കേണ്ടതില്ല' എന്ന കടുത്ത നിലപാടിലാണ് കോണ്ഗ്രസ് നേതൃത്വം. രാഹുല് പാര്ട്ടിയില് തുടരുന്നതിനെതിരെ കേരളത്തിലും കേന്ദ്ര നേതൃത്വത്തിലും കടുത്ത അതൃപ്തി നിലനിന്നിരുന്നു.
രാഹുല് ഗാന്ധിക്കും പ്രിയങ്ക ഗാന്ധിക്കും നേരിട്ട് പരാതി ലഭിച്ചതോടെ കെ.പി.സി.സിക്ക് മേലുള്ള സമ്മര്ദ്ദം വര്ധിച്ചു. ഇന്നലെ എ.ഐ.സി.സി. ജനറല് സെക്രട്ടറി കെ.സി. വേണുഗോപാല് കെ.പി.സി.സി. നേതാക്കളുമായി സംസാരിക്കുകയും ഇന്ന് തന്നെ പുറത്താക്കല് നടപടി സ്വീകരിക്കാന് നിര്ദ്ദേശം നല്കുകയും ചെയ്തിരുന്നു.
രാഹുലിനെതിരെ നടപടിയെടുത്തില്ലെങ്കില് വരാനിരിക്കുന്ന തദ്ദേശ, നിയമസഭാ തിരഞ്ഞെടുപ്പുകളില് കനത്ത തിരിച്ചടിയുണ്ടാകുമെന്ന ശക്തമായ വിലയിരുത്തലിന്റെ അടിസ്ഥാനത്തിലാണ് പാര്ട്ടി ഈ കടുത്ത നീക്കത്തിന് മുതിരുന്നത്.
കോണ്ഗ്രസിന്റെ കടുത്ത നിലപാടിന്റെ സൂചന നല്കി കെ. മുരളീധരന് എം.പി. നേരത്തെ രംഗത്തെത്തിയിരുന്നു. 'രാഹുലിനെതിരെ ബ്രഹ്മാസ്ത്രം പുറത്തെടുക്കും, പുകഞ്ഞ കൊള്ളി പുറത്താണ്' എന്ന് അദ്ദേഹം പരസ്യമായി പ്രഖ്യാപിച്ചിരുന്നു.
Related News
