കൊച്ചി: സ്വത്ത് കൈക്കലാക്കാനുള്ള ശ്രമത്തിനിടെ അമ്മയെ ക്രൂരമായി മര്‍ദ്ദിച്ച് കൊലപ്പെടുത്തിയ കേസില്‍ മകനെ ചെങ്ങമനാട് പോലീസ് അറസ്റ്റ് ചെയ്തു. ആലുവ പുറയാര്‍ ഭാഗത്ത് വാടകയ്ക്ക് താമസിക്കുന്ന ചൊവ്വര പാറപ്പുറത്ത് വീട്ടില്‍ ബിനു (38) ആണ് അറസ്റ്റിലായത്. ഇയാളുടെ അമ്മ അനിത (58) ആണ് കൊല്ലപ്പെട്ടത്.

നവംബര്‍ 30-നാണ് കേസിനാസ്പദമായ സംഭവം നടന്നത്. അലക്കുകല്ലിന് സമീപം അമ്മ കുഴഞ്ഞുവീഴുകയായിരുന്നു എന്നും, ഉടന്‍ ആശുപത്രിയിലെത്തിച്ചെങ്കിലും മരണം സംഭവിച്ചു എന്നുമാണ് ബിനു പോലീസിന് നല്‍കിയ മൊഴി. തുടര്‍ന്ന് പോലീസ് അസ്വാഭാവിക മരണത്തിന് കേസെടുക്കുകയും അന്വേഷണം ആരംഭിക്കുകയും ചെയ്തു.

എന്നാല്‍, നിര്‍ണായകമായ പോസ്റ്റ്മോര്‍ട്ടം റിപ്പോര്‍ട്ട് കേസിന്റെ ഗതി മാറ്റിമറിച്ചു. തലയ്ക്കും ശരീരത്തിനും ആന്തരിക അവയവങ്ങള്‍ക്കും ഗുരുതരമായ ക്ഷതമേറ്റതിനെത്തുടര്‍ന്നുണ്ടായ ആന്തരിക രക്തസ്രാവമാണ് മരണകാരണമെന്ന് റിപ്പോര്‍ട്ടില്‍ വ്യക്തമായി. ഇതോടെ പോലീസ് നിരീക്ഷണത്തിലായിരുന്ന മകന്‍ ബിനുവിനെ കസ്റ്റഡിയിലെടുത്ത് ചോദ്യം ചെയ്യുകയായിരുന്നു.

കഴിഞ്ഞ 22 വര്‍ഷമായി ഇടുക്കി ചെങ്കളത്തുള്ള മേഴ്‌സി ഹോമിലായിരുന്നു അനിത താമസിച്ചിരുന്നത്. സെപ്റ്റംബറിലാണ് ബിനു അമ്മയെ ചൊവ്വരയിലെ വാടക വീട്ടിലേക്ക് കൂട്ടിക്കൊണ്ടുവന്നത്. സ്വത്ത് സ്വന്തമാക്കണമെന്ന ലക്ഷ്യത്തോടെ അമ്മയെ നിരന്തരം മര്‍ദിച്ചിരുന്നതായി പോലീസ് അന്വേഷണത്തില്‍ കണ്ടെത്തി. ഈ മര്‍ദ്ദനമാണ് അനിതയുടെ ദാരുണമായ മരണത്തിലേക്ക് നയിച്ചത്.

ബിനുവിനെതിരെ കൊലപാതക കുറ്റം ചുമത്തി പോലീസ് നിയമനടപടികള്‍ ആരംഭിച്ചു. സംഭവത്തില്‍ കൂടുതല്‍ പേര്‍ക്ക് പങ്കുണ്ടോ എന്നതുള്‍പ്പെടെയുള്ള കാര്യങ്ങളില്‍ വിശദമായ അന്വേഷണം നടക്കുകയാണ്.