തിരുവനന്തപുരം: അന്തിമവിധിവരെ അതിജീവിതയ്ക്കൊപ്പം പ്രോസിക്യൂഷനും പൊലീസും ഉണ്ടാകുമെന്ന് അന്വേഷണ സംഘത്തിന്റെ മുന് മേധാവി റിട്ട.എഡിജിപി ബി.സന്ധ്യ വ്യക്തമാക്കി. ഇത് അന്തിമ വിധി അല്ലെന്നും മേല്ക്കോടതികളുണ്ടെന്നും മുന്നോട്ടു പോകുമെന്നും അവര് മാധ്യമങ്ങളോട് പറഞ്ഞു.
'കേസിലെ ഗൂഢാലോചന എന്നും വെല്ലുവിളിയാണ്. പ്രോസിക്യൂഷന് അത് തെളിയിച്ചില്ല എന്നാണ് വാര്ത്തകളില് കാണുന്നത്. ഇത് അന്തിമ വിധിയല്ല. മേല്ക്കോടതി ഉണ്ട്. പൊലീസും മൂന്ന് പ്രോസിക്യൂട്ടര്മാരും നല്ല രീതിയില് ജോലി ചെയ്തു. ഈ കേസിലൂടെ സിനിമാ മേഖലയില് പോസിറ്റീവായ കാര്യങ്ങളുണ്ടായി. പൊലീസിനു നിരവധി വെല്ലുവിളികള് നേരിടേണ്ടി വന്നു. അതിജീവിത മേല്ക്കോടതിയില് അപ്പീല് പോകുമെന്ന് കരുതുന്നു. കാത്തിരിക്കാം'' ബി.സന്ധ്യ പറഞ്ഞു.
സര്ക്കാര് അന്നും ഇന്നും അതിജീവിതയ്ക്കൊപ്പമാണെന്ന് മന്ത്രി സജി ചെറിയാന് പറഞ്ഞു. യുവനടിയെ ആക്രമിച്ച് ദൃശ്യങ്ങള് പകര്ത്തിയ കേസില് വിധിവന്നതിന് പിന്നാലെ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. തിരഞ്ഞെടുപ്പിന്റെ തിരക്കിലായതിനാല് വിധിയുടെ കൂടുതല് ഉള്ളടക്കങ്ങള് അറിഞ്ഞില്ലെന്നും ഇതിനെക്കുറിച്ച് കൂടുതല് മനസിലാക്കിയശേഷം മേല് നടപടികള് സ്വീകരിക്കുമെന്നും മന്ത്രി വ്യക്തമാക്കി.
അതിജീവിതയ്ക്ക് അനുകൂലമായ നിലപാടാണ് എന്നും സര്ക്കാര് എടുത്തതെന്ന് സിപിഎം സംസ്ഥാന സെക്രട്ടറി എംവി ഗോവിന്ദനും വ്യക്തമാക്കി. തനിക്കെതിരെ ഗുഢാലോചന നടന്നുവെന്ന ദിലീപിന്റെ വിശദീകരണത്തിന് പ്രസക്തിയില്ലെന്നും ഗോവിന്ദന് പറഞ്ഞു. കേസില് അടുത്ത നടപടി സ്വീകരിക്കുമെന്നും അദ്ദേഹം വ്യക്തമാക്കി.
Related News
