ശ്രീമൂലനഗരം: നെടുമ്പാശ്ശേരി തണല് ഗ്രാന്ഡ്മ ഹോമിലെ അന്തേവാസികള്ക്ക് സന്തോഷത്തിന്റെ പുത്തന് അനുഭവം പകര്ന്ന് ക്രിസ്മസ് - പുതുവത്സര സംഗമം സംഘടിപ്പിച്ചു. ശ്രീമൂലനഗരം തണല് ഗ്രാന്ഡ്മ ഹോമില് നടന്ന ചടങ്ങില് പ്രശസ്ത സിനിമാ താരങ്ങളായ ടിനി ടോം, വിഷ്ണു ഉണ്ണിക്കൃഷ്ണന് എന്നിവര് മുഖ്യാതിഥികളായി പങ്കെടുത്തു. മിമിക്രിയും പാട്ടുകളുമായി താരങ്ങള് സദസ്സിനെ കയ്യിലെടുത്തതോടെ അന്തേവാസികളായ സഹോദരിമാര്ക്കും അത് അവിസ്മരണീയ നിമിഷങ്ങളായി.
തണല് ചെയര്മാന് അബ്ദുല് കരീം അധ്യക്ഷത വഹിച്ച ചടങ്ങില് ശ്രീമൂലനഗരം ഗ്രാമപഞ്ചായത്ത് പ്രസിഡന്റ് പ്രിന്സി ഡേവിസ് ആഘോഷങ്ങള് ഉദ്ഘാടനം ചെയ്തു. തണലിലെ അന്തേവാസികള് അവതരിപ്പിച്ച പാട്ടുകളും നൃത്തവും മിമിക്രിയും ചടങ്ങിന് മാറ്റുകൂട്ടി. കന്യാകുമാരി മുതല് കാശ്മീര് വരെ സൈക്കിള് ചവിട്ടി റെക്കോര്ഡ് നേട്ടം കൈവരിച്ച സലിം കോട്ടപ്പുറത്തെ ചടങ്ങില് ആദരിച്ചു.
താരങ്ങളായ ടിനി ടോമിനും വിഷ്ണു ഉണ്ണിക്കൃഷ്ണനും തണലിന്റെ സ്നേഹോപഹാരങ്ങള് ചെയര്മാന് അബ്ദുല് കരീം, പഞ്ചായത്ത് പ്രസിഡന്റ് പ്രിന്സി ഡേവിസ് എന്നിവര് ചേര്ന്ന് സമര്പ്പിച്ചു. തണല് സെക്രട്ടറി പി.എല് സമദ് സ്ഥാപനത്തിന്റെ പ്രവര്ത്തനങ്ങള് പരിചയപ്പെടുത്തി.
പഞ്ചായത്ത് വൈസ് പ്രസിഡന്റ് പി.കെ സിറാജ്, ആസ്റ്റര് ഡി.എം. ഫൗണ്ടേഷന് അസിസ്റ്റന്റ് ജനറല് മാനേജര് ലത്തീഫ് ഖാസിം, പവിഴം ഗ്രൂപ്പ് ചെയര്മാന് പവിഴം ജോര്ജ്ജ്, സിനിമാ താരങ്ങളായ സലിം ബാബ, ഉണ്ണിക്കൃഷ്ണന് ചിറ്റൂര്, ചെങ്കിസ് ഖാന് എന്നിവര് സംസാരിച്ചു. തണല് ഭാരവാഹികളും കലാ-സാംസ്കാരിക പ്രവര്ത്തകരുമായ റോയല് റഫീഖ്, ശ്രീമൂലനഗരം മോഹന്, അന്സാര് നെടുമ്പാശ്ശേരി, പി.എസ് നൗഷാദ്, വിവിധ രാഷ്ട്രീയ-സാമൂഹിക പ്രവര്ത്തകര്, കരുണാഭവനിലെ സിസ്റ്റര്മാര് തുടങ്ങിയവര് സംഗമത്തില് പങ്കെടുത്തു.
തണല് എക്സിക്യൂട്ടീവ് അംഗങ്ങളായ ടി.കെ അബ്ദുല് സലാം, കെ.എസ് ഷാജഹാന്, അബ്ദുഹീം മുടിക്കല്, എ.കെ അബ്ദുല് സലാം, അബ്ദുറഹ്മാന്, ജീവനക്കാരായ ഷാജഹാന് വടകര, റമീസ്, അഞ്ജിത, ജസ്ന എന്നിവരും വനിതാ വാളണ്ടിയര്മാരും പരിപാടികള്ക്ക് നേതൃത്വം നല്കി.
Related News
