തിരുവനന്തപുരം: പ്രളയ പുനര്‍നിര്‍മ്മാണ പദ്ധതിയായ 'പുനര്‍ജനി'യുമായി ബന്ധപ്പെട്ട വിദേശ ഫണ്ട് സ്വീകരണത്തില്‍ പ്രതിപക്ഷ നേതാവ് വി.ഡി. സതീശനെതിരെ സി.ബി.ഐ അന്വേഷണത്തിന് വിജിലന്‍സ് ശുപാര്‍ശ നല്‍കി. കേന്ദ്ര സര്‍ക്കാരിന്റെ അനുമതിയില്ലാതെ വിദേശത്തുനിന്ന് പണം പിരിച്ചതില്‍ എഫ്.സി.ആര്‍.എ (FCRA) നിയമലംഘനം നടന്നെന്ന കണ്ടെത്തലിനെത്തുടര്‍ന്നാണ് നടപടി.
വിജിലന്‍സ് മുന്‍ ഡയറക്ടര്‍ യോഗേഷ് ഗുപ്ത സമര്‍പ്പിച്ച റിപ്പോര്‍ട്ട് നിലവില്‍ മുഖ്യമന്ത്രിയുടെ പരിഗണനയിലാണ്. വരും ദിവസങ്ങളില്‍ മന്ത്രിസഭായോഗം ഇക്കാര്യത്തില്‍ അന്തിമ തീരുമാനമെടുക്കും.

കേന്ദ്ര സര്‍ക്കാരിന്റെ മുന്‍കൂര്‍ അനുമതിയില്ലാതെ വിദേശത്തുനിന്ന് ഫണ്ട് സ്വീകരിച്ചു. ഇത് 2010-ലെ ഫോറിന്‍ കോണ്‍ട്രിബ്യൂഷന്‍ റെഗുലേഷന്‍ ആക്ടിന്റെ സെക്ഷന്‍ 3 (2) (എ) പ്രകാരം ഗുരുതരമായ ലംഘനമാണെന്നാണ് വിജിലന്‍സ് അന്വേഷണ റിപ്പോര്‍ട്ടില്‍ ചൂണ്ടിക്കാട്ടുന്ന പ്രധാന നിയമലംഘനം. സ്വകാര്യ സന്ദര്‍ശനത്തിനെന്ന് കാട്ടി കേന്ദ്രാനുമതി വാങ്ങിയ ശേഷം വിദേശത്ത് പോയി പൊതുപദ്ധതിക്കായി ഫണ്ട് സ്വരൂപിച്ചുവെന്നാണ് ആരോപണം.

നിയമസഭാ സാമാജികന്‍ എന്ന നിലയിലുള്ള പെരുമാറ്റച്ചട്ടങ്ങള്‍ ലംഘിച്ചതിനാല്‍ റൂള്‍ ഓഫ് പ്രൊസീജിയേഴ്‌സ് പ്രകാരം സ്പീക്കര്‍ നടപടി സ്വീകരിക്കണമെന്നും ശുപാര്‍ശയിലുണ്ട്. 2018-ലെ പ്രളയത്തില്‍ വീട് നഷ്ടപ്പെട്ടവര്‍ക്കായി പറവൂര്‍ മണ്ഡലത്തില്‍ നടപ്പിലാക്കിയ പദ്ധതിയായിരുന്നു പുനര്‍ജനി. ഇതിനായി വിദേശത്ത് പോയി പണപ്പിരിവ് നടത്തിയതില്‍ ക്രമക്കേടുണ്ടെന്ന് ആരോപിച്ച് ചാലക്കുടി കാതിക്കുടം ആക്ഷന്‍ കൗണ്‍സിലാണ് പരാതി നല്‍കിയത്.

യു.കെയില്‍ സംഘടിപ്പിച്ച ചടങ്ങില്‍ പ്രളയബാധിതരായ സ്ത്രീകള്‍ക്കായി നെയ്ത്തുയന്ത്രം വാങ്ങാന്‍ ഒരാള്‍ 500 പൗണ്ട് വീതം നല്‍കണമെന്ന് വി.ഡി. സതീശന്‍ അഭ്യര്‍ത്ഥിക്കുന്ന വീഡിയോ ദൃശ്യങ്ങള്‍ വിജിലന്‍സ് പ്രധാന തെളിവായി പരിശോധിച്ചിട്ടുണ്ട്.