ദോഹ: ഗസ എക്സിക്യൂട്ടീവ് ബോര്ഡില് ഖത്തറിനെ പ്രതിനിധീകരിച്ച് പ്രധാനമന്ത്രിയുടെ ഓഫീസിലെ തന്ത്രകാര്യങ്ങളുടെ മന്ത്രി അലി അല് തവാദിയെ നിയമിച്ചതായി ഖത്തര് ഇന്റര്നാഷണല് മീഡിയ ഓഫീസ് അറിയിച്ചു. പ്രാദേശിക സമാധാന ശ്രമങ്ങളില് ഖത്തര് സജീവ പങ്ക് വഹിച്ചുവരുന്നതിന്റെ ഭാഗമായാണ് ഈ നിയമനം. ഇസ്രായേല് ഹമാസ് മധ്യസ്ഥത ഉള്പ്പെടെ സംഘര്ഷം കുറയ്ക്കാനും ദീര്ഘകാല സമാധാനം ഉറപ്പാക്കാനും ഖത്തര് അന്താരാഷ്ട്ര പങ്കാളികളുമായി ചേര്ന്ന് പ്രവര്ത്തിച്ചുവരികയാണ്. ഗസയിലെ സ്ഥിരത, നല്ല ഭരണകൂടം, ജനങ്ങളുടെ ദീര്ഘകാല സമൃദ്ധി എന്നിവ ലക്ഷ്യമിട്ട അന്താരാഷ്ട്ര ശ്രമങ്ങള്ക്ക് പിന്തുണ നല്കുന്നതാണ് നിയമനത്തിന്റെ ലക്ഷ്യം.
മധ്യസ്ഥത ചര്ച്ചകളില് നിര്ണായക പങ്കുവഹിച്ച അലി അല് തവാദി, ബന്ദികളുടെ മോചനം, മാനവിക സഹായം ഗസയിലെത്തിക്കല്, വെടിനിര്ത്തല് കരാറുകള് എന്നിവയ്ക്ക് സഹായകമായ സംഭാഷണങ്ങളില് നേതൃത്വം നല്കി. അമേരിക്കന് പ്രസിഡന്റ് ഡോണള്ഡ് ട്രംപിന്റെ യുദ്ധാവസാനത്തിനായുള്ള 20-പോയിന്റ് പദ്ധതിയിലേക്കുള്ള ഖത്തറിന്റെ സംഭാവനയിലും അദ്ദേഹം പ്രധാന പങ്ക് വഹിച്ചു. പുതിയ നിയമനത്തോടെ, ഗസ എക്സിക്യൂട്ടീവ് ബോര്ഡിലൂടെയും മറ്റ് അന്താരാഷ്ട്ര വേദികളിലൂടെയും ഖത്തറിന്റെ സമാധാന ശ്രമങ്ങള്ക്ക് അദ്ദേഹം തുടര്പിന്തുണ നല്കും.
Related News
