ഹായില്: സാഹസികതയുടെയും കരുത്തിന്റെയും പുതിയ ചരിത്രം കുറിച്ച് സൗദി അറേബ്യയിലെ ഹായില് പ്രവിശ്യ ഗിന്നസ് ലോക റെക്കോര്ഡിലേക്ക്. ലോകത്തിലെ ഏറ്റവും വലിയ ഓഫ്-റോഡ് പ്രൊഡക്ഷന് കാര് വ്യൂഹം (largest-ever off-road production car convoy) അണിനിരത്തിയാണ് ഹായില് ഈ നേട്ടം സ്വന്തമാക്കിയത്. മുന്പ് ഓസ്ട്രേലിയയില് നടന്ന 449 വാഹനങ്ങളുടെ റെക്കോര്ഡാണ് 501 വാഹനങ്ങളുമായി സൗദി തിരുത്തിക്കുറിച്ചത്.
ഹായില് നഗരത്തില് നിന്ന് 42 കിലോമീറ്റര് വടക്കുപടിഞ്ഞാറായി അജ പര്വതനിരകളാല് ചുറ്റപ്പെട്ട തുവാരന് പ്രദേശത്തായിരുന്നു പ്രകടനം. മണല്ക്കുന്നുകള് നിറഞ്ഞ ഏഴ് കിലോമീറ്റര് ദൈര്ഘ്യമുള്ള ദുര്ഘടമായ പാതയിലൂടെയാണ് വാഹനങ്ങള് സഞ്ചരിച്ചത്. സൗദി അറേബ്യയുടെ വിവിധ ഭാഗങ്ങളില് നിന്നും മറ്റ് ഗള്ഫ് രാജ്യങ്ങളില് നിന്നുമുള്ള നൂറുകണക്കിന് ആളുകള് പരിപാടിയില് പങ്കെടുത്തു. പരിചയസമ്പന്നരായ ഡ്രൈവര്മാര്ക്കൊപ്പം ഓഫ്-റോഡ് യാത്രകള് ഇഷ്ടപ്പെടുന്ന തുടക്കക്കാരും കുടുംബങ്ങളും സുഹൃദ്സംഘങ്ങളും ഈ അപൂര്വ്വ നിമിഷത്തിന് സാക്ഷ്യം വഹിക്കാനെത്തി.
സൗദി ഭരണകൂടത്തിന്റെ പിന്തുണയും ഹായിലിലെ യുവാക്കളുടെ ആവേശവുമാണ് ഈ വലിയ നേട്ടത്തിന് പിന്നിലെന്ന് ഹായില് ഗവര്ണറും ഡെവലപ്മെന്റ് അതോറിറ്റി ചെയര്മാനുമായ പ്രിന്സ് അബ്ദുല് അസീസ് ബിന് സാദ് ബിന് അബ്ദുല് അസീസ് പറഞ്ഞു. ഹായിലിനെ ലോകത്തിലെ പ്രധാന മരുഭൂമി സാഹസിക ടൂറിസം കേന്ദ്രമായി മാറ്റാന് ഈ റെക്കോര്ഡ് സഹായിക്കുമെന്ന് ഹായില് റീജിയണ് ഡെവലപ്മെന്റ് അതോറിറ്റി സി.ഇ.ഒ ഒമര് അബ്ദുള്ള അല് അബ്ദുല് ജബ്ബാര് വ്യക്തമാക്കി.
സൗദി ടൂറിസം അതോറിറ്റിയും ഹായില് റീജിയണ് ഡെവലപ്മെന്റ് അതോറിറ്റിയും ചേര്ന്നാണ് പരിപാടി സംഘടിപ്പിച്ചത്. കിംഗ് സല്മാന് ബിന് അബ്ദുല് അസീസ് റോയല് റിസര്വ് ഡെവലപ്മെന്റ് അതോറിറ്റി, കള്ച്ചര് ഹൗസ് എന്നിവരായിരുന്നു പ്രായോജകര്. സൗദി ഓട്ടോമൊബൈല് ആന്ഡ് മോട്ടോര്സൈക്കിള് ഫെഡറേഷന് ഉള്പ്പെടെ 14 സര്ക്കാര് സ്ഥാപനങ്ങളുടെ ഏകോപനവും പരിപാടിക്കുണ്ടായിരുന്നു. ഓഫ്-റോഡ് റാലിക്കൊപ്പം വൈവിധ്യമാര്ന്ന സാംസ്കാരിക-കലാ പരിപാടികളും കാണികള്ക്കായി ഒരുക്കിയിരുന്നു.
ഹായിലിലെ തുവാരന് മണല്ക്കുന്നുകളില് 501 വാഹനങ്ങള് ഒരേസമയം അണിനിരന്നത് കേവലം ഒരു കൂടിച്ചേരലല്ല, മറിച്ച് കൃത്യമായ പ്ലാനിംഗും സാങ്കേതിക മികവും ഒത്തുചേര്ന്ന ഒരു ഓപ്പറേഷനായിരുന്നു. ഗിന്നസ് നിബന്ധനകള് പ്രകാരം 'പ്രൊഡക്ഷന് കാറുകള്' മാത്രമാണ് ഇതില് പങ്കെടുത്തത്. അതായത്, ഫാക്ടറിയില് നിന്ന് പുറത്തിറങ്ങുന്ന സാധാരണ ഓഫ്-റോഡ് വാഹനങ്ങള്. പ്രത്യേകമായി എന്ജിന് മോഡിഫിക്കേഷന് വരുത്തിയ റേസിംഗ് കാറുകള്ക്ക് പകരം സാധാരണക്കാര് ഉപയോഗിക്കുന്ന ഫോര്-വീല് ഡ്രൈവ് വാഹനങ്ങളാണ് റെക്കോര്ഡ് നേട്ടത്തിനായി ഉപയോഗിച്ചത്. അജ പര്വതനിരകളോട് ചേര്ന്നുള്ള മൃദുവായ മണല്ക്കുന്നുകളുള്ള ഏഴു കിലോമീറ്റര് ദൂരമാണ് ഇതില് പങ്കെുത്തവര് താണ്ടിയത്. മണലില് താഴ്ന്നുപോകാതിരിക്കാന് വാഹനങ്ങളുടെ ടയര് പ്രഷര് 15-18 PSI വരെയായി കുറച്ചാണ് ഉപയോഗിച്ചത്.
501 വാഹനങ്ങള് ഒരേസമയം ചലിക്കുമ്പോള് അവ തമ്മിലുള്ള അകലം പാലിക്കുക എന്നത് വലിയൊരു വെല്ലുവിളിയാണ്. വാഹനങ്ങള്ക്കിടയില് നിശ്ചിത ഗ്യാപ്പ് നിലനിര്ത്താന് സൗദി ഓട്ടോമൊബൈല് ആന്ഡ് മോട്ടോര്സൈക്കിള് ഫെഡറേഷന് അംഗങ്ങളുടെ സാങ്കേതിക നിര്ദ്ദേശങ്ങള് പാലിക്കപ്പെട്ടു. വാഹനവ്യൂഹം മുടങ്ങാതെ നീങ്ങുന്നുണ്ടെന്ന് ഉറപ്പുവരുത്താന് ഡ്രോണ് നിരീക്ഷണവും കമ്യൂണിക്കേഷന് റേഡിയോകളും ഉപയോഗിച്ചു.
ഓരോ വാഹനത്തിലും ആവശ്യമായ സുരക്ഷാ സജ്ജീകരണങ്ങള് ഉണ്ടെന്ന് ഉറപ്പുവരുത്തിയ ശേഷമാണ് ട്രാക്കിലേക്ക് പ്രവേശനം അനുവദിച്ചത്. തുടക്കക്കാര്ക്കും കുടുംബങ്ങള്ക്കും സുരക്ഷിതമായി പങ്കെടുക്കാവുന്ന രീതിയില് ട്രാക്കിന്റെ കാഠിന്യം ക്രമീകരിച്ചിരുന്നു.
