റിയാദ്: സൗദി അറേബ്യയിലെ സ്വകാര്യ മേഖലയില്‍ സ്വദേശിവല്‍ക്കരണവും തൊഴില്‍ പരിശീലനവും ശക്തമാക്കുന്നതില്‍ റെക്കോര്‍ഡ് നേട്ടവുമായി ഹ്യൂമന്‍ റിസോഴ്സ് ഡെവലപ്മെന്റ് ഫണ്ട് (HADAF). 2025ല്‍ മാത്രം 5.6 ലക്ഷത്തിലധികം (560,000) സൗദി പൗരന്മാര്‍ക്ക് വിവിധ സ്വകാര്യ സ്ഥാപനങ്ങളില്‍ തൊഴില്‍ ലഭ്യമാക്കാന്‍ ഫണ്ടിന്റെ പദ്ധതികളിലൂടെ സാധിച്ചു. 2024-നെ അപേക്ഷിച്ച് തൊഴിലവസരങ്ങളുടെ എണ്ണത്തില്‍ 29 ശതമാനം വര്‍ധനവാണ് രേഖപ്പെടുത്തിയിരിക്കുന്നത്.

തൊഴില്‍ പരിശീലനം, ശാക്തീകരണം, മാര്‍ഗനിര്‍ദ്ദേശം എന്നിവയ്ക്കായി കഴിഞ്ഞ വര്‍ഷം 8.296 ബില്യണ്‍ സൗദി റിയാലിലധികം ഹദഫ് ചിലവഴിച്ചു. രണ്ട് ദശലക്ഷത്തിലധികം സൗദി പൗരന്മാര്‍ ഈ പദ്ധതികളുടെ ഗുണഭോക്താക്കളായി. വളര്‍ന്നുവരുന്ന പുതിയ തൊഴില്‍ മേഖലകളിലെ ആവശ്യങ്ങള്‍ക്കനുസരിച്ച് സ്വദേശി ഉദ്യോഗാര്‍ത്ഥികളെ പ്രാപ്തരാക്കുന്നതിനും അവരുടെ തൊഴില്‍ നൈപുണ്യം വര്‍ധിപ്പിക്കുന്നതിനും ഈ നിക്ഷേപം വലിയ പങ്കുവഹിച്ചു.

സ്ഥിരമായ തൊഴിലവസരങ്ങള്‍ സൃഷ്ടിക്കുന്നതിനും ദേശീയ പ്രതിഭകളുടെ ഉല്‍പ്പാദനക്ഷമത വര്‍ധിപ്പിക്കുന്നതിനുമായി പദ്ധതികള്‍ ഇനിയും വിപുലീകരിക്കുമെന്ന് ഹദഫ് ഡയറക്ടര്‍ ജനറല്‍ തുര്‍ക്കി അല്‍-ജവിനി പറഞ്ഞു. നൂതനമായ ഡിജിറ്റല്‍ സംവിധാനങ്ങളും തന്ത്രപരമായ പങ്കാളിത്തവും വഴി സൗദി പൗരന്മാരെ പ്രാദേശികവും ആഗോളവുമായ തൊഴില്‍ വിപണിയില്‍ കൂടുതല്‍ മത്സരസജ്ജരാക്കുകയാണ് ലക്ഷ്യമെന്നും അദ്ദേഹം കൂട്ടിച്ചേര്‍ത്തു.

5,60,000 പേര്‍ക്കാണ് കഴിഞ്ഞ വര്‍ഷം തൊഴില്‍ ലഭിച്ചത്. ഇത് മുന്‍ വര്‍ഷത്തെ അപേക്ഷിച്ച് 29% കൂടുതലാണ്. 8.296 ബില്യണ്‍ റിയാലാണ് ഇതിനായി ചെലവഴിച്ചത്.