റിയാദ്- സൗദി അറേബ്യയിലെ വിവിധ നഗരങ്ങളിലായി പ്രവര്ത്തിക്കുന്ന 74 സ്വകാര്യ സ്കൂളുകളുടെ ലൈസന്സ് വിദ്യാഭ്യാസ മന്ത്രാലയം റദ്ദാക്കി. വിദ്യാര്ത്ഥികളുടെ സുരക്ഷ, വിദ്യാഭ്യാസ നിലവാരം, ഔദ്യോഗിക നിയമങ്ങളോടുള്ള പ്രതിബദ്ധത എന്നിവയില് വീഴ്ച വരുത്തിയെന്ന് കണ്ടെത്തിയതിനെ തുടര്ന്നാണ് ഈ കര്ശന നടപടി.
സ്കൂളുകള് അടച്ചുപൂട്ടാനുള്ള പ്രധാന കാരണങ്ങള് താഴെ പറയുന്നവയാണ്:
-സിവില് ഡിഫന്സ് സര്ട്ടിഫിക്കറ്റ് ഉള്പ്പെടെയുള്ള അത്യാവശ്യ സുരക്ഷാ മാനദണ്ഡങ്ങള് പാലിച്ചില്ല.
-കാലാവധിയുള്ള പ്രവര്ത്തന ലൈസന്സ് ഇല്ലാതെയാണ് പല സ്ഥാപനങ്ങളും പ്രവര്ത്തിച്ചിരുന്നത്.
-വിദ്യാഭ്യാസ ഗുണനിലവാരത്തിലും ഭരണപരമായ ചട്ടങ്ങളിലും വീഴ്ചകള് കണ്ടെത്തി.
ലൈസന്സ് റദ്ദാക്കിയ സ്കൂളുകളിലെ വിദ്യാര്ത്ഥികളുടെ പഠനം തടസ്സപ്പെടാതിരിക്കാന് മന്ത്രാലയം പ്രത്യേക ക്രമീകരണങ്ങള് ഏര്പ്പെടുത്തിയിട്ടുണ്ട്. ഈ വിദ്യാര്ത്ഥികളെ നേരിട്ട് സര്ക്കാര് സ്കൂളുകളിലേക്ക് മാറ്റുന്നതാണ്. കൂടാതെ, രക്ഷിതാക്കള്ക്ക് ഇഷ്ടമുള്ള മറ്റ് സ്വകാര്യ സ്കൂളുകള് തിരഞ്ഞെടുക്കാനുള്ള അവസരവും മന്ത്രാലയം നല്കുന്നുണ്ട്. വിദ്യാര്ത്ഥികളുടെ താമസസ്ഥലത്തിന് അടുത്തുള്ള മികച്ച വിദ്യാഭ്യാസ സൗകര്യം ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.
നേരത്തെ പലതവണ മുന്നറിയിപ്പുകള് നല്കിയിട്ടും നിയമലംഘനങ്ങള് തിരുത്താന് തയ്യാറാകാത്ത സാഹചര്യത്തിലാണ് മന്ത്രാലയം ഇപ്പോള് നടപടിയെടുത്തത്. കഴിഞ്ഞ കാലയളവില് നടത്തിയ പരിശോധനകളില് മിക്ക സ്കൂളുകളും ലൈസന്സ് പുതുക്കുന്നതിലോ പുതിയ സുരക്ഷാ മാനദണ്ഡങ്ങള് നടപ്പിലാക്കുന്നതിലോ പരാജയപ്പെട്ടതായി അധികൃതര് വ്യക്തമാക്കി.
Related News
