റിയാദ്- റിയാദില് നടന്നുവരുന്ന 2026-ലെ സൗദി മീഡിയ ഫോറത്തില് ശ്രദ്ധേയമായ പ്രഖ്യാപനവുമായി സൗദി വുമണ് ലീഡേഴ്സ് നെറ്റ്വര്ക്ക് ചെയര്പേഴ്സണ് അമീറ അല് തവീല്. 220-ഓളം വനിതാ നേതാക്കള് അംഗങ്ങളായ ഈ ശൃംഖല, തൊഴില് വിപണിയില് സ്ത്രീ ശാക്തീകരണം ലക്ഷ്യമിട്ട് 30 ബില്യണ് റിയാലിലധികം (ഏകദേശം 3000 കോടി റിയാല്) നിക്ഷേപം നടത്തുമെന്ന് അവര് വെളിപ്പെടുത്തി. 'ഭാവി രൂപപ്പെടുത്തുന്ന വനിതാ നേതാക്കള്: സാംസ്കാരിക പരിവര്ത്തനത്തില് സ്ത്രീകളുടെ പങ്ക്' എന്ന സെഷനില് സംസാരിക്കുകയായിരുന്നു അവര്.
രാജ്യത്തെ സാംസ്കാരികവും സ്ഥാപനപരവുമായ മാറ്റങ്ങള്ക്ക് നേതൃത്വം നല്കുന്നതില് സ്ത്രീകള്ക്കുള്ള പങ്കിനെക്കുറിച്ചും സെഷന് വിശദമായി ചര്ച്ച ചെയ്തു. ഭരണതലത്തിലും നേതൃസ്ഥാനങ്ങളിലും സ്ത്രീകളുടെ സാന്നിധ്യം സ്വാഭാവികമായ ഒന്നായി മാറണമെന്നും അതിനായി 'ശാക്തീകരണം' എന്ന പ്രത്യേക വിശേഷണത്തിന്റെ ആവശ്യമില്ലാത്ത സാഹചര്യം വരണമെന്നും അമീറ അല് തവീല് പറഞ്ഞു. എങ്കിലും, തൊഴിലിടങ്ങളില് ഇപ്പോഴും സ്ത്രീകള് വെല്ലുവിളികള് നേരിടുന്നുണ്ടെന്നും പല ഭരണസമിതികളിലും വനിതാ പ്രതിനിധ്യം കുറവാണെന്നും അവര് ചൂണ്ടിക്കാട്ടി.
കുടുംബകാര്യ കൗണ്സില് ജനറല് സെക്രട്ടറി ഡോ. മൈമൂന അല് ഖലീല്, സൗദിയില് സ്ത്രീ ശാക്തീകരണം എന്നത് കേവലം അവസരങ്ങള് നല്കുന്നതില് മാത്രം ഒതുങ്ങുന്നില്ലെന്നും അത് വിജയങ്ങളെ അടിസ്ഥാനമാക്കിയുള്ള ഒന്നായി മാറിയെന്നും വ്യക്തമാക്കി. സൗദി വിഷന് 2030-ന്റെ ഭാഗമായി തൊഴില് വിപണിയിലെ പ്രധാന പങ്കാളികളായി സ്ത്രീകള് മാറിയിട്ടുണ്ട്. കുട്ടിക്കാലം മുതല് ഉചിതമായ അറിവും അവസരങ്ങളും നല്കി നേതൃപാടവമുള്ള സ്ത്രീകളെ വളര്ത്തിയെടുക്കുന്നതില് കുടുംബങ്ങള്ക്കും വിദ്യാഭ്യാസത്തിനും നിര്ണ്ണായക പങ്കുണ്ടെന്നും അവര് കൂട്ടിച്ചേര്ത്തു.
സ്ത്രീ ശാക്തീകരണം പുരുഷന്മാരുമായുള്ള പങ്കാളിത്തത്തിലൂടെയാണ് പൂര്ണ്ണമാകുന്നത് എന്ന് എംബിസി അക്കാദമി സിഇഒ സൈനബ് അബു അല് സമാഹ് അഭിപ്രായപ്പെട്ടു. സ്ഥാപനങ്ങളിലെ സ്ത്രീ ശാക്തീകരണ സമിതികള് വെല്ലുവിളികള് പരിഹരിക്കാന് പ്രാപ്തിയുള്ള തീരുമാനങ്ങള് എടുക്കുന്നവരായിരിക്കണം. ഇത്തരം സാംസ്കാരിക പരിവര്ത്തനങ്ങള് കേവലം പ്രഖ്യാപനങ്ങളില് ഒതുങ്ങാതെ സമൂഹത്തിന്റെ അടിത്തട്ടില് വേരൂന്നിയ ഒന്നായി മാറണമെന്നും അവര് പറഞ്ഞു.
മാധ്യമങ്ങള്, കുടുംബം, വിദ്യാഭ്യാസം എന്നിവയുടെ സംയോജിത പ്രവര്ത്തനത്തിലൂടെ സൗദി വനിതകളെ നേതൃനിരയിലേക്ക് ഉയര്ത്തുകയാണ് ഈ നീക്കങ്ങളുടെ ലക്ഷ്യം. 30 ബില്യണ് റിയാലിന്റെ ഈ വന് നിക്ഷേപം രാജ്യത്തെ സാമ്പത്തിക സാമൂഹിക രംഗങ്ങളില് വലിയ മാറ്റങ്ങള് കൊണ്ടുവരുമെന്നാണ് പ്രതീക്ഷിക്കുന്നത്.
Related News
