റിയാദ്: ഈ വര്‍ഷത്തെ ഹജ്ജ് തീര്‍ഥാടനത്തിനായുള്ള വിസ വിതരണം ഫെബ്രുവരി 8 (ഞായറാഴ്ച) മുതല്‍ ആരംഭിക്കുമെന്ന് സൗദി ഹജ്ജ്-ഉംറ മന്ത്രാലയം അറിയിച്ചു. തീര്‍ഥാടകര്‍ക്ക് സുഗമവും സുരക്ഷിതവുമായ യാത്രാസൗകര്യങ്ങള്‍ ഉറപ്പുവരുത്തുന്നതിനായി നാല് മാസം മുമ്പ് തന്നെ വിസ നടപടികള്‍ പൂര്‍ത്തിയാക്കാനാണ് മന്ത്രാലയത്തിന്റെ തീരുമാനം.

ഹജ്ജ് വേളയിലെ തിരക്കും സാങ്കേതിക തടസ്സങ്ങളും ഒഴിവാക്കുക എന്ന ലക്ഷ്യത്തോടെയാണ് നടപടികള്‍ വേഗത്തിലാക്കിയത്. കൂടാതെ താമസസൗകര്യം, ഗതാഗതം എന്നിവയുമായി ബന്ധപ്പെട്ട കരാറുകള്‍ മുന്‍കൂട്ടി ഉറപ്പാക്കാനും വിസകള്‍ നേരത്തെ ലഭിക്കുന്നത് തീര്‍ഥാടകര്‍ക്ക് അവരുടെ യാത്ര കൃത്യമായി പ്ലാന്‍ ചെയ്യാനും സഹായിക്കും. അതോടൊപ്പം ലോകമെമ്പാടുമുള്ള തീര്‍ഥാടകര്‍ക്ക് ഒരേസമയം മികച്ച സേവനം നല്‍കാന്‍ മന്ത്രാലയത്തിന് സാധിക്കുകയും ചെയ്യും.

വിദേശ തീര്‍ഥാടകരുടെ സൗകര്യാര്‍ത്ഥം വന്‍പിച്ച ഒരുക്കങ്ങളാണ് മക്കയിലും മദീനയിലുമായി പൂര്‍ത്തിയായി വരുന്നത്. നിലവില്‍ 75,000 തീര്‍ഥാടകര്‍ രജിസ്റ്റര്‍ ചെയ്തിട്ടുണ്ട്. ഇതില്‍ 30,000 പേര്‍ സ്വന്തം രാജ്യങ്ങളില്‍ നിന്ന് തന്നെ പാക്കേജുകള്‍ ബുക്ക് ചെയ്തു കഴിഞ്ഞു. പുണ്യസ്ഥലങ്ങളില്‍ വിദേശികള്‍ക്കായി 485 ക്യാമ്പുകള്‍ അനുവദിച്ചു. ഹജ്ജ് ഏകോപനത്തിനായി 73 ഓഫീസുകളുടെ അടിസ്ഥാന കരാറുകള്‍ ഇതിനകം പൂര്‍ത്തിയായി. യാതൊരുവിധ പ്രതിസന്ധികളുമില്ലാതെ തീര്‍ഥാടനം പൂര്‍ത്തിയാക്കാന്‍ ആവശ്യമായ എല്ലാ ക്രമീകരണങ്ങളും സജ്ജമാണെന്ന് മന്ത്രാലയം വ്യക്തമാക്കി.