ജിദ്ദ- മനുഷ്യന് മനുഷ്യനെ തിരിച്ചറിയുന്നത് അവന്റെ വേദനകളിലൂടെയാണ്. ആ വേദനകളില് ഏറ്റവും തീക്ഷ്ണമായ 'വിശപ്പ്' എന്ന വികാരത്തിന് ജാതിയോ, മതമോ, വര്ണ്ണമോ, അതിര്ത്തിയോ ഇല്ലെന്ന് ലോകത്തോട് വിളിച്ചുപറയുകയാണ് മലബാര് അടുക്കള. 'ഭൂമിയില് ആരും വിശപ്പോടെ ഉറങ്ങരുത്' എന്ന മഹത്തായ സന്ദേശം ഹൃദയത്തിലേറ്റിയ ഒരു കൂട്ടം പ്രവാസികളുടെയും നാട്ടുകാരുടെയും കൂട്ടായ്മ, പട്ടിണിക്കെതിരായ പോരാട്ടത്തില് ഒരു പുതിയ ചരിത്രം രചിക്കുകയാണ്.
പ്രവാസ ലോകത്തെ കഠിനാധ്വാനത്തിനിടയിലും മറ്റൊരാളുടെ വയറുനിറയ്ക്കാന് സമയം കണ്ടെത്തുന്നവരാണ് മലബാര് അടുക്കളയുടെ കരുത്ത്. ഈ വര്ഷത്തെ 'ഒരു നേരത്തെ ആഹാരം' പദ്ധതിക്ക് തുടക്കമിട്ടത് ജിദ്ദയില് നിന്നാണ്. വിശ്രമവേളകള് മാറ്റിവെച്ച്, പ്രത്യേകിച്ച് വനിതകളുടെ നേതൃത്വത്തില് നടന്ന ഈ പ്രവര്ത്തനം പ്രവാസി സമൂഹത്തിന് വലിയ മാതൃകയായി.
ജിദ്ദയിലെ ഉപ്പുപാടം പ്രദേശത്തും ബലദിയ ക്യാമ്പിലുമായി നടന്ന വിതരണത്തില് 700-ലധികം ഭക്ഷണകിറ്റുകളാണ് വിതരണം ചെയ്തത്. മന്ദി ഉള്പ്പെടെയുള്ള വിഭവസമൃദ്ധമായ ഭക്ഷണം നല്കിയപ്പോള്, ലഭിച്ചവരുടെ മുഖത്ത് വിരിഞ്ഞ പുഞ്ചിരിയായിരുന്നു ഈ കൂട്ടായ്മയ്ക്കുള്ള ഏറ്റവും വലിയ പ്രതിഫലം. ജിദ്ദ കോര്ഡിനേറ്ററും പരിപാടിയുടെ മോഡറേറ്ററുമായ കുബ്ര ലത്തീഫ് നേതൃത്വം നല്കിയ പരിപാടിയില് എക്സിക്യൂട്ടീവ് അംഗങ്ങളായ
ഷംസീറ നജ്മുദീന്, ആശിക റംനാസ്, സാഹിറ സവാദ്, ശബ്നം ബാബു, ഹസീന അഫ്സല്, സുനീറ, സുറുമി, മുംതാസ്, ഫൈസ ഗഫൂര്, ലത്തീഫ്, ഷാഹിദ ജലീല് ബാദുഷ, കൂടാതെ ജ്യോതി, അമീന എന്നിവരും പങ്കെടുത്തു.
ജിദ്ദയില് തെളിഞ്ഞ ആ കാരുണ്യത്തിന്റെ നാളം വൈകാതെ കേരളത്തിലെ തെരുവുകളിലേക്കും വ്യാപിച്ചു. കാസര്ഗോഡ് മുതല് തിരുവനന്തപുരം വരെയുള്ള എല്ലാ ജില്ലകളിലും മലബാര് അടുക്കളയുടെ സേവനം എത്തിച്ചേര്ന്നു. വെറുമൊരു ഭക്ഷണവിതരണത്തിനപ്പുറം, അര്ഹരായവരെ നേരിട്ട് കണ്ടെത്തി അവരുടെ അന്തസ്സ് കെടാതെ ആഹാരം നല്കാന് ഇവര് ശ്രദ്ധിച്ചു.
സര്ക്കാര് ആശുപത്രികള്, പെയിന് ആന്ഡ് പാലിയേറ്റീവ് കെയര് യൂണിറ്റുകള്, വൃദ്ധസദനങ്ങള്, തെരുവോരങ്ങള് പ്രധാന കേന്ദ്രങ്ങള് എന്നിവിടങ്ങളിലായിരുന്നു വിതരണം.
ലോകമെമ്പാടുമുള്ള മലബാര് അടുക്കള അംഗങ്ങളുടെ ഐക്യമാണ് ഈ പദ്ധതിയുടെ നട്ടെല്ല്. ചെയര്മാന് മുഹമ്മദ് അലി ചക്കൊത്തിന്റെ നേതൃത്വത്തില്, വിദേശത്തുള്ള അംഗങ്ങള് നല്കുന്ന പിന്തുണയും നാട്ടിലെ അംഗങ്ങളുടെ പ്രവര്ത്തന സന്നദ്ധതയും ചേരുമ്പോള് അത് ലോകം ശ്രദ്ധിക്കുന്ന ഒരു സോഷ്യല് മോഡലായി മാറുന്നു.
മുന്വര്ഷങ്ങളിലെ അനുഭവങ്ങള് പാഠമാക്കി, കൂടുതല് ചിട്ടയോടെയും സ്നേഹത്തോടെയും ഈ വര്ഷവും പദ്ധതി വിജയിപ്പിക്കാന് ഇവര്ക്ക് സാധിച്ചു. സാമൂഹിക ഉത്തരവാദിത്വമെന്നത് വാക്കുകളില് ഒതുക്കാതെ പ്രവൃത്തിയില് കാണിച്ചുതരികയാണ് ഈ കൂട്ടായ്മ.
Related News
