റിയാദ്: ബ്രിട്ടീഷ് സിംഹാസനത്തിന്റെ അവകാശി പ്രിന്സ് വില്യം ആദ്യ ഔദ്യോഗിക സന്ദര്ശനത്തിനായി സൗദി അറേബ്യയിലെത്തി. റിയാദിലെത്തിയ അദ്ദേഹത്തിന് സൗദി കിരീടാവകാശി മുഹമ്മദ് ബിന് സല്മാന് രാജകുമാരന് ഉജ്ജ്വല സ്വീകരണം നല്കി. ഇരുരാജ്യങ്ങളും തമ്മിലുള്ള നൂറ്റാണ്ട് പഴക്കമുള്ള തന്ത്രപരമായ ബന്ധത്തിന്റെ പുതിയ അധ്യായമായാണ് ഈ സന്ദര്ശനം വിലയിരുത്തപ്പെടുന്നത്.
യുനെസ്കോയുടെ ലോക പൈതൃക പട്ടികയിലുള്ള ദിരിയയിലെ 'അല് തുരൈഫ്' പ്രദേശം കിരീടാവകാശി മുഹമ്മദ് ബിന് സല്മാന് പ്രിന്സ് വില്യമിന് ചുറ്റിക്കാണിച്ചുകൊടുത്തു. ആദ്യ സൗദി രാഷ്ട്രത്തിന്റെ ജന്മദേശമായ ഇവിടെ നജ്ദി വാസ്തുവിദ്യയുടെ വിസ്മയമായ കൊട്ടാരങ്ങളും പുരാതന നിര്മ്മിതികളും അദ്ദേഹം സന്ദര്ശിച്ചു. ഭരണകേന്ദ്രമായിരുന്ന ചരിത്രപ്രസിദ്ധമായ 'സല്വ കൊട്ടാരവും' സന്ദര്ശനത്തിന്റെ ഭാഗമായി.
ബ്രിട്ടീഷ് ഗവണ്മെന്റിന്റെ പ്രത്യേക താല്പ്പര്യപ്രകാരമാണ് പ്രിന്സ് വില്യം സൗദിയിലെത്തിയത്. സൗദി അറേബ്യയുമായുള്ള ബന്ധത്തിന് ബ്രിട്ടന് നല്കുന്ന മുന്ഗണനയാണ് ഈ സന്ദര്ശനത്തിലൂടെ വ്യക്തമാകുന്നത്. 'ബ്രിട്ടീഷ്-സൗദി രാജകുടുംബങ്ങള് തമ്മിലുള്ള ബന്ധത്തിന് ഏതാണ്ട് നൂറു വര്ഷത്തെ പഴക്കമുണ്ട്. രാഷ്ട്രീയത്തിനപ്പുറം അഗാധമായ ഒരു ആത്മബന്ധമാണിത്.' - മുന് ബ്രിട്ടീഷ് അംബാസഡര് സൈമണ് കോളിസ് പറഞ്ഞു.
പരിസ്ഥിതി സംരക്ഷണം, ഹരിത ഊര്ജ്ജം തുടങ്ങിയ മേഖലകളില് താല്പര്യമുള്ളവരാണ് ഇരു നേതാക്കളും എന്നത് നയതന്ത്ര ബന്ധത്തിന് കൂടുതല് കരുത്തേകും. പ്രതിരോധം, സുരക്ഷ, ഊര്ജ്ജം എന്നീ മേഖലകള്ക്ക് പുറമെ വിദ്യാഭ്യാസം, സംസ്കാരം, ആരോഗ്യം, കായികം തുടങ്ങിയ മേഖലകളിലും സഹകരണം വര്ദ്ധിപ്പിക്കാന് ഈ സന്ദര്ശനം ലക്ഷ്യമിടുന്നു.
സൗദി അറേബ്യയുടെ സാമൂഹിക മാറ്റങ്ങളെയും വിഷന് 2030-ലൂടെയുള്ള സാമ്പത്തിക പരിവര്ത്തനത്തെയും ബ്രിട്ടന് വലിയ ആവേശത്തോടെയാണ് നോക്കിക്കാണുന്നത്. പ്രത്യേകിച്ചും സ്ത്രീ ശാക്തീകരണത്തിലും വിനോദസഞ്ചാര മേഖലയിലും സൗദി കൈവരിച്ച നേട്ടങ്ങള് പാശ്ചാത്യ രാജ്യങ്ങള്ക്കിടയില് വലിയ ചര്ച്ചയായിട്ടുണ്ട്. എലിസബത്ത് രാജ്ഞിയും ചാള്സ് രാജാവും മുന്പ് പലതവണ സൗദി സന്ദര്ശിച്ചിട്ടുണ്ട്. ആ പാരമ്പര്യം പ്രിന്സ് വില്യം തുടരുന്നു.
കാലാവസ്ഥാ വ്യതിയാനം ഉള്പ്പെടെയുള്ള ആഗോള വിഷയങ്ങളില് സൗദിയുടെ നിലപാടുകള്ക്ക് ബ്രിട്ടന് വലിയ പ്രാധാന്യമാണ് നല്കുന്നത്. റിയാദ് ആസ്ഥാനമായി പ്രവര്ത്തനം തുടങ്ങുന്ന ബ്രിട്ടീഷ് കമ്പനികളുടെ എണ്ണം വര്ദ്ധിക്കുന്നത് സാമ്പത്തിക ബന്ധത്തിന്റെ ആഴം കൂട്ടുന്നതാണ്.
തിങ്കളാഴ്ച വൈകുന്നേരം റിയാദിലെത്തിയ പ്രിന്സ് വില്യമിനെ റിയാദ് ഡെപ്യൂട്ടി ഗവര്ണര് പ്രിന്സ് മുഹമ്മദ് ബിന് അബ്ദുള്റഹ്മാന് ബിന് അബ്ദുള് അസീസ്, ബ്രിട്ടീഷ് അംബാസഡര് സ്റ്റീഫന് ഹിച്ചന് എന്നിവര് ചേര്ന്ന് സ്വീകരിച്ചു. മൂന്ന് ദിവസത്തെ സന്ദര്ശനത്തിനായാണ് അദ്ദേഹം രാജ്യത്തെത്തിയിരിക്കുന്നത്.
