മലപ്പുറം: ലഹരിക്കെതിരെ വിദ്യാര്ഥികള്ക്കിടയില് ബോധവല്ക്കരണ ക്ലാസുകള് നയിക്കുന്ന പ്രശസ്ത മോട്ടിവേഷന് സ്പീക്കറും മുന് പോലീസ് ഉദ്യോഗസ്ഥനുമായ ഫിലിപ്പ് മമ്പാട് പോക്സോ കേസില് അറസ്റ്റിലായി. 16 വയസ്സുകാരിയെ പീഡിപ്പിച്ചെന്ന പരാതിയിലാണ് ഇയാളെ നിലമ്പൂര് പോലീസ് കസ്റ്റഡിയിലെടുത്തത്.
മാനസിക വെല്ലുവിളി നേരിടുന്ന പെണ്കുട്ടിയെ കൗണ്സിലിങ്ങിനായി ഫിലിപ്പ് മമ്പാടിന്റെ അടുത്തെത്തിച്ചപ്പോഴാണ് പീഡനം നടന്നതെന്നാണ് വിവരം. 2022 സെപ്റ്റംബറിലായിരുന്നു കേസിനാസ്പദമായ സംഭവം. കാഞ്ഞങ്ങാടുള്ള ഒരു ഹോട്ടലില് വെച്ചും പിന്നീട് നിലമ്പൂരില് വെച്ചും ഇയാള് തന്നെ ലൈംഗികാതിക്രമത്തിന് ഇരയാക്കിയെന്ന് പെണ്കുട്ടി മൊഴി നല്കിയിട്ടുണ്ട്.
കുട്ടിയുടെ പെരുമാറ്റത്തില് മാറ്റം കണ്ടതിനെത്തുടര്ന്ന് രക്ഷിതാക്കള് വിവരം ചോദിച്ചറിഞ്ഞതോടെയാണ് സംഭവം പുറത്തറിയുന്നത്. തുടര്ന്ന് രക്ഷിതാക്കള് കോഴിക്കോട് പോലീസില് പരാതി നല്കുകയായിരുന്നു. ഈ പരാതിയുടെ അടിസ്ഥാനത്തില് കോഴിക്കോട് പോലീസ് രജിസ്റ്റര് ചെയ്ത കേസ് പിന്നീട് നിലമ്പൂര് പോലീസിന് കൈമാറുകയും തുടര്ന്ന് അറസ്റ്റ് രേഖപ്പെടുത്തുകയുമായിരുന്നു.
സോഷ്യല് മീഡിയയില് ലക്ഷക്കണക്കിന് ഫോളോവേഴ്സുള്ള ഫിലിപ്പ് മമ്പാട്, ഇന്ഫ്ലുവന്സര് എന്ന നിലയില് വലിയ സ്വാധീനമുള്ള വ്യക്തിയായിരുന്നു. ലഹരിക്കെതിരെയും സാമൂഹിക തിന്മകള്ക്കെതിരെയും ഇയാള് പങ്കുവെച്ചിരുന്ന വീഡിയോകള്ക്ക് വലിയ പ്രചാരമുണ്ടായിരുന്നു. മുന്പ് പോലീസ് സേനയില് പ്രവര്ത്തിച്ചിരുന്ന ഇയാള് മോട്ടിവേഷന് ക്ലാസുകള്ക്കായി ജോലി രാജിവെക്കുകയായിരുന്നു. പ്രതിയെ കോടതിയില് ഹാജരാക്കി റിമാന്ഡ് ചെയ്യാനുള്ള നടപടികള് പോലീസ് സ്വീകരിച്ചുവരികയാണ്.
Related News
