.jpg)
റിയാദ്- പാകിസ്ഥാനില്നിന്നുള്ള സയാമീസ് ഇരട്ടകള് വേര്പെടുത്തല് ശസ്ത്രക്രിയക്കായി റിയാദിലെത്തി. സുഫിയാന്, യൂസഫ് എന്നീ ഇരട്ടക്കുട്ടികളെയാണ് തിരുഗേഹങ്ങളുടെ സേവകന് സല്മാന് രാജാവിന്റെയും കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന്റെയും പ്രത്യേക നിര്ദ്ദേശപ്രകാരം റിയാദിലേക്ക് കൊണ്ടുവന്നത്.
റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തില് എത്തിയ ഇരട്ടകളെയും കുടുംബത്തെയും ഉദ്യോഗസ്ഥര് സ്വീകരിച്ചു. തുടര്ന്ന് ഇവരെ മിനിസ്ട്രി ഓഫ് നാഷണല് ഗാര്ഡിന് കീഴിലുള്ള കിംഗ് അബ്ദുള്ള സ്പെഷ്യലിസ്റ്റ് ചില്ഡ്രന്സ് ഹോസ്പിറ്റലിലേക്ക് മാറ്റി. കുട്ടികളുടെ ആരോഗ്യസ്ഥിതി സസൂക്ഷ്മം നിരീക്ഷിച്ച ശേഷം വേര്പെടുത്തുന്നതിനുള്ള ശസ്ത്രക്രിയയുടെ സാധ്യത വിദഗ്ധ മെഡിക്കല് സംഘം പരിശോധിക്കും.
സൗദി കണ്ജോയിന്റ് ട്വിന്സ് സെപ്പറേഷന് പ്രോഗ്രാമിന്റെ മെഡിക്കല് ആന്ഡ് സര്ജിക്കല് ടീം തലവനും കിംഗ് സല്മാന് ഹ്യൂമാനിറ്റേറിയന് എയ്ഡ് ആന്ഡ് റിലീഫ് സെന്റര് (കെ.എസ്. റിലീഫ്) ജനറല് സൂപ്പര്വൈസറുമായ ഡോ. അബ്ദുള്ള ബിന് അബ്ദുല് അസീസ് അല് റബീഹ സൗദി ഭരണകൂടത്തിന് നന്ദി അറിയിച്ചു. ലോകത്തിന്റെ വിവിധ ഭാഗങ്ങളില് നിന്നുള്ള സങ്കീര്ണ്ണമായ ആരോഗ്യപ്രശ്നങ്ങള് നേരിടുന്ന കുട്ടികളെ പരിപാലിക്കുന്നതില് സൗദി അറേബ്യ നല്കുന്ന മുന്ഗണനയുടെ തെളിവാണ് ഈ നടപടിയെന്ന് അദ്ദേഹം വ്യക്തമാക്കി.
സയാമീസ് ഇരട്ടകളെ വേര്പെടുത്തുന്ന കാര്യത്തില് സൗദി അറേബ്യന് മെഡിക്കല് സംഘം വര്ഷങ്ങളായി ആര്ജ്ജിച്ചെടുത്ത അറിവും അനുഭവസമ്പത്തും ആഗോളതലത്തില് തന്നെ വലിയ അംഗീകാരമാണ് നേടിയിട്ടുള്ളതെന്ന് ഡോ. അല് റബീഹ പറഞ്ഞു. ലോകമെമ്പാടുമുള്ള സമാനമായ അവസ്ഥയിലുള്ള കുട്ടികള്ക്കും അവരുടെ കുടുംബങ്ങള്ക്കും വലിയൊരു പ്രതീക്ഷയുടെ കേന്ദ്രമായി ഇന്ന് സൗദി അറേബ്യ മാറിയിരിക്കുന്നുവെന്നും അദ്ദേഹം കൂട്ടിച്ചേര്ത്തു.
സയാമീസ് ഇരട്ടകളെ വേര്പെടുത്തുന്നതിനുള്ള സൗദി ദേശീയ പദ്ധതി ഇത്തരത്തിലുള്ള സങ്കീര്ണ്ണ ശസ്ത്രക്രിയകളില് ലോകത്തിലെ തന്നെ ഏറ്റവും പ്രധാനപ്പെട്ട ഒന്നാണ്. സല്മാന് രാജാവിന്റെയും കിരീടാവകാശിയുടെയും മനുഷ്യത്വപരമായ ഇടപെടലുകള് രാജ്യത്തിന്റെ മെഡിക്കല് രംഗത്തെ നേതൃത്വപരമായ പങ്കിനെ കൂടുതല് ഉറപ്പിക്കുന്നു. വിവിധ രാജ്യങ്ങളില് നിന്നുള്ള നൂറിലധികം ഇരട്ടകളുടെ കേസുകള് ഇതിനകം തന്നെ ഈ പദ്ധതിയുടെ ഭാഗമായി പരിശോധിച്ചിട്ടുണ്ട്.
മക്കളുടെ കാര്യത്തില് അടിയന്തരമായി ഇടപെടുകയും അവരെ സൗദിയിലേക്ക് എത്തിക്കുകയും ചെയ്ത സൗദി ഭരണകൂടത്തോടും ജനങ്ങളോടും പാകിസ്ഥാനി കുടുംബം ഹൃദയം നിറഞ്ഞ നന്ദി അറിയിച്ചു. റിയാദില് ലഭിച്ച ഊഷ്മളമായ സ്വീകരണത്തിനും താമസം ഉള്പ്പെടെയുള്ള സൗകര്യങ്ങള്ക്കും അവര് വലിയ കടപ്പാട് പ്രകടിപ്പിച്ചു. മക്കളുടെ ശസ്ത്രക്രിയ വിജയകരമായി നടക്കുമെന്ന വലിയ പ്രതീക്ഷയിലാണ് മാതാപിതാക്കള്.
വിദഗ്ധ ഡോക്ടര്മാരുടെ മേല്നോട്ടത്തില് സുഫിയാനും യൂസഫും പുതിയൊരു ജീവിതത്തിലേക്ക് മടങ്ങിയെത്തുമെന്ന പ്രാര്ഥനയിലാണ് ലോകമെമ്പാടുമുള്ള പ്രവാസികളും മറ്റ് അഭ്യുദയകാംക്ഷികളും.
Related News
