മക്ക: ലോകത്തിന്റെ വിവിധ കോണുകളില്‍ നിന്നെത്തുന്ന തീര്‍ഥാടകര്‍ക്കും സന്ദര്‍ശകര്‍ക്കും ഇരുഹറമുകളിലെയും സഞ്ചാരം സുഗമമാക്കാന്‍ അത്യാധുനിക 'സ്മാര്‍ട്ട് ഇന്ററാക്ടീവ് മാപ്പ്' സംവിധാനം സജ്ജമായി. മക്കയിലെ മസ്ജിദുല്‍ ഹറാമിലും മദീനയിലെ മസ്ജിദുന്നബവിയിലുമാണ് ഈ ഡിജിറ്റല്‍ ഗൈഡന്‍സ് സംവിധാനം നടപ്പിലാക്കിയത്. ഇരുഹറം കാര്യാലയ സി.ഇ.ഒ എന്‍ജിനീയര്‍ ഗാസി അല്‍-ശഹ്റാനി പദ്ധതി ഉദ്ഘാടനം ചെയ്തു.

തീര്‍ഥാടകരുടെ യാത്രാപഥങ്ങള്‍ ലഘൂകരിക്കുന്നതിനും തിരക്ക് നിയന്ത്രിക്കുന്നതിനും ലക്ഷ്യമിട്ടുള്ള ഈ സംവിധാനം വലിയൊരു മാറ്റത്തിന് വഴിയൊരുക്കും. തത്സമയ വിവരങ്ങളും പുതുക്കിയ റൂട്ടുകളും നല്‍കുന്നതിലൂടെ തീര്‍ഥാടകര്‍ക്ക് സുരക്ഷിതമായും എളുപ്പത്തിലും ലക്ഷ്യസ്ഥാനങ്ങളില്‍ എത്താന്‍ സാധിക്കും. തിരക്ക് അനുഭവപ്പെടുമ്പോഴോ താല്‍ക്കാലികമായി വഴികള്‍ അടക്കുമ്പോഴോ കണ്‍ട്രോള്‍ റൂമുകളില്‍ നിന്നുള്ള തത്സമയ വിവരങ്ങള്‍ ഉപയോഗിച്ച് ഏറ്റവും അനുയോജ്യമായ ബദല്‍ പാതകള്‍ മാപ്പ് നിര്‍ദ്ദേശിക്കും.

650-ലധികം ക്യൂ.ആര്‍ കോഡുകളുടെ സഹായത്തോടെയാണ് മാപ്പുകള്‍ പ്രവര്‍ത്തിക്കുന്നത്. ഇതിലൂടെ ഒരു ലക്ഷത്തിലധികം വ്യത്യസ്ത റൂട്ടുകള്‍ തത്സമയം കണ്ടെത്താന്‍ സാധിക്കും. 13 വ്യത്യസ്ത വിഭാഗങ്ങളിലായി 950-ഓളം പ്രധാന കേന്ദ്രങ്ങള്‍ മാപ്പില്‍ അടയാളപ്പെടുത്തിയിട്ടുണ്ട്.

ഇരുഹറമുകളെയും വിവിധ ഭൗമമേഖലകളായി തിരിച്ചാണ് സ്മാര്‍ട്ട് മാപ്പ് രൂപകല്‍പ്പന ചെയ്തിരിക്കുന്നത്. ഇതിനായി പ്രത്യേക നിറങ്ങളും (Color Coding) മെട്രിക് അഡ്രസ്സിംഗ് സിസ്റ്റവും ഉപയോഗിക്കുന്നു. കഴിഞ്ഞ റമദാനില്‍ വിജയകരമായി പരീക്ഷണാടിസ്ഥാനത്തില്‍ നടപ്പിലാക്കിയ ഈ പദ്ധതി, വരും വര്‍ഷങ്ങളില്‍ കൂടുതല്‍ വികസിപ്പിക്കുമെന്ന് ഡിജിറ്റല്‍ ട്രാന്‍സ്‌ഫോര്‍മേഷന്‍ വൈസ് പ്രസിഡന്റ് ഡോ. മുഹമ്മദ് അല്‍-സഖര്‍ പറഞ്ഞു.

ഇലക്ട്രിക് കാര്‍ട്ടുകള്‍ ഇനി വേഗത്തില്‍
ഇലക്ട്രിക് കാര്‍ട്ടുകള്‍ ആവശ്യമുള്ള തീര്‍ഥാടകര്‍ക്ക് അവ എളുപ്പത്തില്‍ ലഭ്യമാക്കാനും ഈ സംവിധാനം സഹായിക്കും. സ്മാര്‍ട്ട് പ്ലാറ്റ്ഫോമിലെ ടിക്കറ്റ് നമ്പറുകള്‍ ഉപയോഗിച്ച് കാര്‍ട്ടുകള്‍ നില്‍ക്കുന്ന സ്ഥലം കണ്ടെത്താനും സേവനം വേഗത്തിലാക്കാനും സാധിക്കുമെന്ന് ബിസിനസ് സൊല്യൂഷന്‍സ് ഡയറക്ടര്‍ എന്‍ജിനീയര്‍ വഹീബ് അല്‍-മുത്രഫി വ്യക്തമാക്കി.

ഡിജിറ്റല്‍ സാങ്കേതികവിദ്യയുടെ സഹായത്തോടെ തീര്‍ഥാടകര്‍ക്ക് ലോകോത്തര നിലവാരത്തിലുള്ള സേവനം ഉറപ്പാക്കുകയാണ് ഈ പദ്ധതിയിലൂടെ സൗദി അറേബ്യ ലക്ഷ്യമിടുന്നത്.