അല്‍-ജൗഫ്: സൗദി അറേബ്യയുടെ വടക്കന്‍ മേഖലയിലെ വിമാനയാത്രാ സൗകര്യങ്ങളില്‍ പുതിയ ചരിത്രം കുറിച്ചുകൊണ്ട് അത്യാധുനികമായ അല്‍-ജൗഫ് അന്താരാഷ്ട്ര വിമാനത്താവളം പ്രവര്‍ത്തനമാരംഭിച്ചു. പഴയ വിമാനത്താവളത്തില്‍ നിന്നുള്ള സര്‍വീസുകള്‍ പൂര്‍ണ്ണമായും പുതിയ ടെര്‍മിനലിലേക്ക് മാറ്റിക്കൊണ്ടാണ് പ്രവര്‍ത്തനം തുടങ്ങിയത്. സെക്കന്‍ഡ് എയര്‍പോര്‍ട്ട് ക്ലസ്റ്ററിന് കീഴിലാണ് പുതിയ വിമാനത്താവളം പ്രവര്‍ത്തിക്കുന്നത്.

പഴയ വിമാനത്താവളത്തെ അപേക്ഷിച്ച് യാത്രാശേഷിയില്‍ വന്‍ കുതിച്ചുചാട്ടമാണ് പുതിയ വിമാനത്താവളം ലക്ഷ്യമിടുന്നത്. പ്രതിവര്‍ഷം 1.75 ലക്ഷം യാത്രക്കാരെ ഉള്‍ക്കൊള്ളാന്‍ സാധിച്ചിരുന്ന സ്ഥാനത്ത്, പുതിയ വിമാനത്താവളത്തിന് 16 ലക്ഷം (1.6 മില്യണ്‍) യാത്രക്കാരെ സ്വീകരിക്കാന്‍ ശേഷിയുണ്ട്. അതായത് യാത്രാശേഷിയില്‍ 800 ശതമാനത്തിലധികം വര്‍ധനവാണ് രേഖപ്പെടുത്തിയിരിക്കുന്നത്.

അന്താരാഷ്ട്ര മാനദണ്ഡങ്ങള്‍ക്കനുസരിച്ച് 24,000 ചതുരശ്ര മീറ്റര്‍ വിസ്തൃതിയിലാണ് പാസഞ്ചര്‍ ടെര്‍മിനല്‍ ഒരുക്കിയിരിക്കുന്നത്. 16 ചെക്ക്-ഇന്‍ കൗണ്ടറുകള്‍ സജ്ജീകരിച്ചിട്ടുണ്ട്. ഇതില്‍ രണ്ട് എണ്ണം സെല്‍ഫ് സര്‍വീസ് സൗകര്യമുള്ളവയാണ്. 11 ഡിപ്പാര്‍ച്ചര്‍-അറൈവല്‍ ഗേറ്റുകളും അഞ്ച് ഇരട്ട പാസ്പോര്‍ട്ട് കണ്‍ട്രോള്‍ പ്ലാറ്റ്ഫോമുകളുമുണ്ട്. 648 വാഹനങ്ങള്‍ക്ക് ഒരേസമയം പാര്‍ക്ക് ചെയ്യാനുള്ള സൗകര്യവും ഒരുക്കിയിരിക്കുന്നു. 1,700 ചതുരശ്ര മീറ്റര്‍ വ്യാപാര മേഖലകള്‍ക്കായും നീക്കിവെച്ചിരിക്കുന്നു.

ഭിന്നശേഷിക്കാര്‍ക്കും ഓട്ടിസം ബാധിച്ചവര്‍ക്കുമായി പ്രത്യേക സൗകര്യങ്ങള്‍ വിമാനത്താവളത്തില്‍ ഒരുക്കിയിട്ടുണ്ട്. ഓട്ടിസം ബാധിച്ച യാത്രക്കാര്‍ക്കായി പ്രത്യേകം 'സെന്‍സറി റൂമുകള്‍' ഇവിടെ സജ്ജമാണ്. അല്‍-ജൗഫ് മേഖലയുടെ സാംസ്‌കാരിക പൈതൃകം പ്രതിഫലിപ്പിക്കുന്ന രീതിയിലാണ് വിമാനത്താവളത്തിന്റെ രൂപകല്‍പ്പന. ഈ മേഖലയുടെ അടയാളമായ ഒലിവ് മരങ്ങള്‍ നിറഞ്ഞ 5,000 ചതുരശ്ര മീറ്റര്‍ ഹരിത പ്രദേശം വിമാനത്താവളത്തിന്റെ ഭംഗി വര്‍ദ്ധിപ്പിക്കുന്നു.

ചൊവ്വാഴ്ച റിയാദില്‍ നിന്നെത്തിയ വിമാനമായിരുന്നു പഴയ വിമാനത്താവളത്തില്‍ നിന്നുള്ള അവസാന സര്‍വീസ്. വിവിധ വകുപ്പുകളുടെ ഏകോപനത്തോടെയുള്ള കൃത്യമായ പ്ലാനിംഗിലൂടെ യാതൊരു തടസ്സവുമില്ലാതെയാണ് ബുധനാഴ്ച സര്‍വീസുകള്‍ പുതിയ വിമാനത്താവളത്തിലേക്ക് മാറ്റിയത്.

ചിത്രം: അല്‍-ജൗഫ് അന്താരാഷ്ട്ര വിമാനത്താവളം. 2. പഴയ വിമാനത്താവളത്തില്‍നിന്നുള്ള അവസാന യാത്രാ വിമാനത്തിന് യാത്രയയപ്പ്.