ആലപ്പുഴ: ജില്ലയിലെ സി.പി.എം. സ്ഥാനാര്ഥികള് ആരൊക്കെയെന്നതു സംബന്ധിച്ച് പ്രാഥമിക ചര്ച്ച നടത്താന് വ്യാഴാഴ്ച പാര്ട്ടി ജില്ലാ സെക്രട്ടേറിയറ്റു ചേര്ന്നു. സംസ്ഥാന സെക്രട്ടറി എം.വി. ഗോവിന്ദന്റെ സാന്നിധ്യത്തിലാണ് യോഗം. ജില്ലാ സെക്രട്ടറി ആര്.നാസറിന്റെ പേര് കായംകുളത്തും അരൂരിലും നിര്ദേശിക്കപ്പെട്ടു. അരൂരില് സിറ്റിങ് എംഎല്എ ദലീമയേയും പട്ടികയിലുള്പ്പെടുത്തിയിട്ടുണ്ട്.
മുന്മന്ത്രി തോമസ് ഐസക്കിന്റെ പേര് വീണ്ടും ചര്ച്ചയ്ക്കു വന്നെങ്കിലും പരിഗണിച്ചിട്ടില്ല. ചെങ്ങന്നൂരില് സജി ചെറിയാന്, മാവേലിക്കരയില് അരുണ് കുമാര്, ആലപ്പുഴയില് ചിത്തരഞ്ജന്, അമ്പലപ്പുഴയില് എച്ച് സലാം. കായംകുളത്ത് യു.പ്രതിഭ, ആര്. നാസര്, കെ.എച്ച് ബാബുജാന് എന്നിവരുടെ പേരാണ് മുന്നോട്ടുവെച്ചിരിക്കുന്നത്.
യു. പ്രതിഭയ്ക്ക് മത്സരിക്കാന് അവസരം ലഭിക്കുകയാണെങ്കില് ടേം വ്യവസ്ഥയില് മാറ്റം വരുത്തേണ്ടിവരും.
മുന്മന്ത്രി ജി. സുധാകരനും ചര്ച്ചകളില് ഇടം പിടിച്ചിരുന്നുവെങ്കിലും ജില്ലാ സെക്രട്ടേറിയറ്റ് പരിഗണിച്ച ലിസ്റ്റില് അദ്ദേഹമില്ല. പാര്ട്ടി തീരുമാനിച്ചാല് മത്സരിക്കാന് തയ്യാറാണെന്ന് ജനറല് സെക്രട്ടറി എം.എ. ബേബിയോട് സുധാകരന് കഴിഞ്ഞമാസം പറഞ്ഞിരുന്നു. ജില്ലയിലെ ഏതു സീറ്റില് മത്സരിച്ചാലും ജയിക്കുമെന്ന് അദ്ദേഹം പരസ്യമായി പറഞ്ഞിട്ടുമുണ്ട്.
Related News
