ഫെബ്രുവരി 28-ന് ആരംഭിച്ച 'ഓപ്പറേഷന് എപ്പിക് ഫ്യൂറി' (യുഎസ്), 'ഓപ്പറേഷന് ലയണ്സ് റോര്' (ഇസ്രായേല്) എന്നിവ കേവലം സൈനികാക്രമണങ്ങള് എന്നതിലുപരി ഇറാനിലെ ഭരണകൂടത്തെ അട്ടിമറിക്കാനുള്ള ലക്ഷ്യത്തോടെയുള്ളതാണ്. ഇറാന്റെ പരമോന്നത നേതാവ് അയത്തൊള്ള അലി ഖമേനി കൊല്ലപ്പെട്ടതായി ഇസ്രായേല് പ്രധാനമന്ത്രിയും യുഎസ് പ്രസിഡന്റും അവകാശപ്പെടുന്നു. ഖമേനിയുടെ വസതിക്കും തന്ത്രപ്രധാനമായ ഓഫീസ് സമുച്ചയത്തിനും നേരെ കടുത്ത നാശനഷ്ടങ്ങള് സംഭവിച്ചതായി ഉപഗ്രഹ ചിത്രങ്ങള് സ്ഥിരീകരിക്കുന്നുണ്ട്. ഇറാന്റെ ആണവ കേന്ദ്രങ്ങള്, മിസൈല് ഉല്പ്പാദന യൂണിറ്റുകള്, വ്യോമ പ്രതിരോധ സംവിധാനങ്ങള് എന്നിവ പൂര്ണ്ണമായും തകര്ക്കുക എന്നതായിരുന്നു ആക്രമണത്തിന്റെ ആദ്യ ഘട്ടം.
'ഓപ്പറേഷന് ട്രൂ പ്രോമിസ് 4' മായുള്ള ഇറാന്റെ തിരിച്ചടി അതിശക്തമാണ്. അപ്രതീക്ഷിത ആക്രമണത്തിന് ഇരയായെങ്കിലും ഇറാന് അതിശക്തമായാണ് പ്രതികരിക്കുന്നത്. ഇസ്രായേലിന് പുറമെ മേഖലയിലെ അമേരിക്കന് താല്പര്യങ്ങളെയും ഇറാന് ലക്ഷ്യം വെക്കുന്നു.
മേഖലയിലെ മിസൈല് വര്ഷം: ഇസ്രായേലിലെ ടെല് അവീവ് ഉള്പ്പെടെയുള്ള നഗരങ്ങളിലും അമേരിക്കന് സൈനിക താവളങ്ങള് സ്ഥിതി ചെയ്യുന്ന ഖത്തര്, കുവൈറ്റ്, യുഎഇ, ബഹ്റൈന് എന്നിവിടങ്ങളിലും ഇറാന് മിസൈലുകള് പതിച്ചു. അല് ഉദൈദ് (ഖത്തര്), അല് ദാഫ്ര (യുഎഇ) തുടങ്ങിയ താവളങ്ങള്ക്ക് നേരെ നടന്ന ആക്രമണം മേഖലയിലെ സുരക്ഷാ സന്തുലിതാവസ്ഥ തകര്ത്തിരിക്കുകയാണ്. ഇതോടെ യുദ്ധം ഇറാനിലും ഇസ്രായേലിലും മാത്രം ഒതുങ്ങാതെ ഗള്ഫ് രാജ്യങ്ങളെ നേരിട്ട് ബാധിച്ചു തുടങ്ങി. മിസൈലുകളെ പ്രതിരോധിക്കുന്നതിനിടയില് അബുദാബി ഉള്പ്പെടെയുള്ള നഗരങ്ങളില് മിസൈല് അവശിഷ്ടങ്ങള് വീണ് സാധാരണക്കാര്ക്ക് പരിക്കേല്ക്കുന്ന സാഹചര്യം നിലവിലുണ്ട്.
ഗള്ഫ് രാജ്യങ്ങളിലെ വ്യോമപാതകള് ഭാഗികമായി അടച്ചത് വിമാന സര്വീസുകളെയും പ്രവാസികളുടെ യാത്രയെയും സാരമായി ബാധിച്ചു. ലോകത്തെ എണ്ണ വിതരണത്തിന്റെ ജീവനാഡിയായ ഹോര്മുസ് കടടുടുക്ക് ഇറാന് അടച്ചാല് ആഗോള എണ്ണവില കുതിച്ചുയരാന് സാധ്യതയുണ്ട്. കപ്പല് ഗതാഗതം നിലവില് അതീവ അപകടകരമായ അവസ്ഥയിലാണ്. യുദ്ധം സാധാരണക്കാരുടെ ജീവിതം ദുസ്സഹമാക്കിയിരിക്കുകയാണ്.
ഇറാനിലെ പ്രൈമറി സ്കൂളിന് നേരെ നടന്ന ആക്രമണത്തില് നിരവധി കുട്ടികള് കൊല്ലപ്പെട്ടത് അന്താരാഷ്ട്ര തലത്തില് വലിയ പ്രതിഷേധത്തിന് വഴിവെച്ചു. യുഎന് രക്ഷാസമിതി അടിയന്തര യോഗം ചേര്ന്ന് സമാധാന ശ്രമങ്ങള്ക്കായി സമ്മര്ദ്ദം ചെലുത്തുന്നുണ്ടെങ്കിലും ആക്രമണം തുടരുമെന്ന നിലപാടിലാണ് അമേരിക്കയും ഇസ്രായേലും.
ഇന്ത്യയെ സംബന്ധിച്ചിടത്തോളം ഈ യുദ്ധം വലിയ വെല്ലുവിളിയാണ്. ഗള്ഫിലുള്ള ലക്ഷക്കണക്കിന് ഇന്ത്യക്കാരുടെ സുരക്ഷ ഉറപ്പാക്കാന് വിദേശകാര്യ മന്ത്രാലയം ജാഗ്രതാ നിര്ദ്ദേശം നല്കിയിട്ടുണ്ട്. എണ്ണവില വര്ദ്ധനവ് ഇന്ത്യയുടെ ആഭ്യന്തര വിപണിയെയും സാമ്പത്തിക ഭദ്രതയെയും ബാധിച്ചേക്കാം.
പശ്ചിമേഷ്യന് രാഷ്ട്രീയം മുമ്പൊരിക്കലും ഇല്ലാത്തവിധം കലുഷിതമാണ്. ഇറാനിലെ ഭരണമാറ്റം ലക്ഷ്യമിട്ടുള്ള ഈ നീക്കം വരും ദിവസങ്ങളില് ഒരു സമ്പൂര്ണ്ണ പ്രാദേശിക യുദ്ധത്തിലേക്ക് വഴിമാറാനുള്ള സാധ്യത ഏറെയാണ്. നയതന്ത്ര ഇടപെടലുകള് പരാജയപ്പെട്ടാല് ആഗോള സമ്പദ്വ്യവസ്ഥയെ തന്നെ ഇത് തളര്ത്തും.
ഫോട്ടോ: അമേരിക്ക തകര്ത്ത സ്കൂള് കെട്ടിട അവശിഷ്ടങ്ങളില് രക്ഷാപ്രവര്ത്തനം നടത്തുന്ന നാട്ടുകാര്.
Related News
