തെഹ്റാന്- അമേരിക്കയും ഇസ്രായേലും സംയുക്തമായി നടത്തിയ വ്യോമാക്രമണത്തില് ഇറാന്റെ സായുധ സേനയുടെ ചീഫ് ഓഫ് സ്റ്റാഫ് അബ്ദുള്റഹീം മൂസവി കൊല്ലപ്പെട്ടതായി ഇറാനിയന് ടെലിവിഷന് ഞായറാഴ്ച അറിയിച്ചു. ഇറാന്റെ സൈനിക നേതൃത്വത്തിലെ ഏറ്റവും പ്രധാനികളിലൊരാളായ മൂസവി, 2015 ജൂണ് 13-നാണ് സുപ്രീം ലീഡര് അലി ഖാംനഇയാല് ഈ പദവിയില് നിയമിക്കപ്പെട്ടത്. നേരത്തെ ഇസ്രായേല് നടത്തിയ വ്യോമാക്രമണത്തില് കൊല്ലപ്പെട്ട മുഹമ്മദ് ബാഖേരിയുടെ പിന്ഗാമിയായാണ് അദ്ദേഹം ചുമതലയേറ്റിരുന്നത്.
ശനിയാഴ്ച മുതല് ആരംഭിച്ച യുഎസ്-ഇസ്രായേല് സൈനിക നടപടികളില് ഇറാന് ഔദ്യോഗികമായി സ്ഥിരീകരിക്കുന്ന നാലാമത്തെ ഉന്നത നേതാവാണ് അബ്ദുള്റഹീം മൂസവി. ഇതേ ആക്രമണങ്ങളില് ഇറാന്റെ പരമോന്നത നേതാവ് അലി ഖാംനഈ, അദ്ദേഹത്തിന്റെ ഉപദേശകന് അലി ശംഖാനി, റെവല്യൂഷണറി ഗാര്ഡ് കമാന്ഡര് മുഹമ്മദ് പക്പൂര് എന്നിവരും കൊല്ലപ്പെട്ടതായി തെഹ്റാന് നേരത്തെ അറിയിച്ചിരുന്നു. രാജ്യത്തിന്റെ പ്രതിരോധ നട്ടെല്ലായ പ്രമുഖ നേതാക്കളുടെ തുടര്ച്ചയായ അന്ത്യം ഇറാനെ വലിയ പ്രതിസന്ധിയിലാക്കിയിരിക്കുകയാണ്.
അതേസമയം, ഇന്റലിജന്സ്, സൈനിക വൃത്തങ്ങളെ ഉദ്ധരിച്ച് സിബിഎസ് ന്യൂസ് റിപ്പോര്ട്ട് ചെയ്യുന്നത് പ്രകാരം, യുഎസ്-ഇസ്രായേല് വ്യോമാക്രമണത്തില് ഇതുവരെ 40-ഓളം ഇറാനിയന് ഉദ്യോഗസ്ഥര് കൊല്ലപ്പെട്ടിട്ടുണ്ട്. ഇറാന്റെ ബാലിസ്റ്റിക് മിസൈല് കേന്ദ്രങ്ങളെയും വ്യോമ പ്രതിരോധ സംവിധാനങ്ങളെയും ലക്ഷ്യമിട്ടായിരുന്നു പ്രധാനമായും ആക്രമണം നടന്നതെന്ന് റിപ്പോര്ട്ടുകള് വ്യക്തമാക്കുന്നു. നിലവിലെ സാഹചര്യത്തില് മേഖലയില് സംഘര്ഷം അതിരൂക്ഷമായി തുടരുകയാണ്.
Related News
