മനാമ: ബഹ്റൈന് നേരെയുണ്ടായ ഇറാന്റെ വ്യോമാക്രമണങ്ങളെ തങ്ങളുടെ മിസൈല്‍ പ്രതിരോധ സംവിധാനം വിജയകരമായി പ്രതിരോധിച്ചതായി ബഹ്റൈന്‍ ഡിഫന്‍സ് ഫോഴ്സ് (BDF) ജനറല്‍ കമാന്‍ഡ് അറിയിച്ചു. രാജ്യത്തെ ലക്ഷ്യമാക്കി വന്ന 61 മിസൈലുകളും 34 ഡ്രോണുകളും ആകാശത്തുവെച്ച് തന്നെ വെടിവെച്ചിട്ടതായി ഔദ്യോഗിക വക്താവ് വ്യക്തമാക്കി.

ഏത് തരത്തിലുള്ള പ്രകോപനങ്ങളെയും ഉടനടി നേരിടാന്‍ ബഹ്റൈന്റെ പ്രതിരോധ സംവിധാനങ്ങള്‍ അതീവ ജാഗ്രതയിലാണെന്ന് ജനറല്‍ കമാന്‍ഡ് അറിയിച്ചു.
ജനവാസ കേന്ദ്രങ്ങളെയും സ്വകാര്യ സ്വത്തുക്കളെയും ലക്ഷ്യമിട്ട് ബാലിസ്റ്റിക് മിസൈലുകളും ഡ്രോണുകളും ഉപയോഗിക്കുന്നത് അന്താരാഷ്ട്ര മാനുഷിക നിയമങ്ങളുടെ ലംഘനമാണ്. വിവേചനരഹിതമായ ഇത്തരം ആക്രമണങ്ങള്‍ മേഖലയുടെ സമാധാനത്തിന് ഭീഷണിയാണെന്നും സൈന്യം വ്യക്തമാക്കി. രാജ്യത്തിന്റെ സുരക്ഷയും പരമാധികാരവും സംരക്ഷിക്കുന്നതിനായി ആവശ്യമായ എല്ലാ നടപടികളും സ്വീകരിക്കാനുള്ള നിയമപരമായ അവകാശം ബഹ്റൈനുണ്ട്.

മേഖലയിലെ നിലവിലെ സാഹചര്യം കണക്കിലെടുത്ത് പൗരന്മാരും താമസക്കാരും അതീവ ജാഗ്രത പാലിക്കണമെന്ന് സൈന്യം നിര്‍ദ്ദേശിച്ചു. അത്യാവശ്യ ഘട്ടങ്ങളിലല്ലാതെ വീടിന് പുറത്തിറങ്ങരുത്. ആക്രമണം നടന്ന സ്ഥലങ്ങളില്‍ നിന്നും പരിസരങ്ങളില്‍ നിന്നും വിട്ടുനില്‍ക്കുക. ഔദ്യോഗിക സ്രോതസ്സുകളില്‍ നിന്നുള്ള വിവരങ്ങള്‍ മാത്രം വിശ്വസിക്കുക; കിംവദന്തികള്‍ പ്രചരിപ്പിക്കരുത്.

ബഹ്‌റൈനു നേരെയുണ്ടായ ആക്രമണത്തില്‍ ഒരാള്‍ കൊല്ലപ്പെട്ടതായി റിപ്പോര്‍ട്ടുണ്ട്.