ദുബായ്: ഇറാന്-അമേരിക്ക-ഇസ്രായേല് സംഘര്ഷം കടുക്കുന്ന പശ്ചാത്തലത്തില് ഖത്തര് ഫിനാന്ഷ്യല് മാര്ക്കറ്റ്സ് അതോറിറ്റി (ഝഎങഅ) ജീവനക്കാര്ക്ക് വര്ക്ക് ഫ്രം ഹോം പ്രഖ്യാപിച്ചു. അതോറിറ്റിയുടെ കീഴിലുള്ള എല്ലാ ലൈസന്സുള്ള സ്ഥാപനങ്ങള്ക്കും ഈ നിര്ദ്ദേശം ബാധകമാണ്. ഇന്നു മുതല് അടുത്ത അറിയിപ്പ് ഉണ്ടാകുന്നത് വരെ റിമോട്ട് വര്ക്കിംഗ് രീതി തുടരാനാണ് തീരുമാനം.
ഫ്ലെക്സിബിള് വര്ക്കിംഗ് സംവിധാനങ്ങള് സംബന്ധിച്ച മുന് തീരുമാനങ്ങളുടെ പശ്ചാത്തലത്തിലാണ് ഈ പുതിയ നീക്കം. എക്സ് പ്ലാറ്റ്ഫോമിലൂടെയാണ് അതോറിറ്റി ഇക്കാര്യം അറിയിച്ചത്. ജോലിയുടെ സ്വഭാവമനുസരിച്ച് ഏതൊക്കെ ജീവനക്കാര് ഓഫീസില് നേരിട്ട് ഹാജരാകണമെന്ന് അതത് സ്ഥാപനങ്ങള്ക്ക് തീരുമാനിക്കാവുന്നതാണ്.
സുരക്ഷാ മുന്കരുതലുകള് ശക്തമാക്കി
കഴിഞ്ഞ മൂന്ന് ദിവസമായി ഇറാനും അമേരിക്കയും ഇസ്രായേലും തമ്മിലുള്ള സൈനിക നീക്കങ്ങള് മേഖലയില് വലിയ ആശങ്കയാണ് സൃഷ്ടിച്ചിരിക്കുന്നത്. മിസൈല്-ഡ്രോണ് ആക്രമണങ്ങളും പ്രത്യാക്രമണങ്ങളും തുടരുന്ന സാഹചര്യത്തില് മിഡില് ഈസ്റ്റിലെ പല രാജ്യങ്ങളും അതീവ ജാഗ്രതയിലാണ്.
മേഖലയിലെ അനിശ്ചിതാവസ്ഥ കണക്കിലെടുത്ത് ഭരണകൂടങ്ങളും ധനകാര്യ സ്ഥാപനങ്ങളും അടിയന്തര സാഹചര്യങ്ങളെ നേരിടാനുള്ള നടപടികള് ആരംഭിച്ചു കഴിഞ്ഞു. സേവനങ്ങളുടെ സുരക്ഷ ഉറപ്പാക്കാനും ജീവനക്കാരുടെ ജീവന് സംരക്ഷിക്കാനുമാണ് ഖത്തര് ഉള്പ്പെടെയുള്ള രാജ്യങ്ങള് മുന്കരുതല് നടപടികളിലേക്ക് നീങ്ങുന്നത്.
Related News
