ടെഹ്റാന്- ഇസ്രായേലും ഇറാനും തമ്മിലുള്ള സംഘര്ഷം അതിരൂക്ഷമായി തുടരുന്ന സാഹചര്യത്തില്, ഇറാന് പരമോന്നത നേതാവ് ആയത്തുള്ള അലി ഖാംനഇയുടെ സംസ്കാര ചടങ്ങുകള് അനിശ്ചിതകാലത്തേക്ക് മാറ്റിവെച്ചു. വ്യാഴാഴ്ചയും ഇരുരാജ്യങ്ങളും തമ്മില് ശക്തമായ ഷെല്ലാക്രമണം തുടര്ന്നു. ഇതോടൊപ്പം ലെബനനുനേരെ പുതിയ ആക്രമണ പരമ്പര ആരംഭിച്ചതായി ഇസ്രായേല് സൈന്യം പ്രഖ്യാപിച്ചു.
ഇസ്രായേല് പ്രതിരോധ മന്ത്രാലയത്തെയും ബെന് ഗുരിയന് വിമാനത്താവളത്തെയും ലക്ഷ്യമിട്ട് മിസൈലുകളും ഡ്രോണുകളും തൊടുത്തതായി ഇറാന്റെ റെവല്യൂഷണറി ഗാര്ഡ് അറിയിച്ചു. വടക്കുപടിഞ്ഞാറന് ഇറാനിലെ ബുക്കാന് നഗരത്തില് ഇസ്രായേല് ശക്തമായ ബോംബാക്രമണം നടത്തി. ആക്രമണത്തില് ഗവര്ണറേറ്റ് കെട്ടിടം, വീടുകള്, വ്യാപാര സ്ഥാപനങ്ങള് എന്നിവയ്ക്ക് വന് നാശനഷ്ടങ്ങള് സംഭവിച്ചു.
ഇറാനില് നിന്നും ലെബനനില് നിന്നും മിസൈലുകള് എത്തിയതോടെ ജറുസലേം ഉള്പ്പെടെയുള്ള നഗരങ്ങളില് അപായ സൂചന മുഴങ്ങുകയും സ്ഫോടനശബ്ദം കേള്ക്കുകയും ചെയ്തു. ലെബനനുനേരെ പുതിയ തരംഗത്തിലുള്ള വ്യോമാക്രമണങ്ങള് ആരംഭിച്ചതായി ഇസ്രായേല് സൈന്യം സ്ഥിരീകരിച്ചു. ലിതാനി നദിക്ക് വടക്കോട്ട് മാറിതാമസിക്കാന് തെക്കന് ലെബനന് നിവാസികള്ക്ക് ഇസ്രായേല് സൈന്യം മുന്നറിയിപ്പ് നല്കിയിട്ടുണ്ട്.
ഇറാന്റെ മിസൈല് വിക്ഷേപണ കേന്ദ്രങ്ങള് തകര്ത്തതിലൂടെ പ്രതിദിനം വിക്ഷേപിക്കപ്പെടുന്ന മിസൈലുകളുടെ എണ്ണത്തില് കുറവുണ്ടായതായി ഇസ്രായേല് സൈനിക വക്താവ് നദവ് ശോഷാനി പറഞ്ഞു. അതിര്ത്തികളില് യുദ്ധസമാനമായ സാഹചര്യം തുടരുന്നതിനാല് മേഖലയില് കനത്ത ജാഗ്രതയാണ് നിലനില്ക്കുന്നത്.
Related News
