വാഷിംഗ്ടണ്: ഇറാന്റെ പ്രത്യാക്രമണത്തില് കൊല്ലപ്പെട്ട ആറ് അമേരിക്കന് സൈനികരുടെ ഭൗതികശരീരങ്ങള് പൂര്ണ്ണ ഔദ്യോഗിക ബഹുമതികളോടെ അമേരിക്കയിലെത്തിച്ചു. യുഎസ്-ഇസ്രായേല് സഖ്യവും ഇറാനും തമ്മിലുള്ള യുദ്ധത്തിന്റെ രണ്ടാം ദിനം കുവൈത്തില് വെച്ചാണ് ഇവര് കൊല്ലപ്പെട്ടത്. സൈനികരുടെ മൃതദേഹങ്ങള് ഏറ്റുവാങ്ങുന്ന 'ഡിഗ്നിഫൈഡ് ട്രാന്സ്ഫര്' എന്ന അതീവ ഗൗരവമേറിയ ചടങ്ങുകള്ക്ക് അമേരിക്കന് പ്രസിഡന്റ് ഡോണാള്ഡ് ട്രംപ് നേരിട്ട് നേതൃത്വം നല്കി.
കമാന്ഡര്-ഇന്-ചീഫ് എന്ന നിലയില് ചടങ്ങില് പങ്കെടുത്ത ട്രംപ്, സൈനികരുടെ വിയോഗം അമേരിക്കയെ സംബന്ധിച്ചിടത്തോളം 'അങ്ങേയറ്റം ദുഃഖകരമായ ദിനമാണെന്ന്' വിശേഷിപ്പിച്ചു. നിലവിലെ സംഘര്ഷം ആരംഭിച്ചതിനുശേഷം ഇതാദ്യമായാണ് സൈനികരുടെ മൃതദേഹങ്ങള് അമേരിക്കന് മണ്ണിലെത്തുന്നതും അതിന്റെ ദൃശ്യങ്ങള് മാധ്യമങ്ങളിലൂടെ പുറത്തുവരുന്നതും.
സംഘര്ഷത്തിന്റെ ഭീകരതയും മനുഷ്യജീവനുകളുടെ വിലയും നേരിട്ട് കണ്ടുതുടങ്ങിയതോടെ, യുദ്ധത്തെ പിന്തുണയ്ക്കുന്ന അമേരിക്കന് ജനതയുടെ നിലപാടില് മാറ്റമുണ്ടാകുമോ എന്ന ചോദ്യമാണ് ഇപ്പോള് അന്താരാഷ്ട്ര തലത്തില് ഉയരുന്നത്. വരും ദിവസങ്ങളില് അമേരിക്കയുടെ സൈനിക നീക്കങ്ങളെ ഈ സംഭവവികാസം എങ്ങനെ സ്വാധീനിക്കുമെന്ന് ലോകം ഉറ്റുനോക്കുകയാണ്.
'ഏറ്റവും പുതിയ പോളിംഗ് കണക്കുകള് സൂചിപ്പിക്കുന്നത് ഭൂരിഭാഗം അമേരിക്കക്കാരും ഈ യുദ്ധത്തിന് വിരുദ്ധരാണെന്നാണ്; ഏകദേശം 30 ശതമാനം ആളുകള് മാത്രമാണ് നിലവില് യുദ്ധത്തെ പിന്തുണയ്ക്കുന്നത്.'
Related News
