അബുദാബി: മേഖലയിലെ സംഘര്‍ഷങ്ങളുടെ പശ്ചാത്തലത്തില്‍ രാജ്യത്ത് മിസൈല്‍ ഭീഷണി നിലനില്‍ക്കുന്നതായും പൊതുജനങ്ങള്‍ അതീവ ജാഗ്രത പാലിക്കണമെന്നും യുഎഇ ആഭ്യന്തര മന്ത്രാലയം മുന്നറിയിപ്പ് നല്‍കി. ഇതിനോടൊപ്പം തന്നെ, നാഷണല്‍ ഏര്‍ലി വാണിംഗ് സിസ്റ്റം വഴിയുള്ള അടിയന്തര സനദേശങ്ങളുടെ ശബ്ദസംവിധാനത്തില്‍ മാറ്റം വരുത്തിയതായും ദേശീയ ദുരന്ത നിവാരണ അതോറിറ്റി അറിയിച്ചു.

അടിയന്തര സന്ദേശങ്ങളിലെ മാറ്റങ്ങള്‍
മുന്‍പ് ലഭിച്ചിരുന്ന ഉച്ചത്തിലുള്ള അപായ സൂചനയ്ക്ക് പകരം, സമയക്രമം അനുസരിച്ച് സന്ദേശങ്ങളുടെ ശബ്ദത്തില്‍ മാറ്റമുണ്ടാകും. രാവിലെ 9:00 മുതല്‍ രാത്രി 10:30 വരെ മുന്നറിയിപ്പ് സന്ദേശങ്ങള്‍ക്ക് ഉയര്‍ന്ന ശബ്ദത്തിലുള്ള ടോണും , ജാഗ്രത അവസാനിക്കുമ്പോള്‍ സാധാരണ മെസേജ് ടോണും ഉണ്ടായിരിക്കും. രാത്രി 10:30 മുതല്‍ രാവിലെ 9:00 വരെ അനാവശ്യ പരിഭ്രാന്തി ഒഴിവാക്കുന്നതിനായി മുന്നറിയിപ്പിനും ജാഗ്രത അവസാനിക്കുന്നതിനും സാധാരണ മെസേജ് ടോണ്‍ മാത്രമായിരിക്കും ഉപയോഗിക്കുക.

പൊതുജനങ്ങള്‍ പാലിക്കേണ്ട നിര്‍ദ്ദേശങ്ങള്‍
മിസൈല്‍ ഭീഷണി നിലനില്‍ക്കുന്ന സാഹചര്യത്തില്‍ സന്ദേശം ലഭിച്ചാലുടന്‍ തൊട്ടടുത്തുള്ള സുരക്ഷിതമായ കെട്ടിടങ്ങളിലേക്ക് മാറണം. ജനലുകള്‍, വാതിലുകള്‍, തുറസ്സായ സ്ഥലങ്ങള്‍ എന്നിവയില്‍ നിന്ന് അകന്നു നില്‍ക്കുക.

യാത്രക്കാര്‍ ശ്രദ്ധിക്കാന്‍: വാഹനമോടിക്കുന്നവര്‍ വഴിയില്‍ വണ്ടി നിര്‍ത്താതെ സുരക്ഷിതമായി ലക്ഷ്യസ്ഥാനത്ത് എത്തിച്ചേരാന്‍ ശ്രമിക്കുക. അവിടെ എത്തിയ ശേഷം മാത്രം അഭയം തേടുക. അപകടകരമായ സാഹചര്യങ്ങളില്‍ വീഡിയോ പകര്‍ത്തുന്നതും സോഷ്യല്‍ മീഡിയയില്‍ പങ്കുവെക്കുന്നതും ഒഴിവാക്കി സ്വന്തം സുരക്ഷയ്ക്ക് മുന്‍ഗണന നല്‍കുക. ഔദ്യോഗിക ചാനലുകള്‍ വഴി വരുന്ന വിവരങ്ങള്‍ മാത്രം വിശ്വസിക്കുക. പരിഭ്രാന്തി പരത്തുന്ന വ്യാജ വാര്‍ത്തകള്‍ പ്രചരിപ്പിക്കരുത്. യഥാര്‍ത്ഥ അടിയന്തര സാഹചര്യങ്ങളില്‍ മാത്രം 999 എന്ന നമ്പറില്‍ ബന്ധപ്പെടുക.

ഇറാന്‍ നടത്തുന്ന പ്രകോപനപരമായ നീക്കങ്ങള്‍ പ്രതിരോധിക്കുന്നതിന്റെ ഭാഗമായാണ് ഇത്തരം സുരക്ഷാ ക്രമീകരണങ്ങള്‍ ശക്തമാക്കിയത്. ജനങ്ങളുടെയും അടിസ്ഥാന സൗകര്യങ്ങളുടെയും സുരക്ഷ ഉറപ്പാക്കാന്‍ ആവശ്യമായ എല്ലാ നടപടികളും സ്വീകരിച്ചിട്ടുണ്ടെന്ന് അധികൃതര്‍ വ്യക്തമാക്കി.