മയാമി: ഇറാനുമായുള്ള യുദ്ധത്തില് അമേരിക്കയെ സഹായിക്കാത്ത യൂറോപ്യന് രാജ്യങ്ങള്ക്കെതിരെ വീണ്ടും അമേരിക്കന് പ്രസിഡന്റ് ഡോണള്ഡ് ട്രംപ്. നാറ്റോ സഖ്യരാജ്യങ്ങള് അമേരിക്കയെ സഹായിക്കുന്നില്ലെങ്കില്, തിരിച്ചും സഹായം പ്രതീക്ഷിക്കേണ്ടതില്ലെന്ന് അദ്ദേഹം പറഞ്ഞു. 'അവര് നമുക്കൊപ്പം നില്ക്കുന്നില്ലെങ്കില് നമ്മള് എന്തിനാണ് അവര്ക്കായി നിലകൊള്ളുന്നത്?' എന്ന് ചോദിച്ച ട്രംപ്, നാറ്റോയുടെ പ്രതിരോധ ഉടമ്പടികളില് അമേരിക്ക തുടരുന്ന കാര്യത്തില് വീണ്ടും ഇത് അനിശ്ചിതത്വം സൃഷ്ടിച്ചിരിക്കുകയാണ്. മയാമിയില് നടന്ന നിക്ഷേപക സംഗമത്തില് സംസാരിക്കുകയായിരുന്നു അദ്ദേഹം.
മേഖലയിലെ സമാധാന ശ്രമങ്ങള്ക്ക് സൗദി അറേബ്യ, യു.എ.ഇ, ഖത്തര്, ബഹ്റൈന് എന്നീ രാജ്യങ്ങള് നല്കുന്ന പിന്തുണയെ ട്രംപ് അഭിനന്ദിച്ചു. സൗദി കിരീടാവകാശി മുഹമ്മദ് ബിന് സല്മാന് തന്റെ അടുത്ത സുഹൃത്താണെന്നും സൗദിക്ക് അഭിമാനിക്കാവുന്ന നേതാവാണ് അദ്ദേഹമെന്നും ട്രംപ് കൂട്ടിച്ചേര്ത്തു.
ഇറാനുമായുള്ള സമാധാന കരാര് സാധ്യമാകണമെങ്കില് ഹോര്മുസ് കടലിടുക്കിലൂടെയുള്ള എണ്ണക്കടത്ത് പുനഃസ്ഥാപിക്കണമെന്ന് അദ്ദേഹം ആവശ്യെപ്പെട്ടു.
മാസങ്ങള് നീണ്ട സംഘര്ഷം അവസാനിപ്പിക്കാന് ചര്ച്ചകള് നടക്കുന്നുണ്ടെന്നും എന്നാല് ഇറാന് വഴങ്ങാതെ കരാര് സാധ്യമല്ലെന്നും അദ്ദേഹം വ്യക്തമാക്കി. യുദ്ധത്തില് ഇറാന്റെ നാവിക-വ്യോമ സേനകള്ക്കും ആണവ നിലയങ്ങള്ക്കും വന് നാശനഷ്ടങ്ങള് സംഭവിച്ചതായും ഇറാന് ഇപ്പോള് പിന്വാങ്ങുകയാണെന്നും ട്രംപ് അവകാശപ്പെട്ടു.
ലോകത്തെ മൊത്തം എണ്ണ വിതരണത്തിന്റെ അഞ്ചിലൊന്നും കടന്നുപോകുന്ന ഹോര്മുസ് കടലിടുക്ക് യുദ്ധത്തെത്തുടര്ന്ന് നിലവില് അടഞ്ഞു കിടക്കുകയാണ്. ഇത് ആഗോള വിപണിയില് എണ്ണവില കുതിച്ചുയരാന് കാരണമായി. വെനസ്വേലയില് ചെയ്തതുപോലെ ഇറാന്റെ എണ്ണ ശേഖരത്തിന്റെ നിയന്ത്രണം അമേരിക്ക ഏറ്റെടുക്കുന്നത് പരിഗണനയിലാണെന്നും ട്രംപ് സൂചിപ്പിച്ചു. അതേസമയം, ഹോര്മുസിലൂടെ കടന്നുപോകുന്ന കപ്പലുകളില് നിന്ന് ടോള് പിരിക്കാന് ഇറാന് നീക്കം നടത്തുന്നുണ്ടെന്ന് യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ ആശങ്ക പ്രകടിപ്പിച്ചു.
Related News
