റിയാദ്: വരാനിരിക്കുന്ന നിയമസഭാ തിരഞ്ഞെടുപ്പില് യുഡിഎഫ് പ്രവര്ത്തനങ്ങള്ക്ക് പുതിയ ഊര്ജവും ദിശാബോധവും നല്കി ഒഐസിസി പൊന്നാനി - തവനൂര് മണ്ഡലം കമ്മിറ്റികളും കെഎംസിസി പൊന്നാനി മണ്ഡലം കമ്മിറ്റിയും ചേര്ന്ന് സംയുക്ത തിരഞ്ഞെടുപ്പ് കണ്വെന്ഷന് സംഘടിപ്പിച്ചു. റിയാദിലെ ഒഐസിസി സബര്മതി ഓഫീസില് നടന്ന ആവേശോജ്ജ്വലമായ പരിപാടി യുഡിഎഫ് പ്രവര്ത്തകരുടെ ശക്തമായ സാന്നിധ്യം കൊണ്ട് ശ്രദ്ധേയമായി.
ഒഐസിസി മലപ്പുറം ജില്ലാ പ്രസിഡന്റ് സിദ്ധിഖ് കല്ലുപറമ്പന്റെ അധ്യക്ഷതയില് നടന്ന കണ്വെന്ഷന് കെഎംസിസി പ്രസിഡന്റ് സി.പി. മുസ്തഫ ഉദ്ഘാടനം ചെയ്തു. ഒഐസിസി സെന്ട്രല് കമ്മിറ്റി പ്രസിഡന്റ് സലീം കളക്കര മുഖ്യപ്രഭാഷണം നടത്തി.
കേരളത്തിലെ നിലവിലെ രാഷ്ട്രീയ സാഹചര്യവും ഭരണപരമായ വെല്ലുവിളികളും സലീം കളക്കര തന്റെ പ്രസംഗത്തില് വിശദമായി വിലയിരുത്തി. വികസനവും ജനക്ഷേമവും ഉറപ്പാക്കുന്ന പാരമ്പര്യമുള്ള യുഡിഎഫിനെ ജനങ്ങള് വലിയ പ്രതീക്ഷയോടെയാണ് കാണുന്നതെന്ന് അദ്ദേഹം പറഞ്ഞു. മലപ്പുറം ജില്ലയിലെ 16 മണ്ഡലങ്ങളിലും യുഡിഎഫ് മികച്ച വിജയം കൈവരിക്കുമെന്നും, ശക്തമായ സംഘടനാ പ്രവര്ത്തനത്തിലൂടെ ഈ മുന്നേറ്റം ഉറപ്പാക്കുമെന്നും അദ്ദേഹം കൂട്ടിച്ചേര്ത്തു.
പൊന്നാനി, തവനൂര് മണ്ഡലങ്ങളില് ദീര്ഘകാലമായി തുടരുന്ന ഇടതുപക്ഷ ആധിപത്യം അവസാനിപ്പിക്കാന് ഏകോപിതവും വ്യാപകവുമായ പ്രചാരണ പ്രവര്ത്തനങ്ങളാണ് യുഡിഎഫ് ആസൂത്രണം ചെയ്തിരിക്കുന്നത്. ബൂത്ത് തലത്തില് പ്രവര്ത്തകരെ സജ്ജമാക്കി വോട്ടര്മാരുമായി നേരിട്ടുള്ള ബന്ധം ഉറപ്പാക്കുന്ന രീതിയില് പ്രവര്ത്തനങ്ങള് പുരോഗമിക്കുകയാണെന്ന് നേതാക്കള് വ്യക്തമാക്കി. യുവജനങ്ങള്, വനിതകള്, പ്രവാസികള് എന്നിവരുടെ വിപുലമായ പിന്തുണ ഉറപ്പാക്കാനുള്ള പ്രത്യേക പദ്ധതികളും കണ്വെന്ഷന് ചര്ച്ച ചെയ്തു.
പൊന്നാനി നിയോജക മണ്ഡലം യുഡിഎഫ് സ്ഥാനാര്ഥി കെ.പി. നൗഷാദ് അലി ഓണ്ലൈനിലൂടെ പങ്കെടുത്ത് പ്രവര്ത്തകരെ അഭിസംബോധന ചെയ്തു.
ഷംസു പൊന്നാനി സ്വാഗതവും അന്സാര് നൈതല്ലൂര് നന്ദിയും രേഖപ്പെടുത്തി. ഒഐസിസി, കെഎംസിസി നേതാക്കളായ അമീര് പട്ടണത്ത്, അബ്ദുല് അസീസ്, വഹീദ് വാഴേക്കാട്, സഫീര്, ബഷീര് കോട്ടക്കല്, അസ്ലം കളക്കര, റസാഖ് പൊന്നാനി, ബിലാല്, ജാഫര് പുറങ്ങ്, ബക്കര് കിളിയില് എന്നിവര് ആശംസകള് നേര്ന്നു. നിസാര്, അലി, ഷഫീക്, നൗഷാദ്, അല്ത്താഫ്, അബ്ദു, ഫാറൂഖ് എന്നിവര് പരിപാടിക്ക് നേതൃത്വം നല്കി.
