ന്യൂദല്‍ഹി- പശ്ചിമേഷ്യയില്‍ യുദ്ധം കൊടുമ്പിരിക്കൊള്ളുന്നതിനിടെ, ലോകത്തെ ഞെട്ടിച്ചുകൊണ്ട് ഇറാന്‍ സൈന്യത്തിന്റെ പ്രതീകാത്മക നീക്കം. ഇസ്രായേലിന് നേരെ തൊടുത്തുവിട്ട മിസൈലുകളില്‍ 'ഇന്ത്യയിലെ ജനങ്ങള്‍ക്ക് നന്ദി' (Thank you to people of India) എന്ന സന്ദേശം എഴുതിയാണ് ഇറാന്‍ തങ്ങളുടെ നന്ദി പ്രകാശിപ്പിച്ചത്.

മുംബൈയിലെ ഇറാന്‍ കോണ്‍സുലേറ്റ് ജനറലും ഇറാനിയന്‍ സ്റ്റേറ്റ് മീഡിയയുമാണ് ഇതിന്റെ ദൃശ്യങ്ങള്‍ പുറത്തുവിട്ടത്. ഇറാന്‍ ഏറോസ്പേസ് ഫോഴ്സിലെ ഉദ്യോഗസ്ഥര്‍ നീല മാര്‍ക്കര്‍ ഉപയോഗിച്ച് മിസൈലുകളില്‍ കുറിപ്പുകള്‍ എഴുതുന്നതാണ് ദൃശ്യങ്ങളിലുള്ളത്. ഇന്ത്യയെ കൂടാതെ പാകിസ്ഥാന്‍, ജര്‍മ്മനി, സ്‌പെയിന്‍ എന്നീ രാജ്യങ്ങളിലെ ജനങ്ങള്‍ക്കും സമാനമായ രീതിയില്‍ ഇറാന്‍ നന്ദി അറിയിച്ചിട്ടുണ്ട്.

എന്തുകൊണ്ട് ഇന്ത്യയോട് ഈ സ്‌നേഹം?

യുദ്ധസാഹചര്യത്തിലും ഇന്ത്യയോട് ഇറാന്‍ പുലര്‍ത്തുന്ന മൃദുസമീപനത്തിന് പിന്നില്‍ പ്രധാനമായും രണ്ട് കാരണങ്ങളാണുള്ളത്:

തന്ത്രപ്രധാനമായ ഹോര്‍മുസ് കടലിടുക്കിലൂടെ ഇന്ത്യന്‍ കപ്പലുകള്‍ക്ക് സുരക്ഷിതമായി കടന്നുപോകാന്‍ ഇറാന്‍ അനുമതി നല്‍കിയിട്ടുണ്ട്. അമേരിക്കയുമായും സഖ്യകക്ഷികളുമായും ബന്ധമുള്ള കപ്പലുകള്‍ക്ക് നിയന്ത്രണമുള്ളപ്പോഴാണ് ഇന്ത്യയെ 'സൗഹൃദ രാജ്യം' എന്ന് വിളിച്ച് ഇറാന്‍ ഈ ഇളവ് നല്‍കിയത്.

പ്രത്യേകിച്ച് കാശ്മീരില്‍നിന്നുള്ള ഇന്ത്യന്‍ ജനത ഇറാനിലെ ദുരിതബാധിതര്‍ക്ക് നല്‍കുന്ന വലിയ പിന്തുണ ഇറാനെ സ്പര്‍ശിച്ചിട്ടുണ്ട്. ആഭരണങ്ങളും പണവും വീട്ടുസാധനങ്ങളും ഉള്‍പ്പെടെ വലിയ തോതിലുള്ള സഹായമാണ് കാശ്മീരില്‍ നിന്ന് ഇറാനിലേക്ക് എത്തുന്നത്.

'തങ്ങളുടെ കുടുക്കയിലെ സമ്പാദ്യം ഇറാനിലെ കുട്ടികള്‍ക്കായി നല്‍കിയ ഇന്ത്യന്‍ കുട്ടികളുടെ സ്‌നേഹം ഒരിക്കലും മറക്കില്ല' - ഇറാന്‍ എംബസി കുറിച്ചു.


ഇറാന്റെ റവല്യൂഷണറി ഗാര്‍ഡ് കോര്‍പ്‌സ് നടത്തുന്ന 'ഓപ്പറേഷന്‍ ട്രൂ പ്രോമിസ് 4' ന്റെ ഭാഗമായാണ് ഈ മിസൈല്‍ ആക്രമണങ്ങള്‍ നടന്നത്. അഷ്‌ദോദിലെ എണ്ണ സംഭരണശാലകള്‍, മോദിനിലെ സൈനിക കേന്ദ്രങ്ങള്‍, അമേരിക്കന്‍ സൈനിക താവളങ്ങള്‍ എന്നിവ ലക്ഷ്യമിട്ടായിരുന്നു ആക്രമണം. ഡ്രോണുകളും ഇടത്തരം ദൂര മിസൈലുകളും ഉപയോഗിച്ചുള്ള ഈ നീക്കം വന്‍ വിജയമാണെന്നാണ് ഇറാന്‍ അവകാശപ്പെടുന്നത്.

ഫെബ്രുവരി 28-ന് ആരംഭിച്ച ഈ യുദ്ധത്തില്‍ ഇന്ത്യ അതീവ ജാഗ്രതയോടെയുള്ള നിലപാടാണ് സ്വീകരിക്കുന്നത്. ഇറാനുമായുള്ള ചരിത്രപരമായ ബന്ധവും, അമേരിക്കയുമായും ഇസ്രായേലുമായുള്ള നയതന്ത്ര ബന്ധവും സന്തുലിതമായി നിലനിര്‍ത്താനാണ് ഇന്ത്യ ശ്രമിക്കുന്നത്. ചര്‍ച്ചകളിലൂടെയും നയതന്ത്രത്തിലൂടെയും പ്രശ്‌നം പരിഹരിക്കണമെന്നാണ് ഇന്ത്യ ആവര്‍ത്തിച്ചു ആവശ്യപ്പെടുന്നത്.