കുവൈറ്റ് സിറ്റി: കഴിഞ്ഞ 24 മണിക്കൂറിനിടെ കുവൈറ്റിന് നേരെയുണ്ടായ മിസൈല്‍, ഡ്രോണ്‍ ആക്രമണങ്ങളില്‍ 10 സൈനികര്‍ക്ക് പരിക്കേറ്റതായി കുവൈറ്റ് സൈന്യം അറിയിച്ചു. ഞായറാഴ്ചയാണ് സൈനിക വക്താവ് ഇത് സംബന്ധിച്ച പ്രസ്താവന പുറത്തിറക്കിയത്.

മേഖലയില്‍ തൊടുത്തുവിട്ട 14 ബാലിസ്റ്റിക് മിസൈലുകളും 12 ഡ്രോണുകളും കുവൈറ്റ് പ്രതിരോധ സംവിധാനം കണ്ടെത്തി. ഇതില്‍ ചിലത് സൈനിക ക്യാമ്പിന് നേരെ പതിച്ചതാണ് സൈനികര്‍ക്ക് പരിക്കേല്‍ക്കാന്‍ കാരണമായത്. ആക്രമണത്തില്‍ സൈന്യത്തിന്റെ ലോജിസ്റ്റിക്‌സ് ഗോഡൗണുകള്‍ക്കും നാശനഷ്ടങ്ങള്‍ സംഭവിച്ചിട്ടുണ്ട്. എന്നാല്‍ ഇവിടെ ആര്‍ക്കും ജീവഹാനി റിപ്പോര്‍ട്ട് ചെയ്തിട്ടില്ല.

ഫെബ്രുവരി 28-ന് മേഖലയില്‍ സംഘര്‍ഷം ആരംഭിച്ചത് മുതല്‍ ഇതുവരെ 307 ബാലിസ്റ്റിക് മിസൈലുകളും 616 ഡ്രോണുകളും രണ്ട് ക്രൂയിസ് മിസൈലുകളും കുവൈറ്റ് അതിര്‍ത്തിയില്‍ കണ്ടെത്തിയതായി സൈന്യം വ്യക്തമാക്കി. രാജ്യത്തിന്റെ സുരക്ഷയും സ്ഥിരതയും ഉറപ്പാക്കാന്‍ സൈന്യം സദാ സജ്ജമാണെന്നും ഔദ്യോഗിക കുറിപ്പില്‍ അറിയിച്ചു. ഫെബ്രുവരി 28 മുതല്‍ പശ്ചിമേഷ്യയില്‍ തുടരുന്ന അതീവ ജാഗ്രതാനിര്‍ദ്ദേശത്തിനിടെയാണ് കുവൈറ്റിന് നേരെയും ആക്രമണം ശക്തമാകുന്നത്.