റിയാദ്: യെമന്റെ നയതന്ത്ര ചരിത്രത്തില് പുതിയ അധ്യായം കുറിച്ച് ജമീല അലി രാജ അമേരിക്കയിലെ അംബാസഡറായി ചുമതലയേറ്റു. ഇതാദ്യമായാണ് ഒരു വനിതയെ യെമന് ഈ സുപ്രധാന പദവിയിലേക്ക് നിയോഗിക്കുന്നത്. ശനിയാഴ്ച റിയാദിലെ യെമന് എംബസിയില് നടന്ന ചടങ്ങില് യെമന് പ്രസിഡന്ഷ്യല് ലീഡര്ഷിപ്പ് കൗണ്സില് ചെയര്മാന് റഷാദ് അല് അലിമിക്ക് മുമ്പാകെ അവര് സത്യപ്രതിജ്ഞ ചെയ്ത് അധികാരം ഏറ്റെടുത്തു.
ജമീല അലി രാജയുടെ രാഷ്ട്രീയവും ബൗദ്ധികവുമായ അനുഭവസമ്പത്ത് യെമനെക്കുറിച്ചുള്ള തെറ്റായ പ്രചാരണങ്ങളെ പ്രതിരോധിക്കാന് സഹായിക്കുമെന്ന് പ്രസിഡന്റ് അല് അലിമി പ്രത്യാശ പ്രകടിപ്പിച്ചു. വാഷിംഗ്ടണിലെ തന്റെ നയതന്ത്ര ഉത്തരവാദിത്തങ്ങള് പൂര്ണ്ണമായി നിറവേറ്റാനും ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം കൂടുതല് ദൃഢമാക്കാനും അദ്ദേഹം പുതിയ അംബാസഡര്ക്ക് നിര്ദ്ദേശം നല്കി.
ഹൂതി വിമതര്ക്കെതിരെ അന്താരാഷ്ട്ര സമ്മര്ദ്ദം ശക്തമാക്കേണ്ടതിന്റെ ആവശ്യകതയും അദ്ദേഹം ചടങ്ങില് ഊന്നിപ്പറഞ്ഞു. യെമനിലെ പുനരധിവാസ പ്രവര്ത്തനങ്ങള്ക്കായി അമേരിക്കന് ഫണ്ടുകള് പുനരാരംഭിക്കുന്നതിനും ഭരണഘടനാ സ്ഥാപനങ്ങള് പുനഃസ്ഥാപിക്കുന്നതിനും അംബാസഡര് മുന്കൈ എടുക്കണമെന്നും അദ്ദേഹം ആവശ്യപ്പെട്ടു.
യെമനിലെ തായിസില് ജനിച്ച ജമീല അലി രാജ സമാധാന ചര്ച്ചകളിലും സ്ത്രീഅവകാശ പോരാട്ടങ്ങളിലും മുന്പന്തിയിലുള്ള വ്യക്തിയാണ്. യെമന് കണ്സള്ട്ടേഷന് ആന്ഡ് റിക്കണ്സിലിയേഷന് കമ്മീഷന് ഡെപ്യൂട്ടി ഹെഡ് ആയി അവര് സേവനമനുഷ്ഠിച്ചിട്ടുണ്ട്.
കെയ്റോയിലെ അമേരിക്കന് യൂണിവേഴ്സിറ്റിയില് നിന്ന് ജേണലിസത്തില് ബിരുദാനന്തര ബിരുദവും കെയ്റോ യൂണിവേഴ്സിറ്റിയില് നിന്ന് ഇംഗ്ലീഷ് സാഹിത്യത്തില് ബിരുദവും നേടിയിട്ടുണ്ട്. ജര്മ്മനി, ബ്രിട്ടന് തുടങ്ങിയ യൂറോപ്യന് രാജ്യങ്ങള്ക്കും ഐക്യരാഷ്ട്രസഭയ്ക്കും യെമന് സമാധാന ചര്ച്ചകളില് ഇവര് ഉപദേശകയായി പ്രവര്ത്തിച്ചിട്ടുണ്ട്. 'യെമനി വിമന് പാക്ട് ഫോര് പീസ് ആന്ഡ് സെക്യൂരിറ്റി'യുടെ സ്ഥാപക അംഗം കൂടിയാണ് ജമീല.
Related News
