വാഷിംഗ്ടണ്‍: ഇറാനുമായുള്ള രണ്ടാഴ്ചത്തെ താല്‍ക്കാലിക വെടിനിര്‍ത്തല്‍ കരാറില്‍ ഇസ്രായേലും പങ്കാളിയാകുമെന്ന് വൈറ്റ് ഹൗസ് വൃത്തങ്ങള്‍ അറിയിച്ചു. ഇറാനെതിരെയുള്ള സൈനിക നടപടികള്‍ ശക്തമാക്കുമെന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് നല്‍കിയ അന്ത്യശാസനം അവസാനിക്കാന്‍ നിമിഷങ്ങള്‍ ബാക്കിനില്‍ക്കെയാണ് നിര്‍ണ്ണായകമായ ഈ സമാധാന നീക്കം ഉണ്ടായത്.

ഹോര്‍മുസ് കടലിടുക്കിലൂടെയുള്ള കപ്പല്‍ ഗതാഗതം അടുത്ത രണ്ടാഴ്ചത്തേക്ക് അനുവദിക്കുമെന്ന് ഇറാന്‍ വിദേശകാര്യ മന്ത്രാലയം വ്യക്തമാക്കി. എന്നാല്‍ ഗതാഗതം ഇറാന്റെ സൈനിക മേല്‍നോട്ടത്തിലായിരിക്കും നടക്കുക. ഇസ്ലാമാബാദില്‍ നയതന്ത്ര ചര്‍ച്ചകള്‍ തുടരുന്ന സാഹചര്യത്തില്‍ സൈനിക നീക്കങ്ങള്‍ താല്‍ക്കാലികമായി നിര്‍ത്തിവെക്കാനുള്ള തീരുമാനം ഇറാന്റെ പരമോന്നത ദേശീയ സുരക്ഷാ കൗണ്‍സില്‍ ഔദ്യോഗികമായി അംഗീകരിച്ചു.

വെടിനിര്‍ത്തല്‍ വാര്‍ത്ത പുറത്തുവന്നതോടെ ഏഷ്യന്‍ വിപണികളില്‍ വന്‍ കുതിച്ചുചാട്ടമുണ്ടായി. ആഗോള എണ്ണവിലയില്‍ വന്‍ ഇടിവാണ് രേഖപ്പെടുത്തിയത്. അമേരിക്കന്‍ ക്രൂഡ് ഓയില്‍ വില 16.56% ഇടിഞ്ഞ് ബാരലിന് 96.39 ഡോളറിലെത്തി. അന്താരാഷ്ട്ര വിപണിയില്‍ ബ്രെന്റ് ക്രൂഡ് വില 15.89% കുറഞ്ഞ് 93.38 ഡോളറായി.

ഹോര്‍മുസ് കടലിടുക്ക് താല്‍ക്കാലികമായി തുറന്നുകൊടുക്കാനുള്ള തീരുമാനം ആഗോള ഓഹരി വിപണികളിലും വലിയ ആശ്വാസമാണ് നല്‍കിയിരിക്കുന്നത്. ഇതോടെ മാസങ്ങളായി നിലനിന്നിരുന്ന സാമ്പത്തിക അനിശ്ചിതത്വത്തിന് താല്‍ക്കാലിക ശമനമായി.