ദമ്മാം: കേരള നിയമസഭാ തിരഞ്ഞെടുപ്പുമായി ബന്ധപ്പെട്ട് പ്രവാസികള്ക്കിടയില് സജീവ പ്രചാരണവുമായി ഒഐസിസി ദമ്മാം മലപ്പുറം ജില്ലാ കമ്മിറ്റി. ദമ്മാമിലെ പ്രമുഖ ഹൈപ്പര് മാര്ക്കറ്റുകള് കേന്ദ്രീകരിച്ച് വോട്ടര്മാരെ നേരില് കണ്ടും യുഡിഎഫിന്റെ അഭിമാന പ്രഖ്യാപനമായ 'ഇന്ദിരാ ഗ്യാരന്റി' കാര്ഡുകള് വിതരണം ചെയ്തുമാണ് പ്രചാരണം നടത്തിയത്.
വിവിധ ജില്ലകളില് നിന്നുള്ള വോട്ടര്മാരെ നേരില് കണ്ട് യുഡിഎഫിന് വോട്ട് ചെയ്യേണ്ടതിന്റെ ആവശ്യകത പ്രവര്ത്തകര് ബോധ്യപ്പെടുത്തി. തിരഞ്ഞെടുപ്പിന് മുന്പായി നാട്ടില് പോകുന്നവരോട് വോട്ടഭ്യര്ത്ഥിക്കുകയും മറ്റുള്ളവര് നാട്ടിലുള്ള ബന്ധുക്കളെയും സുഹൃത്തുക്കളെയും വിളിച്ച് ഐക്യ ജനാധിപത്യ മുന്നണി സ്ഥാനാര്ത്ഥികള്ക്കായി വോട്ട് ചോദിക്കണമെന്ന് അഭ്യര്ത്ഥിക്കുകയും ചെയ്തു.
ഇന്നത്തെ രാഷ്ട്രീയ സാഹചര്യത്തില് കേരളത്തില് യുഡിഎഫ് സര്ക്കാര് അധികാരത്തില് വരേണ്ടത് അനിവാര്യമാണെന്ന് ജനങ്ങള് തിരിച്ചറിയുന്നുണ്ടെന്ന് ഒഐസിസി ഭാരവാഹികള് പറഞ്ഞു. പ്രതിപക്ഷ നേതാവ് വി.ഡി. സതീശന് ഉള്പ്പെടെയുള്ള നേതാക്കള് അവകാശപ്പെട്ടതുപോലെ നൂറിലധികം സീറ്റുകള് നേടി യുഡിഎഫ് അധികാരത്തില് തിരിച്ചെത്തുമെന്ന ആത്മവിശ്വാസം ജനങ്ങളുടെ പ്രതികരണത്തില് നിന്ന് വ്യക്തമാണെന്ന് ആക്ടിങ് പ്രസിഡന്റ് അഷ്റഫ് കൊണ്ടോട്ടിയും സംഘടനാ ചുമതലയുള്ള ജനറല് സെക്രട്ടറി ഹമീദ് മരക്കാശ്ശേരിയും അഭിപ്രായപ്പെട്ടു.
ജില്ലാ ട്രഷറര് ഷൗക്കത്ത് അലി വെള്ളില, റീജണല് വൈസ് പ്രസിഡന്റ് ഷിജില ഹമീദ്, ജില്ലാ ജനറല് സെക്രട്ടറി നഫീര് തറമ്മല്, എക്സിക്യൂട്ടീവ് അംഗങ്ങളായ അബ്ദുല് സലാം നെല്ലായ, മുസ്തഫ ചേലക്കോടന്, ജയേഷ് തുടങ്ങിയവര് പ്രചാരണത്തിന് നേതൃത്വം നല്കി.
Related News
