വാഷിംഗ്ടണ്: 2026 ലോകകപ്പിലെ തങ്ങളുടെ നിര്ണായക മത്സരത്തില് മുന് ലോക ചാമ്പ്യന്മാരായ ഉറുഗ്വെയെ നേരിടാനൊരുങ്ങുന്ന സൗദി അറേബ്യന് ദേശീയ ഫുട്ബോള് ടീം പൂര്ണ്ണ ആത്മവിശ്വാസത്തില്. നാളെ പുലര്ച്ചെ ഒരു മണിക്കാണ് സൗദിയുടെ കളി. രണ്ടുതവണ ലോകകിരീടം ചൂടിയ ഉറുഗ്വെയെ ഏറെ ബഹുമാനിക്കുന്നുണ്ടെങ്കിലും, മികച്ച പ്രകടനം പുറത്തെടുക്കാന് ഗ്രീന് ഫാല്ക്കണ്സിന് സാധിക്കുമെന്ന് കളിക്കാര് വാര്ത്താസമ്മേളനത്തില് വ്യക്തമാക്കി. സൗദി ലീഗിന്റെ ഉയര്ന്ന മത്സരനിലവാരവും അന്താരാഷ്ട്ര മത്സരങ്ങളില് നിന്നുള്ള പരിചയസമ്പത്തും ടീമിന് തുണയാകുമെന്നാണ് കളിക്കാരുടെ പ്രതീക്ഷ.
മൈതാനത്ത് ഞങ്ങളുടെ തനിമ തെളിയിക്കും: ഫിറാസ് അല്-ബുറൈകാന്
മത്സരത്തിനായുള്ള ഒരുക്കങ്ങള് ടീം മികച്ച രീതിയില് പൂര്ത്തിയാക്കിയതായി സൗദി സ്ട്രൈക്കര് ഫിറാസ് അല്-ബുറൈകാന് പറഞ്ഞു. അവസാന പരിശീലനത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. 'ഞങ്ങള് ഏറ്റവും മികച്ച രീതിയിലാണ് തയ്യാറെടുത്തിരിക്കുന്നത്. നാളെ മൈതാനത്ത് ഞങ്ങളുടെ യഥാര്ത്ഥ ശൈലി ഞങ്ങള് പുറത്തെടുക്കും - അല്-ബുറൈകാന് പറഞ്ഞു.
മുമ്പ് ലോകകപ്പില് കളിച്ച പരിചയസമ്പന്നരായ താരങ്ങള് ടീമിലുള്ളതിനാല് ടൂര്ണമെന്റിലെ സമ്മര്ദ്ദങ്ങളെ അതിജീവിക്കാന് ടീമിന് സാധിക്കുമെന്നും അദ്ദേഹം കൂട്ടിച്ചേര്ത്തു. ഗ്രീക്ക് പരിശീലകന് ജോര്ഗോസ് ഡോണിസിന്റെ തന്ത്രങ്ങളുമായി കളിക്കാര് വേഗത്തില് പൊരുത്തപ്പെട്ടു കഴിഞ്ഞതായും വരും ദിവസങ്ങളില് ടീമിന്റെ ആക്രമണനിര കൂടുതല് ശക്തമാകുമെന്നും അദ്ദേഹം പ്രത്യാശ പ്രകടിപ്പിച്ചു.
ശ്രദ്ധ മുഴുവന് ഞങ്ങളുടെ കളിയില് മാത്രം: മുഹമ്മദ് അല്-ഉവൈസ്
ഉറുഗ്വെ ടീമിന്റെ വരവുമായി ബന്ധപ്പെട്ട മറ്റ് സാഹചര്യങ്ങളെക്കുറിച്ച് ചിന്തിക്കാതെ സ്വന്തം പ്രകടനത്തില് മാത്രം ശ്രദ്ധ കേന്ദ്രീകരിക്കാനാണ് ടീം ആഗ്രഹിക്കുന്നതെന്ന് ഗോള്കീപ്പര് മുഹമ്മദ് അല്-ഉവൈസ് വ്യക്തമാക്കി. 'അവര്ക്ക് എന്തെങ്കിലും പ്രതിസന്ധികള് ഉണ്ടോ ഇല്ലയോ എന്നത് ഞങ്ങളെ ബാധിക്കുന്നില്ല. ലോകകപ്പ് നേടാന് സാധ്യതയുള്ള ഒരു വമ്പന് ടീമിനെയാണ് ഞങ്ങള് നേരിടുന്നത്. അതുകൊണ്ട് തന്നെ ഞങ്ങളുടെ ശ്രദ്ധ മുഴുവന് സ്വന്തം കളി മെച്ചപ്പെടുത്തുന്നതിലും പിഴവുകള് തിരുത്തുന്നതിലുമാണ്,' അല്-ഉവൈസ് പറഞ്ഞു. ക്യാമ്പില് സമാധാനപരമായ അന്തരീക്ഷമാണ് നിലവിലുള്ളതെന്നും 1994-ല് അമേരിക്കയില് നടന്ന ലോകകപ്പിലെ ചരിത്രപരമായ പ്രകടനത്തിന്റെ നല്ല ഓര്മ്മകള് ടീമിന് കരുത്ത് പകരുമെന്നും അദ്ദേഹം കൂട്ടിച്ചേര്ത്തു.
അന്താരാഷ്ട്ര താരങ്ങളുമായുള്ള മത്സരം ടീമിന്റെ നിലവാരം ഉയര്ത്തി: സൗദ് അബ്ദുല്ഹാമിദ്
ഉറുഗ്വെയെപ്പോലെ തന്നെ സൗദി അറേബ്യയും ഒരു വലിയ ടീമാണെന്നും കോച്ച് ഡോണിസ് ആവശ്യപ്പെട്ടതുപോലെ മൈതാനത്ത് മികച്ച പ്രകടനം പുറത്തെടുക്കുമെന്നും ഡിഫെന്ഡര് സൗദ് അബ്ദുല്ഹാമിദ് പറഞ്ഞു. സൗദി ലീഗില് ലോകോത്തര താരങ്ങള് കളിക്കുന്നത് ദേശീയ ടീമിലെ കളിക്കാരുടെ മത്സരവീര്യവും ഒത്തിണക്കവും വര്ദ്ധിപ്പിച്ചതായി അദ്ദേഹം ചൂണ്ടിക്കാട്ടി. യൂറോപ്പില് പ്രൊഫഷണല് ഫുട്ബോള് കളിക്കുന്നതും വലിയ താരങ്ങളെ നേരിടുന്നതും അധിക പരിചയസമ്പത്ത് നല്കുമെങ്കിലും, നിലവില് സൗദി ലീഗില് തന്നെ പ്രമുഖ അന്താരാഷ്ട്ര താരങ്ങള് ഉള്ളതിനാല് അത്തരം വെല്ലുവിളികള് നേരിടുന്നത് ഇപ്പോള് കളിക്കാര്ക്ക് പരിചിതമാണെന്ന് സൗദ് വ്യക്തമാക്കി.
കായിക മന്ത്രിയുടെ നിരന്തരമായ പിന്തുണക്കും തങ്ങളെ പ്രോത്സാഹിപ്പിക്കുന്ന സൗദി ആരാധകര്ക്കും കളിക്കാര് നന്ദി അറിയിച്ചു. ആരാധകരുടെ സാന്നിധ്യം ലോകകപ്പ് യാത്രയില് തങ്ങള്ക്ക് വലിയൊരു പ്രചോദനമായിരിക്കുമെന്നും ടീം അംഗങ്ങള് കൂട്ടിച്ചേര്ത്തു.
Related News
