ചെന്നൈ: തമിഴ്നാട് നിയമസഭാ തിരഞ്ഞെടുപ്പ് പ്രചാരണത്തിന്റെ ഭാഗമായി ഭരണപരിഷ്‌കാരത്തിനുള്ള നിര്‍ണായക വാഗ്ദാനവുമായി തമിഴക വെട്രി കഴകം അധ്യക്ഷന്‍ വിജയ്. അപേക്ഷകളോ കൈക്കൂലിയോ ഇല്ലാതെ ജനങ്ങള്‍ക്ക് നേരിട്ട് ക്ഷേമപദ്ധതികള്‍ ലഭ്യമാക്കുന്നതിനായി 'തമിഴ്നാട് സിറ്റിസണ്‍ പ്രിവിലേജ് കാര്‍ഡ്' നടപ്പിലാക്കുമെന്ന് അദ്ദേഹം പ്രഖ്യാപിച്ചു. ആധാര്‍ കാര്‍ഡിന് സമാനമായി ഓരോ കുടുംബത്തിനും നല്‍കുന്ന ഈ കാര്‍ഡില്‍ കുടുംബാംഗങ്ങളുടെ എല്ലാ വിവരങ്ങളും ഉള്‍പ്പെടുത്തുമെന്നും, ഇതുവഴി അര്‍ഹമായ ആനുകൂല്യങ്ങള്‍ ജനനസമയത്തുതന്നെ തടസ്സമില്ലാതെ ഉറപ്പാക്കാന്‍ കഴിയുമെന്നും വിജയ് വ്യക്തമാക്കി.

നിര്‍മ്മിത ബുദ്ധി ഉപയോഗപ്പെടുത്തി സര്‍ക്കാര്‍ പദ്ധതികള്‍ ജനങ്ങളുടെ വീട്ടുപടിക്കല്‍ നേരിട്ടെത്തിക്കുമെന്നും വിജയ് കൂട്ടിച്ചേര്‍ത്തു. ഈ പദ്ധതി ശാസ്ത്രീയമായി നടപ്പിലാക്കാന്‍ സാധിക്കുന്ന ഒന്നാണെന്ന് അവകാശപ്പെട്ട അദ്ദേഹം, നിലവിലെ മുഖ്യമന്ത്രി എം.കെ. സ്റ്റാലിന്റെ ഭരണരീതിയെ വിമര്‍ശിക്കുകയും ചെയ്തു. സുതാര്യവും കാര്യക്ഷമവുമായ ഒരു ഭരണസംവിധാനമാണ് ടി.വി.കെ ലക്ഷ്യമിടുന്നതെന്നും, ഇടനിലക്കാരില്ലാത്ത സേവനവിതരണം തമിഴ്നാടിന്റെ പുരോഗതിക്ക് അനിവാര്യമാണെന്നും അദ്ദേഹം പറഞ്ഞു.