റിയാദ്: തലസ്ഥാന നഗരിയിലെ ഗതാഗതക്കുരുക്ക് ലഘൂകരിക്കുന്നതിനും ജീവനക്കാരുടെ ജീവിതനിലവാരം മെച്ചപ്പെടുത്തുന്നതിനുമായി റിയാദില് പുതിയ 'ഫ്ലെക്സിബിള് വര്ക്കിംഗ് അവേഴ്സ്' (വഴക്കമുള്ള ജോലിസമയം) പദ്ധതിക്ക് തുടക്കമായി. റോയല് കമ്മീഷന് ഫോര് റിയാദ് സിറ്റിയും (RCRC) സൗദി മാനവവിഭവശേഷി-സാമൂഹിക വികസന മന്ത്രാലയവും സംയുക്തമായാണ് ജൂണ് 2 മുതല് പദ്ധതി നടപ്പിലാക്കി തുടങ്ങിയത്.
റിയാദിലെ പ്രമുഖ ആറ് ബിസിനസ്സ് മേഖലകളിലെ 50-ലധികം സ്ഥാപനങ്ങളിലാണ് ആദ്യഘട്ടത്തില് ഈ പദ്ധതി നടപ്പിലാക്കുന്നത്. പദ്ധതി നടപ്പിലാക്കുന്ന പ്രധാന മേഖലകള്: കിംഗ് അബ്ദുള്ള ഫിനാന്ഷ്യല് ഡിസ്ട്രിക്റ്റ്, ഡിജിറ്റല് സിറ്റി, ഡിപ്ലോമാറ്റിക് ക്വാര്ട്ടര്, ലെയ്സന് വാലി, ഗ്രനാഡ ബിസിനസ്, റോഷന് ഫ്രണ്ട്.
ഈ പദ്ധതി പ്രകാരം ജീവനക്കാര്ക്ക് ജോലിക്ക് എത്തുന്നതിനും തിരികെ പോകുന്നതിനും 4 മണിക്കൂര് വരെയുള്ള സമയപരിധിയില് മാറ്റങ്ങള് വരുത്താന് സാധിക്കും. ഒരേ സമയത്ത് ജീവനക്കാര് കൂട്ടത്തോടെ എത്തുന്നതും പോകുന്നതും ഒഴിവാക്കി, വിവിധ സമയങ്ങളിലായി ക്രമീകരിക്കുന്നതിലൂടെ റിയാദിലെ തിരക്കേറിയ സമയങ്ങളിലെ ഗതാഗതക്കുരുക്ക് ഗണ്യമായി കുറയ്ക്കാന് സാധിക്കുമെന്ന് ഔദ്യോഗിക പ്രസ്താവനയില് പറയുന്നു. ഭരണപരമായ തസ്തികകളില് നിശ്ചിത സമയങ്ങളില് ജോലി ചെയ്യുന്ന ജീവനക്കാര്ക്കാണ് ഈ ആനുകൂല്യം ലഭിക്കുക. എന്നാല് ആരോഗ്യമേഖല, പൊതുവിദ്യാഭ്യാസം, ഫീല്ഡ് ജോലികള്, അടിയന്തര സേവനങ്ങള് തുടങ്ങിയ തുടര്ച്ചയായ പ്രവര്ത്തനങ്ങള് ആവശ്യമുള്ള മേഖലകളെ ഇതില് നിന്ന് ഒഴിവാക്കിയിട്ടുണ്ട്.
പരമ്പരാഗതമായ നിശ്ചിത സമയ പ്രവൃത്തിരീതിയെ അപേക്ഷിച്ച് പുതിയ 4 മണിക്കൂര് ഫ്ലെക്സിബിള് വിന്ഡോ ജീവനക്കാരുടെ മാനസികക്ഷമതയും ഉല്പ്പാദനക്ഷമതയും വര്ദ്ധിപ്പിക്കുമെന്ന് വിദഗ്ധര് അഭിപ്രായപ്പെടുന്നു. 'ഈ പുതിയ മാറ്റം ജീവനക്കാരെ കൂടുതല് ശ്രദ്ധയോടെ ജോലി ചെയ്യാന് സഹായിക്കും. തങ്ങളുടെ കുടുംബപരമായ ആവശ്യങ്ങള്ക്കും ശരീരത്തിന്റെ സ്വാഭാവിക താളത്തിനുമനുസരിച്ച് ജോലിസമയം ക്രമീകരിക്കാന് സാധിക്കുന്നത് വഴി ജീവനക്കാരുടെ പ്രകടനത്തിന്റെ ഗുണനിലവാരം ഉയരും.' കോ-ഫൗണ്ടര്, വാല്യൂ എക്സിക്യൂട്ടീവ് കണ്സള്ട്ടിംഗിലെ അലി അല്ജുംഹൂര് പറഞ്ഞു. ഓഫീസില് ചെലവഴിക്കുന്ന സമയത്തിന് പകരം, ജീവനക്കാരുടെ നേട്ടങ്ങള്ക്കും ഫലങ്ങള്ക്കും മുന്ഗണന നല്കുന്ന ഒരു തൊഴില് സംസ്കാരത്തിലേക്ക് കമ്പനികള് മാറണമെന്നും അദ്ദേഹം കൂട്ടിച്ചേര്ത്തു.
ദി കെ.പി.ഐ ഇന്സ്റ്റിറ്റ്യൂട്ട് അംഗമായ ളാഫിര് അല്-ഖര്നിയും പദ്ധതിയെ സ്വാഗതം ചെയ്തു. ഈ മാറ്റം ജീവനക്കാരുടെ മാനസികവും ശാരീരികവുമായ സന്നദ്ധത വര്ദ്ധിപ്പിക്കുമെന്ന് അദ്ദേഹം പറഞ്ഞു. തിരക്കില്ലാത്ത സമയങ്ങളില് ജീവനക്കാര്ക്കായി പരിശീലന പരിപാടികളും വര്ക്ക്ഷോപ്പുകളും സംഘടിപ്പിക്കാന് ഇത് സ്ഥാപനങ്ങള്ക്ക് സഹായകരമാകും. എന്നാല്, ഈ സംവിധാനം പൂര്ണ്ണ വിജയമാകാന് ടീമുകളെ നിയന്ത്രിക്കുന്ന ലീഡര്മാര്ക്ക് പ്രത്യേക പരിശീലനം നല്കേണ്ടതുണ്ടെന്നും അദ്ദേഹം ഓര്മ്മിപ്പിച്ചു.
Related News
