റിയാദ്: സൗദി അറേബ്യയിലെ പ്രവാസികള്ക്ക് തൊഴിലിടങ്ങളിലും സാമൂഹിക ജീവിതത്തിലും മികച്ച രീതിയില് ഇടപെടുന്നതിനായി അറബി ഭാഷാ പഠനം അനിവാര്യമായി മാറുന്നു. ഇതിന്റെ ഭാഗമായി, നോണ്-അറബിക് സംസാരിക്കുന്ന സര്ക്കാര്-സ്വകാര്യ മേഖലയിലെ ജീവനക്കാര്ക്കായി കിംഗ് സല്മാന് ഗ്ലോബല് അക്കാദമി ഫോര് അറബിക് ലാംഗ്വേജ് (KSGAAL) നടപ്പിലാക്കുന്ന 'വിസാല്' (Wesal) എന്ന ഭാഷാ പഠന പദ്ധതി കൂടുതല് നഗരങ്ങളിലേക്ക് വ്യാപിപ്പിക്കുന്നു.
പദ്ധതിയുടെ ആദ്യ രണ്ട് കോഴ്സുകള് കൈവരിച്ച വലിയ വിജയത്തിന് പിന്നാലെയാണ് ജിദ്ദ, ദമാം തുടങ്ങിയ നഗരങ്ങളിലേക്കും ഇത് വ്യാപിപ്പിക്കാന് തീരുമാനിച്ചതെന്ന് അക്കാദമിയിലെ വിദ്യാഭ്യാസ പരിപാടികളുടെ വിഭാഗം തലവന് പ്രൊഫ. സാദ് അല്-ഖഹ്താനി അറിയിച്ചു.
60 മണിക്കൂര് പരിശീലനം
മൂന്നു മാസം നീണ്ടുനില്ക്കുന്നതാണ് 'വിസാല്' പരിശീലനം. നേരിട്ടുള്ള ക്ലാസുകളും ഓണ്ലൈന് ക്ലാസുകളും ഉള്പ്പെടുന്ന 'ബ്ലെന്ഡഡ് ലേണിംഗ്' രീതിയിലാണ് പഠനം ക്രമീകരിച്ചിരിക്കുന്നത്. ആകെ 60 മണിക്കൂര് പരിശീലനത്തിലൂടെ പ്രവാസികള്ക്ക് അറബി ഭാഷയില് മികച്ച ആശയവിനിമയ ശേഷി കൈവരിക്കാന് സാധിക്കുമെന്ന് അല്-ഖഹ്താനി വ്യക്തമാക്കി.
ഭാഷാ പഠനത്തിനൊപ്പം സൗദിയുടെ തനത് സംസ്കാരവും പാരമ്പര്യവും പരിചയപ്പെടുത്തുന്ന പ്രവര്ത്തനങ്ങളും പദ്ധതിയുടെ ഭാഗമാണ്. ഉദാഹരണത്തിന്, 'അബ്ഷര്', 'സാം' തുടങ്ങിയ പ്രാദേശിക പ്രയോഗങ്ങള് പഠിക്കുന്നത് സഹപ്രവര്ത്തകരുമായി കൂടുതല് അടുപ്പം സ്ഥാപിക്കാനും ജോലിസ്ഥലത്തെ ആശയവിനിമയം സുഗമമാക്കാനും സഹായിക്കുന്നുവെന്ന് അദ്ദേഹം ചൂണ്ടിക്കാട്ടി.
തികച്ചും അടിസ്ഥാനപരമായ അറിവ് പോലുമില്ലാത്ത പല ജീവനക്കാരും പരിശീലനത്തിന് ശേഷം അറബിയില് പ്രസംഗിക്കാന് പ്രാപ്തരായത് പദ്ധതിയുടെ വലിയ വിജയമാണ്. കേവലം ഭാഷാ പഠനത്തിനപ്പുറം പ്രായോഗികമായ ആശയവിനിമയ രീതികള്ക്കാണ് പരിശീലനത്തില് മുന്ഗണന നല്കുന്നത്.
സ്വകാര്യ മേഖലയില് നിന്നും പദ്ധതിക്ക് വലിയ സ്വീകാര്യതയാണ് ലഭിച്ചുകൊണ്ടിരിക്കുന്നതെന്ന് അക്കാദമിയുടെ പബ്ലിക് റിലേഷന്സ് ആന്ഡ് മീഡിയ ഡയറക്ടര് യാസര് അല്ജുവൈസിര് പറഞ്ഞു. അറബി ഭാഷയുടെ പ്രാധാന്യം വര്ദ്ധിപ്പിക്കുന്നതിനും പ്രവാസികളെ ഭാഷാപരമായി ശാക്തീകരിക്കുന്നതിനും വേണ്ടി സൗദി മന്ത്രിസഭ അടുത്തിടെ അംഗീകരിച്ച 'നാഷണല് പോളിസി ഫോര് ദ അറബിക് ലാംഗ്വേജ്' ഈ നീക്കത്തിന് കൂടുതല് കരുത്തേകുന്നുണ്ടെന്നും അദ്ദേഹം കൂട്ടിച്ചേര്ത്തു.
Related News
