റിയാദ്: പശ്ചിമേഷ്യയില് സംഘര്ഷം പുകയുന്നതിനിടെ ഇന്ത്യന് ദേശീയ സുരക്ഷാ ഉപദേഷ്ടാവ് അജിത് ഡോവല് സൗദി അറേബ്യയില് ഔദ്യോഗിക സന്ദര്ശനം നടത്തി. ഇന്നലെ റിയാദിലെത്തിയ അദ്ദേഹത്തിന് ഊഷ്മളമായ സ്വീകരണമാണ് ലഭിച്ചത്. റിയാദ് വിമാനത്താവളത്തില് സൗദിയിലെ ഇന്ത്യന് അംബാസഡര് ഡോ. സുഹേല് ഐജാസ് ഖാന്, സൗദി വിദേശകാര്യ മന്ത്രാലയത്തിലെ പൊളിറ്റിക്കല് അഫയേഴ്സ് ഡെപ്യൂട്ടി മിനിസ്റ്റര് ഡോ. സൗദ് അല്-സതി എന്നിവര് ചേര്ന്ന് അദ്ദേഹത്തെ സ്വീകരിച്ചു.
സന്ദര്ശന വേളയില് സൗദി ഭരണകൂടത്തിലെ പ്രമുഖരുമായി അജിത് ഡോവല് വിശദമായ ചര്ച്ചകള് നടത്തി. സൗദി ഊര്ജ്ജ മന്ത്രി പ്രിന്സ് അബ്ദുല് അസീസ് ബിന് സല്മാനുമായി നടത്തിയ ചര്ച്ചയില് ഊര്ജ്ജ മേഖലയിലെ സഹകരണം പ്രധാന വിഷയമായി. വിദേശകാര്യ മന്ത്രി പ്രിന്സ് ഫൈസല് ബിന് ഫര്ഹാനുമായി അദ്ദേഹം കൂടിക്കാഴ്ച നടത്തി. സൗദി ദേശീയ സുരക്ഷാ ഉപദേഷ്ടാവ് ഡോ. മുസാദ് അല്-ഐബാനുമായി നടത്തിയ ചര്ച്ചയില് മേഖലയിലെ സുരക്ഷാ വെല്ലുവിളികള് വിലയിരുത്തി.
ഇന്ത്യയും സൗദിയും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനൊപ്പം, നിലവിലെ പ്രാദേശിക സാഹചര്യങ്ങളും പരസ്പര താല്പ്പര്യമുള്ള സുപ്രധാന വിഷയങ്ങളും ചര്ച്ചകളില് ഇടംപിടിച്ചു. അമേരിക്കയും ഇറാനും തമ്മിലുള്ള നാവിക സംഘര്ഷം നിലനില്ക്കുന്ന പശ്ചാത്തലത്തില്, ഇന്ത്യയുടെ സുരക്ഷാ ഉപദേഷ്ടാവിന്റെ ഈ സന്ദര്ശനം അതീവ പ്രാധാന്യത്തോടെയാണ് രാഷ്ട്രീയ നിരീക്ഷകര് കാണുന്നത്.
