വത്തിക്കാന്: ഗാസയില് ഇസ്രയേല് നടത്തുന്ന ബോംബാക്രമണം ഉടന് അവസാനിപ്പിക്കണമെന്ന് ഫ്രാന്സിസ് മാര്പാപ്പ ആവശ്യപ്പെട്ടു. ഗാസ മുനമ്പില് ഇസ്രയേല് ബോംബാക്രമണം പുനരാരംഭിച്ചതില് താന് ദുഃഖിതനാണെന്ന് പറഞ്ഞ മാര്പാപ്പ, അടിയന്തരമായി ആയുധങ്ങള് താഴെവച്ച് സമാധാന ചര്ച്ച പുനരാരംഭിക്കാനുള്ള ധൈര്യം കാണിക്കണമെന്നും ആവശ്യപ്പെട്ടു. ഞായറാഴ്ചയിലെ പ്രാര്ഥനയിലാണ് മാര്പാപ്പ ഇക്കാര്യം ആവശ്യപ്പെട്ടത്. റോമിലെ ആശുപത്രിവിടും മുന്പ് പലസ്തീന് ജനതയ്ക്കു വേണ്ടി അദ്ദേഹം പ്രാര്ഥന നടത്തിയെന്നും രാജ്യാന്തര മാധ്യമങ്ങള് റിപ്പോര്ട്ട് ചെയ്തു.
''ഗാസ മുനമ്പില് ഇസ്രയേല് ബോംബാക്രമണം പുനരാരംഭിച്ചതില് ഞാന് ദുഃഖിതനാണ്. ആക്രമണത്തില് നിരവധി പേര് കൊല്ലപ്പെടുകയും പരിക്കേല്ക്കുകയും ചെയ്തു. ആയുധങ്ങള് ഉടനടി താഴെവയ്ക്കണം. എല്ലാ ബന്ദികളെയും മോചിപ്പിക്കണം. അന്തിമ വെടിനിര്ത്തല് സാധ്യമാകുന്നതിനുള്ള ചര്ച്ചകള് പുനരാരംഭിക്കാന് ധൈര്യം കാണിക്കണം. ഗാസ മുനമ്പില് മാനുഷിക സാഹചര്യം വളരെ ഗുരുതരമാണ്. രാജ്യാന്തര സമൂഹത്തില്നിന്ന് അടിയന്തര ഇടപെടല് ആവശ്യമാണ്.''- മാര്പാപ്പ ആവശ്യപ്പെട്ടു
ന്യുമോണിയയും കടുത്ത ശ്വാസതടസ്സവും കാരണം ഒരു മാസത്തിലേറെയായി ചികിത്സയിലുള്ള ഫ്രാന്സിസ് മാര്പാപ്പ ആശുപത്രി വിട്ടു. വത്തിക്കാനിലെ ഔദ്യോഗിക വസതിയായ സാന്ത മാര്ത്തയിലേക്ക് അദ്ദേഹം മടങ്ങി. ആരോഗ്യനില പൂര്ണമായും വീണ്ടെടുക്കാന് രണ്ടു മാസത്തെ വിശ്രമം ആവശ്യമാണെന്ന് ഡോക്ടര്മാര് മാര്പാപ്പക്ക് നിര്ദേശം നല്കി. പ്രത്യേക പരിചരണം ആവശ്യമാണെന്നും പൊതുപരിപാടികളിലും യോഗങ്ങളിലും പങ്കെടുക്കരുതെന്നും നിര്ദേശിച്ചതായി അദ്ദേഹത്തെ ചികിത്സിച്ച ഡോക്ടര്മാരുടെ ടീമിന്റെ തലവന് സെര്ജിയോ ആല്ഫിയരി പറഞ്ഞു. ന്യുമോണിയ ഭേദമായിട്ടുണ്ടെങ്കിലും സങ്കീര്ണമായ അണുബാധയില്നിന്ന് പൂര്ണമായും മുക്തനായിട്ടില്ലെന്നും അദ്ദേഹം വ്യക്തമാക്കി. മാര്പാപ്പയുടെ ശബ്ദം മുമ്പത്തെപ്പോലെയാകാന് സമയമെടുക്കുമെന്നും ആല്ഫിയറി കൂട്ടിച്ചേര്ത്തു.
Related News
