റിയാദ്: 2030 ഓടെ സൗദിയില് പുതുതായി 10 ലക്ഷം തൊഴിലവസരങ്ങള് സൃഷ്ടിക്കുമെന്ന് വാണിജ്യ മന്ത്രി മാജിദ് അല് ഖസബി പ്രസ്താവിച്ചു. ടൂറിസം, സംസ്കാരം, സ്പോര്ട്സ്, ക്രിയേറ്റീവ് വ്യവസായങ്ങള് എന്നീ മേഖലകളിലായിരിക്കും തൊഴിലവസരങ്ങളുണ്ടാക്കുക. രാജ്യം ഇതുവരെ അഭിലാഷങ്ങള്ക്കു പിന്നാലെയായിരന്നു. ഇപ്പോഴത് പ്രവര്ത്തനങ്ങളിലേക്കു മാറിയിരിക്കുകയാണെന്നും അതിനാല് വിഷന് 2030 ലക്ഷ്യം കൈവരിക്കുക തന്നെ ചെയ്യുമെന്നും മന്ത്രി പറഞ്ഞപ. സൗദി ആതിഥേയത്വം വഹിക്കുന്ന എക്സ്പോ 2030, ഫിഫ ലോകകപ്പ് 2034 എന്നിവ അടുത്തുവരുമ്പോള് നമ്മുടെ യുവതി, യുവാക്കളെ മുന്നോട്ട് കൊണ്ടുപോകാന് നമുക്ക് ഭാവി കഴിവുകള് ആവശ്യമാണെന്നും അദ്ദേഹം കൂട്ടിച്ചേര്ത്തു. റിയാദ് റിറ്റ്സ് കാള്ട്ടന് കോണ്ഫറന്സ് ഹാളില് സംഘടിപ്പിച്ച ഹ്യൂമന് ക്യാപ്പബിലിറ്റി ഇനീഷ്യേറ്റിവ് സമ്മേളനത്തില് സംസാരിക്കുകയായിരുന്നു മന്ത്രി.
സിനിമ, ഡിസൈന്, ഫാഷന്, ഡിജിറ്റല് കലകള് എന്നിവയില് ശക്തമായ വളര്ച്ച പ്രതീക്ഷിക്കുന്നതായി മന്ത്രി പറഞ്ഞു. ക്രിയേറ്റിവ് ഇക്കണോമി 80,000-ലധികം ജോലിക.ള് സൃഷ്ടിക്കും. 2030-ഓടെ ജി.ഡി.പിയുടെ 4.4 ശതമാനത്തില്നിന്ന് 19 ശതമാനമായി ഡിജിറ്റല് സമ്പദ്വ്യവസ്ഥ വളരും. 2030-ഓടെ ആരോഗ്യമേഖല 250 ശതകോടി റിയാലിലെത്തുമെന്നാണ് പ്രതീക്ഷിക്കുന്നത്. സൗദികളില് 65 ശതമാനം പേരും 35 വയസ്സിന് താഴെയുള്ളവരാണ്. കഴിവുകള് വികസിപ്പിക്കുന്നതിനും തൊഴിലാളികളുടെ കഴിവുകളിലും ഭാവി ആവശ്യങ്ങളിലും ഉള്ള വിടവുകള് വിലയിരുത്തുന്നതിനും രാജ്യം പ്രവര്ത്തിക്കുന്നുവെന്നും മന്ത്രി പറഞ്ഞു.
വിദ്യാഭ്യാസ മേഖലയിലെ നിക്ഷേപം മേലില് ഒരു ഓപ്ഷനല്ല, മറിച്ച് അത്യന്താപേക്ഷിതമായ ആവശ്യമാണ്. ആര്ട്ടിഫിഷല് ഇന്റലിജന്സും സാങ്കേതികവിദ്യയും ഉപയോഗിക്കുന്നതിന് പുറമേ രാജ്യത്തേക്ക് വൈദഗ്ധ്യം കൊണ്ടുവരിക, ഭാവി ലക്ഷ്യങ്ങള് കൈവരിക്കുന്നതിന് വിദ്യാര്ഥികളെ വിദേശത്തേക്ക് അയക്കുക എന്നിവക്കായും രാജ്യം മുന്തൂക്കം നല്കുകയെന്നും മന്ത്രി പറഞ്ഞു. സമ്മേളനം ഇന്നു സമാപിക്കും.
