ദോഹ: ഖത്തറിലെ വായനാശീലമുള്ള പുസ്തകപ്രേമികള്ക്ക് എളുപ്പത്തില് പുസ്തകങ്ങള് ലഭ്യമാക്കാന് രാജ്യത്തിന്റെ വിവിധയിടങ്ങളില് സ്വയം പ്രവര്ത്തിപ്പിക്കാവുന്ന കുഞ്ഞന്പുസ്തകശാല''കളുമായി നാഷണല് ലൈബ്രറി. ലൈബ്രറി അംഗങ്ങള്ക്ക് എളുപ്പത്തിലും സൗകര്യപ്രദമായും പുസ്തകങ്ങള് ബ്രൗസ് ചെയ്യാനും ഇഷ്ടമുള്ള പുസ്തകം തെരഞ്ഞെടുത്ത് വായിക്കാനും അവസരം നല്കുന്ന വെന്ഡിങ് മെഷീനുകള് ഒരുക്കിയാണ് അധികൃതര് വായനക്കാര്ക്ക് സൗകര്യം ഒരുക്കുന്നത്. അല്ഖോറിലെ പുസ്തകപ്രേമികള്ക്കായി അല് ഖോര് മാളിന്റെ ഗ്രൗണ്ട് ഫ്ലോറിലാണ് ഇത്തരത്തിലുള്ള ആദ്യത്തെ കുഞ്ഞന് പുസ്തക സ്റ്റേഷന് സ്ഥാപിച്ചിരിക്കുന്നത്.
ലൈബ്രറി അംഗങ്ങള്ക്ക് അവരുടെ അംഗത്വ കാര്ഡ് സൈ്വപ് ചെയ്ത ശേഷം പുസ്തകം തെരഞ്ഞെഉടുക്കാവുന്ന തരത്തിലാണ് പുതിയ സംവിധാനം ഒരുക്കിയിരിക്കുന്നത്. അംഗങ്ങള്ക്ക് അവരുടെ കാര്ഡ് സൈ്വപ്പ് ചെയ്യുകയോ അംഗത്വ നമ്പര് നല്കുകയോ പാസ്വേഡ് നല്കുകയോ ചെയ്താല് മതി. അതിനുശേഷം അവര്ക്ക് സ്റ്റേഷന്റെ കാറ്റലോഗ് ബ്രൗസ് ചെയ്ത് ആവശ്യമുള്ള പുസ്തകം തിരഞ്ഞെടുക്കാം. ഉപയോക്താക്കളായ ലൈബ്രറി അംഗങ്ങള്ക്ക് ഏറ്റവും വൈവിധ്യമുള്ള വായനാനുഭവം ഉറപ്പാക്കുന്നതിന് ലഭ്യമായ പുസ്തകങ്ങളുടെ പട്ടിക സ്ഥിരമായി അപ്ഡേറ്റ് ചെയ്യും. മാളിന്റെ പ്രവര്ത്തന സമയങ്ങളില് ലൈബ്രറി അംഗത്വമുള്ളവര്ക്ക് ഈ സേവനം പ്രയോജനപ്പെടുത്താം.
കൂടുതല് സമഗ്രവും സാംസ്കാരിക സമ്പന്നവുമായ ഒരു സമൂഹത്തെ രൂപപ്പെടുത്തുകയെന്ന ഖത്തര് നാഷണല് ലൈബ്രറിയുടെ വിശാലമായ കാഴ്ചപ്പാടിന്റെ ഭാഗമാണ് പദ്ധതി.
'സമൂഹത്തിന് അറിവ് കൂടുതല് പ്രാപ്യമാക്കുക എന്ന ഞങ്ങളുടെ ദൗത്യത്തിലെ ഒരു നാഴികക്കല്ലാണ് ആദ്യത്തെ പുസ്തക സ്റ്റേഷനെന്ന് ക്യുഎന്എല്ലിന്റെ ഗവേഷണ, പഠന സേവന വിഭാഗം ഡയറക്ടര് കാറ്റിയ മേദാവര് പറഞ്ഞു.രാജ്യത്തിന്റെ മറ്റു ഭാഗങ്ങളിലും ഇത്തരം പുസ്തക മെഷീനുകള് സ്ഥാപിക്കാനാണ് ഖത്തര് നാഷണല് ലൈബ്രറി പദ്ധതിയിടുന്നത്.
Related News
