ദില്ലി: രാജ്യത്ത് പൊതു സെന്സസിനൊപ്പം ജാതി സെന്സസും നടത്താന് കേന്ദ്ര സര്ക്കാര് തീരുമാനിച്ചു. കേന്ദ്രമന്ത്രിസഭാ യോഗ തീരുമാനങ്ങള് വിശദീകരിച്ച് കേന്ദ്ര മന്ത്രി അശ്വിനി വൈഷ്ണവാണ് ദില്ലിയില് ഇക്കാര്യം അറിയിച്ചത്. പ്രതിപക്ഷത്ത് കോണ്ഗ്രസ് അടക്കമുള്ള പാര്ട്ടികള് ആവര്ത്തിച്ച് ആവശ്യപ്പെട്ട കാര്യമാണിത്. എന്നാല് ജാതി സെന്സസ് പ്രത്യേകമായി നടത്തില്ലെന്നും സെന്സസിനൊപ്പം പൗരന്മാരുടെ ജാതി തിരിച്ചുള്ള കണക്കെടുക്കുമെന്നുമാണ് പറയുന്നത്.
അതേസമയം സംസ്ഥാനങ്ങള് നടത്തിയത് ജാതി തിരിച്ചുള്ള സര്വേയാണെന്നും ജാതി സെന്സസല്ലെന്നും മന്ത്രി അശ്വിനി വൈഷ്ണവ് പറഞ്ഞു. സംസ്ഥാനങ്ങളിലെ ജാതി സെന്സസ് സാമൂഹ്യ സ്പര്ധയ്ക്ക് ഇടയാക്കിയെന്ന് കേന്ദ്രം കുറ്റപ്പെടുത്തിയിരുന്നു. കര്ണാടകത്തിലടക്കം ജാതി സെന്സസ് വലിയ വിവാദമായിരിക്കെയാണ് കേന്ദ്രം ഭരിക്കുന്ന എന്ഡിഎ സര്ക്കാരിന്റെ പുതിയ നീക്കം.
ബിഹാറില് നിയമസഭാ തെരഞ്ഞെടുപ്പ് നടക്കാനിരിക്കെയാണ് കേന്ദ്രസര്ക്കാര് ഈ സുപ്രധാന പ്രഖ്യാപനം നടത്തിയിരിക്കുന്നതെന്നത് ശ്രദ്ധേയമാണ്. ലോക്സഭാ പ്രതിപക്ഷ നേതാവ് രാഹുല് ഗാന്ധി നിരന്തരം ജാതി സെന്സസ് നടത്തണമെന്ന് ആവശ്യപ്പെട്ടിരുന്നു. ബിഹാറില് എന്ഡിഎ ഘടകകക്ഷിയായ ജെഡിയുവും ജാതി സെന്സസിന് അനുകൂലമായ നിലപാടാണ് സ്വീകരിച്ചത്. 2011 ലാണ് അവസാനമായി രാജ്യത്ത് സെന്സസ് നടത്തിയത്. 2021 ല് നടത്തേണ്ട സെന്സസ് 2025 ആയിട്ടും നടത്തിയിട്ടില്ല.
ഇന്ത്യന് ജനതയില് 75 ശതമാനത്തിലധികം വരുന്ന പിന്നാക്ക വിഭാഗങ്ങളുടെ കാലങ്ങളായുള്ള ആവശ്യമാണ് ജാതി സെന്സസ് നടപ്പാക്കുകയെന്നത്. ഏതൊക്കെയാണ് ജാതികള്, വിവിധ ജാതികളുടെ സാമൂഹിക-സാമ്പത്തിക-തൊഴില്-വിദ്യാഭ്യാസ അവസ്ഥകള് എന്തൊക്കെയാണ്, ഭരണകൂടത്തിന്റെ കൈകള് എത്താത്തത് എവിടെ, വിഭവങ്ങളുടെ വിതരണം ഏതുനിലക്കാണ് നടക്കുന്നത് എന്നിങ്ങനെ ഒട്ടനവധി ചോദ്യങ്ങള്ക്ക് സൂക്ഷ്മമായ ഉത്തരം നല്കാന് ജാതി സെന്സസിന് സാധിക്കുമെന്ന് ഇതിനെ അനുകൂലിക്കുന്നവര് പറയുന്നു.
ജാതി സെന്സസ് നടപ്പാക്കാനുള്ള തീരുമാനത്തെ വൈകി വന്ന വിവേകമെന്നാണ് കോണ്ഗ്രസ് വിശേഷിപ്പിച്ചത്. അഹമ്മദാബാദ് എ.ഐ.സി.സി കണ്വെന്ഷന് പാസാക്കിയ സാമൂഹിക നീതിയെ കുറിച്ചുള്ള കോണ്ഗ്രസ് പ്രമേയത്തില് ജാതി സെന്സസിനെ കുറിച്ച് പറഞ്ഞിട്ടുണ്ടെന്നും വൈകി വന്ന വിവേകമായാണ് പാര്ട്ടി ഇതിനെ കാണുന്നതെന്നും കോണ്ഗ്രസ് ജനറല് സെക്രട്ടറി ജയ്റാം രമേശ് എക്സില് കുറിച്ചു. സാമൂഹിക നീതിയുടെ അടിത്തറ കൂടുതല് ശക്തിപ്പെടുത്തുന്നതിന് ജാതി അടിസ്ഥാനമാക്കിയുള്ള സെന്സസ് അത്യാവശ്യമാണ്. 2011ല് കോണ്ഗ്രസ് നടത്തിയ സാമൂഹിക-സാമ്പത്തിക ജാതി സെന്സസിന്റെ കണ്ടെത്തലുകള് മോദി സര്ക്കാര് ഇതുവരെ പ്രസിദ്ധീകരിച്ചിട്ടില്ലെന്നും ജയ്റാം രമേഷ് പറഞ്ഞു.
Related News
